Jeova i Keagud Long Mi
MI STAT mekem wok blong Jeova long fasin we i defren. Mi gruap long wan naesfala ples afsaed long taon long Nyu Silan, we ol man Maori olsem mi oli stap long hem. Wan dei taem mi stap ron long hos, mi mitim kasen blong mi Ben long rod. Hemia long 1942, long taem ya we ol tri i lusum lif blong olgeta (long ol ples long Saot blong wol, mo ol tri i karem flaoa long ol ples long Not blong wol). Mi gat 27 yia mo long taem ya mi wan strong memba blong Jyos blong Engglan.
Plante yia finis Ben i stap ridim ol buk blong Jaj Rutherford, long taem ya we hem i presiden blong Watch Tower Bible and Tract Society, mo naoia i gat wan leta long han blong hem we i kam long ofis blong Watch Tower Sosaeti long Nyu Silan we i askem hem blong invaetem ol man ples blong go long wan haos we oli save mekem lafet blong Lodsapa tugeta. Mo tu, Ben i mas lukaot wan man blong mekem tok. Taem hem i luk mi, Ben i se: “Man ya hem i yu.” Mi mi glad from hem i ting se mi mi naf—mo mi stap kakae bred mo dring waen long jyos—ale mi agri.
Long taem blong Lodsapa ya, kolosap 40 man oli joen tugeta long haos blong Ben blong mekem lafet blong tingbaot ded blong Masta blong yumi, mo i no gat wan long olgeta we hem i Wetnes blong Jeova. Taem mi kamtru kasen blong mi hem i givim pepa blong tok long mi. Mifala i no singsing fastaem long singsing we pepa i talem mi jes singaot tawean blong Ben blong statem wetem prea. Ale mi gohed blong mekem tok ya, we i gat plante kwestin long hem wetem ol ansa we i kamaot long Baebol. Wan lida blong skul we i joen long Memoriol hem i talem sam tok blong blokem, be ol tok ya ansa blong olgeta oli kamaot taem mi ridim ol haf blong Baebol we i stap long tok.
Mi rimemba se wan long ol kwestin we i stap long tok hem i long saed blong taem ya blong yia we oli mas mekem lafet ya long hem. Hem i gud tumas taem olgeta we i stap oli luk afsaed long windo mo oli luk fulmun. I klia nomo, taem ya hem i Naesan 14.
!Hem i wan gudfala naet tumas! !Lafet we mifala i mekem i stap fo haoa! Plante man oli askem ol kwestin mo ansa blong olgeta i kamaot long ol vas we Sosaeti i putum long tok ya. Taem mi tingtingbak long taem ya, mi save se mi no save mekem ekspiryens olsem sipos mi no gat lav blong Jeova we i kea—nating se long taem ya mi no givim laef blong mi long hem yet olsem wan Wetnes blong hem. Nating se i olsem, long naet blong Memoriol ya long 1942, mi luksave plan blong mi long laef.
Laef Blong Mi Bifo
Mi bon long 1914. Papa blong mi i ded fo manis bifo we mi bon mo mi stap tingbaot we taem mi pikinini oltaem mi jelas long ol narafala pikinini we oli gat wan papa blong olgeta we i laekem olgeta. Mi wantem samting ya tumas. Taem mama blong mi i stap hem wan we i no gat hasban laef blong hem i had tumas, mo i kam moa strong from ol samting we oli kamaot biaen long Namba Wan Bigfala Faet Blong Wol.
Mi mared taem mi yangfala nomo, long wan yangfala gel nem blong hem Agnes Cope, mo hem i kam fren blong mi long laef bitim 58 yia finis. Long stat mitufala i traehed blong mekem laef blong mitufala i gud. Mi no moa save wokem garen from ol strong draetaem. Mi haremgud lelebet long ol spot, be go kasem ekspiryens ya long Memoriol blong 1942, mi no rili gat wan plan long laef.
Prij Long Ol Famle
Afta long Memoriol ya, mi stadi strong long Baebol, mi storeyan wetem sam long ol kasen blong mi long ol buk we i tokbaot Baebol we Watch Tower Society i prentem. Long Septemba 1943 sam Wetnes blong Jeova blong wan defren ples oli kam blong visitim velej blong mifala we i stap hem wan. Mifala i gat wan bigfala storeyan, blong fo haoa. Biaen, taem mi save se bambae oli gobak long nekis moning, mi askem se: “?Wanem i blokem mi blong mi baptaes naoia?” Mi wetem tu kasen blong mi mifala i draon long wora blong tekem baptaes long haf pas wan long moning.
Afta long samting ya, mi wokbaot longwe blong prij long ol famle blong mi. Samfala oli akseptem, mo mi storeyan long olgeta long Matyu japta 24. Samfala oli no akseptem, mo taem mi storeyan wetem olgeta mi yusum ol tok blong Jisas long ol man Farisi we i stap long Matyu japta 23. Be sloslou, mi lanem blong waes moa long toktok blong mi, blong folem eksampel blong fasin kaen mo lav blong Papa blong yumi long heven.—Matyu 5:43-45.
Fastaem waef blong mi i agensem tingting blong mi blong mekem wok blong Jeova. Be i no longtaem, hem i joen wetem mi, mo long Desemba 1943 hem i givim laef blong hem mo i baptaes. Long dei ya, we mi no save fogetem, i gat nara faef man blong velej blong mifala blong Waima we oli tekem baptaes tu, mekem se namba blong ol man blong talemaot Kingdom long ples ya i kasem naen.
Ol Blesing Nating Se Samfala Oli Agensem Mifala
Long 1944 ol brata blong narafala ples oli visitim mifala bakegen, mo long taem ya oli trenem mifala blong prij long ol haos wanwan. Taem ol man long ples ya oli savegud mifala moa, fasin agens blong ol man blong Krisendom i kam antap. (Jon 15:20) Fasin agens i gohed longtaem wetem ol lida blong skul blong ples ya, mekem se i gat plante longfala storeyan long ol tijing blong skul. Be Jeova i mekem mifala i win, mo ol narafala memba blong komuniti ya, wetem sista blong mi, oli kam aninit long kea blong Jeova we i laekem olgeta.
Wan kongregesen i stanap long Waima long Jun 1944. Ol traem blong ol man blong skul mo tingting blong agens i kam antap. Samting ya i mekem se i tabu blong ol Wetnes blong Jeova oli berem man long beregraon blong velej. Long ol taem ya fasin agens i kam strong. Samtaem oli agensem mifala long saed blong bodi. Trak blong mi mo haos blong trak tufala i bon olgeta. Nating se i olsem, wetem blesing blong Jeova, i no bitim tri manis, mifala i save pem wan trak bakegen. Mo mi yusum wan kat we hos i stap pulum blong karem bigfala famle blong mi i go long ol miting.
Taem namba blong ol man we i joen i kam antap samting ya i minim se mifala i nidim kwiktaem wan bigfala ples blong miting, ale mifala i mekem disisin blong bildim wan Haos Kingdom long Waima. Hemia i faswan Haos Kingdom we oli bildim long Nyu Silan. Long Desemba 1, 1949, mifala i katem ol faswan tri, mo fo manis biaen wan ful asembli mo dedikasen i tekem ples long nyu Haos Kingdom ya we i save karem 260 man. Long taem ya, i wan bigfala samting blong bildim wan haos olsem, be help blong Jeova nomo i mekem i kamtru.
Moa Pruf Blong Soem Kea Blong Jeova
Taem namba blong ol man blong talemaot Kingdom long not blong Nyu Silan i stap kam antap, ol elda we oli goraon blong mekem visit oli pulum ol brata blong go wok long ol ples we i gat bigfala nid. Taem mi harem samting ya, long 1956, mi mo famle blong mi i muf i go long Pukekoe, long saot blong Oklan. Mifala i wok 13 yia long ples ya.—Skelem Ol Wok 16:9.
Tu eksampel blong fasin kea blong Jeova long taem ya i stap long tingting blong mi. Taem eria kaonsel blong ples ya i tekem mi mi wok olsem draeva blong trak mo blong lukluk long ol enjin, branj ofis blong Watch Tower Society long Oklan i askem mi blong go long fo wik kos blong Kingdom Ministri Skul. From samting ya mi askem fo wik blong no wok, mo man we i bos long saed blong enjin i se: “I oraet nomo. Mi laekem sipos ol man oli olsem yu. Taem yu kambak, yu kam mo luk mi long ofis blong mi.” Taem mi kambak long ofis blong hem bakegen, mi kasem pei blong ol fo wik we mi bin aot. Samting ya i mekem se mi save pem olting blong famle blong mi long saed blong bodi.—Matyu 6:33.
Hemia i faswan eksampel. Namba tu eksampel i hapen taem waef blong mi mo mi mitufala i joen long fultaem paenia long 1968. Bakegen, mifala i dipen long Jeova blong sapotem mifala, mo hem i blesem mifala. Wan moning taem mifala i dring ti finis, waef blong mi i openem doa blong aesbokis mo hem i luk se i no gat samting insaed be i gat wan haf pis blong bata nomo. “Sarn,” hem i talem, “yumi no gat samting blong kakae. ?Bambae yumi goaot long wok blong prij tede?” ?Mi ansa olsem wanem? “!Yes!”
Long faswan doa we mifala i mekem, man blong haos hem i akseptem buk we mifala i soem long hem mo hem i kaen tumas blong givim plante eg long mifala olsem wan presen. Namba tu man we mifala i visitim hem i givim wan presen long ol ligim—kumaras (kumala), kaliflaoa, mo ol karot. Mo ol narafala kakae bakegen we mifala i kambak wetem long haos long dei ya hemia mit mo bata. Samting we i hapen long mifala long dei ya i stret long tok we Jisas i talem: “Yufala i traem tingbaot ol pijin ya we oli stap flae olbaot. Olgeta ya oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i hae moa long ol pijin.”—Matyu 6:26.
Wan Wok Long Narafala Kantri
!Rarotonga long Kuk Aelan! Hemia ples we oli sanem mifala long hem blong mekem spesel paenia long 1970. Bambae i kam ples blong mifala long ol fo yia we bambae i kam. Faswan samting we mifala i fesem long ples ya hemia we mifala i mas lanem wan nyu lanwis. Be, from we sam samting i sem mak nomo wetem lanwis blong ol Maori blong Nyu Silan mo lanwis blong Kuk Aelan, mi save mekem faswan pablik tok blong mi afta we mi stap faef wik nomo long ples ya.
Long Kuk Aelan, i no gat plante pablisa blong Kingdom mo mifala i no gat ples blong miting. Bakegen, long ansa blong prea blong mifala, Jeova i luksave nid blong mifala. Wan gudfala storeyan wetem wan man blong stoa, i mekem se mifala i saenem pepa long wan gudfala graon, mo wan yia biaen mifala i gat wan smol haos mo wan Haos Kingdom we i naf blong holem 140 man. Stat long taem ya mifala i kasem plante blesing, long ol samting we Jeova i mekem.
Mifala i glad moa long fasin blong ol man aelan blong welkam mifala. Plante taem, taem mifala i stap prij, oli givim dring long mifala—hemia i gud tumas long hot taem, taem ples i hevi. Plante taem mifala i kamhom mo faenem ol banana, popo, mango, mo ol aranis i stap long doa blong mifala be mifala i no save hu i putum.
Long 1971 waef blong mi mo mi, mitufala i go wetem nara tri pablisa blong Rarotonga, blong go long aelan ya Aitutaki, we plante man oli savegud long hem from naesfala lugun blong hem. Mifala i faenem ol man we oli laekem Tok blong God long medel blong olgeta we i welkamem mifala mo mifala i statem fo Baebol stadi, we mifala i gohed long hem long leta taem mifala i kambak long Rarotonga. Samtaem biaen ol studen ya blong Aitutaki oli baptaes, mo wan kongregesen i stanap. Long 1978, namba tu Haos Kingdom blong Kuk Aelan oli bildim long ples ya. Jeova i mekem ol samting oli gru taem mifala i planem mo putum wora.—1 Korin 3:6, 7.
Mi gat jans blong visitim ten aelan long grup blong Kuk Aelan, plante taem i hadwok blong mekem olsem. Mi go long wan sip long Atiu, 180 kilomita longwe, mo trep ya i tekem sikis dei from we win i strong mo solwora i raf. (Skelem 2 Korin 11:26.) Be nating se kakae i sot mo plante raon long mi oli kasem sik blong solwora, mi harem i gud tumas from Jeova i kea long mi, mekem se mi sefgud nomo kasem ples we mi go long hem.
Long 1974 oli no moa letem mifala blong stap long Kuk Aelan mo samting ya i mekem se mifala i mas gobak long Nyu Silan. Long taem ya i bin gat tri kongregesen long ol aelan ya.
Sam Moa Jans Blong Wok—Mo Wan Traem
Taem mifala i gobak long Nyu Silan, ol narafala doa blong wok i open. (1 Korin 16:9) Sosaeti i nidim sam man we oli save transletem Wajtaoa mo ol narafala buk we i tokbaot Baebol long lanwis blong ol man Maori blong Kuk Aelan. Mi tekem jans ya, mo hemia i stap olsem wok blong mi kam kasem tede. Ale mi gat jans blong mekem plante visit bakegen long ol brata blong mi long Kuk Aelan, fastaem olsem seket elda, biaen olsem man we i save tekem ples blong distrik elda.
Long wan long ol visit ya, Brata Aleks Napa, wan spesel paenia blong Rarotonga, i go wetem mi long 23 dei taem mifala i go long sip long Manahiki, Rakahanga, mo Penrin—ol aelan long not blong Kuk. Long wanwan aelan, Jeova i pusum olgeta we oli gat gudhat blong welkamem mifala blong givim ples blong slip long mifala mo blong akseptem ol buk we i tokbaot Baebol. (Skelem Ol Wok 16:15.) Long ol aelan ya, i gat plante osta wetem perel insaed, mo plante taem ol man oli givim perel olsem wan presen blong givhan long wok blong prij we i goraon long olgeta ples long wol. Olsemia nao, taem mifala i givim ol perel long saed blong speret, mifala i kasem ol prapa perel.—Skelem Matyu 13:45, 46.
!Ples ya we i stap longwe long ol narafala ples long wol i naes tumas! !Tingbaot bigfala sak oli stap swim long kwaet fasin tugeta wetem ol pikinini long wan lugun! !Skae long naet i naes tumas! Taswe tok blong Ol Sam i tru nomo i se: “Dei i stap talemaot ol samting ya i go long narafala dei, mo naet i stap talemaot ol samting we hem i save i go long narafala naet.”—Ol Sam 19:2.
Ale, naen yia bifo, i gat wan bigfala traem blong fasin holemstrong. Waef blong mi hem i slip long haospetal from we wan string long bren blong hem i brok. I nidim blong oli mas katem hem, be dokta i no agri blong mekem olsem sipos hem i no yusum blad. Mi mo waef blong mi i no save agri long samting ya we bambae i brekem loa blong God. Be tingting blong dokta ya i talem se hem i mas mekem evri samting blong sevem laef, hemia se hem i mas givim blad tu.
Helt blong waef blong mi i kam nogud, mo oli putum hem long wan spesel rum blong oli save lukluk long hem oltaem, mo plante man i no save kam visitim. Hem i no moa save harem plante samting from sik ya i mekem trabol long sora blong hem. Sik ya i kam strong tumas. Afta long wan visit wan dokta i folem mi i go long trak blong mi, i talem bakegen se waef blong mi i gat jans nomo blong laef sipos oli givim blad long hem mo i askem strong long mi blong letem samting ya. Nating se i olsem, waef mo mi i trastem Jeova—i nating sipos fasin blong obei long loa blong hem i save mekem se mifala i lusum laef blong mifala naoia.
Wantaem nomo, helt blong waef blong mi i stap kamgud. Wan dei mi kam mo mi luk we hem i stap sidaon long bed mo i stap rid. Long olgeta dei we i kam biaen, hem i stat blong prij long ol sikman mo ol dresa. Biaen mi kasem wan mesej blong go long ofis blong dokta. “!Masta Wharerau,” hem i talem, “yu yu wan laki man! Mifala i bilif se sik blong woman blong yu i finis.” Mi no save bilivim samting ya, namba blong blad blong hem i kamgud bakegen. Mitufala i tangkyu long Jeova mo mitufala i plan bakegen blong mekem wok blong hem fulwan.
Naoia mi gobak bakegen long Kuk Aelan mo wan taem bakegen mi wok long Rarotonga. !Jeova i givim jans ya! Taem waef mo mi i tingtingbak mitufala i glad tumas long fasin blong Jeova blong kea long mitufala bitim fefte yia finis long wok blong hem. Long saed blong bodi, mifala i neva sot long wan samting. Long saed blong speret, i gat plante tumas blesing blong kaontem. Wan we i gud blong makemaot hemia namba blong ol famle blong mi long saed blong bodi we oli joen long trutok. Mi save kaontem bitim 200 we naoia oli baptaes olsem Wetnes blong Jeova, we i gat 65 long olgeta we oli blong stret laen blong mi. Wan smol bubu blong mi i wan memba blong famle blong Betel long Nyu Silan, mo wan pikinini gel blong mi wetem hasban blong hem mo tu boe blong tufala oli stap mekem wok blong bildim ol branj. —3 Jon 4.
Taem mi tingbaot fyuja, mi glad tumas long fasin blong laef long wan paradaes we, long ful wol, evri samting bambae i kamgud bitim grin krik we mi bon long hem. Bambae i wan gudfala blesing blong welkamem bakegen papa mo mama blong mi taem tufala i laef bakegen mo blong mekem tufala i save long ransom, Kingdom, mo ol narafala samting from fasin kea blong Jeova.
Strong tingting blong mi, we i stap strong from save ya se God hem i kea long mi, i olsem we man blong raetem Ol Sam i talem long Ol Sam 104:33: “Bambae mi mi sing long [Jeova, NW] oltaem long laef blong mi, bambae mi stap sing blong presem God olwe, gogo laef blong mi i finis.”—Sarn Wharerau i talem store ya.
[Tok Blong Pija Long Pej 28]
Faswan Haos Kingdom we oli bildim long Nyu Silan, 1950