Oli Save Nem Blong God
FASWAN buk we oli raetem mo oli wokem long ol kantri we Engglan mo Amerika oli rulum hemia Buk (Bay Psalm Book) blong Ol Sam. Stephen Daye i prentem faswan buk ya long Masajuset Bei Koloni long yia 1640. Buk ya hem i buk blong Ol Sam long Baebol, oli tanem long Hibru lanwis i go long Engglis lanwis we ol man oli stap toktok mo raet long hem long taem ya.
Wan impoten samting long buk ya (Bay Psalm Book) blong Ol Sam se hem i yusum nem blong God long sam vas blong hem. Taswe, kolosap 350 yia bifo taem man i ridim buk ya hem i save kasem save long nem blong Man we i Wokem yumi. Eksampel, long buk ya, oli raetem Ol Sam 83:17, 18 olsem se: “Letem olgeta oli sapraes mo oli trabol tumas. Yes letem olgeta oli kasem sem, mo oli finis. Yu mekem ol man oli save we yu nomo we nem blong yu IEHOVAH, yu nao yu hae we yu hae long olgeta ples long wol.”
I tru we yumi mas go moa bitim fasin ya blong save nem blong Hae God se hem i Jeova (Iehovah.) Long buk ya (Bay Psalm Book) blong Ol Sam 1:1, 2, hem i talem se wan “man blong God” i no folem advaes blong ol rabis man, “be hem i stap haremgud long ol loa blong Iehovah.” Ol Sam long Nyu Engglan Baebol we oli wokem bakegen long 1648, hem i talem se: “Be man ya i stap haremgud oltaem long ol loa blong Jeova.”
Be long taem blong yumi New World Translation of the Holy Scriptures i talem olsem: “Man we i no folem advaes blong ol rabis man, mo i no wokbaot long rod blong ol man blong mekem sin, hem i save haremgud. Man we i no sidaon wetem olgeta we oli gat fasin blong jikim man, hem i hapi. Be hem i glad tumas from loa blong Jeova, mo hem i stap ridimaot ol tok blong loa ya oltaem, long dei mo long naet.”
Blong man i rili hapi, hem i mas sakem advaes blong ol rabis man. Hem i no mas folem eksampel blong ol man blong mekem sin mo hem i no save joen wetem ol man blong jikim man we oli no stap ona long God. Mo tu, hem i no kampani wetem ol man we advaes mo fasin blong olgeta oli save pulum hem blong mekem nogud long saed blong seks, drag, mo ol narafala samting we i agensem loa blong God. Yes, trufala gladtaem i stanap long fasin blong lanem ol samting long saed blong trufala God, we nem blong hem Jeova, mo mekem ol loa blong hem long Baebol oli wok long laef blong hem.