Jeova i Yusum Tok Ya We i Olsem “Krangke” Tok Blong Sevem Ol Man We Oli Bilif
“God i waes gud, mo hem i mekem finis we ol man oli no save yusum waes blong olgeta nomo blong save hem. Hem i wantem yusum tok ya we yumi stap talemaot, we ol man oli stap talem se i krangke, blong i sevem olgeta we oli bilif long hem.”—1 KORIN 1:21.
1. ?Olsem wanem Jeova i yusum tok ya we i olsem “krangke” tok, mo olsem wanem yumi save se ol man blong wol ya wetem waes blong hem oli no save God?
?WANEM ya? ?Bambae God i yusum tok we i olsem krangke tok? !I no rili tru olsem! Be hem i save mekem olsem, hem i save yusum tok we ol man long wol oli luk olsem krangke tok nomo. Hem i mekem olsem blong hem i sevem ol man we oli save hem mo oli laekem hem. Long waes blong wol, ol man long wol oli no save kasem save long God. Jisas Kraes i mekem i klia taem hem i talem long prea blong hem se: “Papa, yu yu stret olgeta. Ol man blong wol ya oli no save yu, be mi mi save yu, mo olgeta ya we oli man blong mi, oli save we yu yu sanem mi mi kam.”—Jon 17:25.
2. ?I luk olsem rod blong Jeova mo rod blong wol ya oli sem mak olsem wanem, be tufala i rili sem mak?
2 Ol tok blong Jisas oli soemaot se ol rod blong Jeova oli defren long ol rod blong ol man long wol. Long lukluk blong man, i luk olsem we plan blong God mo plan blong wol ya tufala i sem mak. Maet i save luk olsem we God i stap blesem ol mak we wol i wantem kasem. Eksampel, Baebol i talem se God bambae i putumap wan stret gavman we bambae i givim pis, glad, long ol man mo i save givim plante samting long ol man long wol. (Aesea 9:6, 7; Matyu 6:10) Sem mak, wol i talemaot plan blong hem blong givim pis, plante samting, mo gudfala gavman tru long nyufala fasin blong wol. Be ol plan blong God mo ol plan blong wol oli no sem mak. Plan blong God i blong leftemap hem wan olsem Hae Rula blong heven mo wol. Hem bambae i mekem samting ya tru long gavman blong hem long heven we bambae i finisim olgeta gavman blong wol. (Daniel 2:44; Revelesen 4:11; 12:10) Taswe i no gat wan samting long saed blong God we i sem mak long plan blong wol ya. (Jon 18:36; 1 Jon 2:15-17) From samting ya Baebol i tokbaot tu kaen fasin waes—‘waes blong God’ mo ‘waes blong wol.’—1 Korin 1:20, 21.
Bigfala Poen Long Waes Blong Wol
3. ?Nating se waes blong wol i luk gud, from wanem promes blong olgeta blong stanemap nyufala fasin blong wol bambae i neva mekem ol man oli haremgud?
3 Olgeta we waes blong God i no lidim olgeta, oli luk waes blong wol olsem we i gud long olgeta. I gat ol flas tok blong ol man blong wol we oli waes long fasin blong toktok we i save pulum tingting blong man. Plante taosen haeskul oli stap tijim ol samting we ol man oli ting se oli bigfala waes blong man. Plante laebri oli fulap long ol waes blong ol man we oli kasem long plante handred yia finis. Be nating se i olsem, nyufala fasin blong wol we ol rula blong wol oli wantem stanemap bambae hem i wan gavman we ol man we oli no stretgud, oli gat sin, mo oli save ded, bambae oli rulum. Taswe, fasin ya blong wol ya bambae i no stretgud olgeta, bambae i mekem bakegen ol fasin we i stap foldaon long hem bifo mo neva bambae i givim ol samting we ol man oli nidim.—Rom 3:10-12; 5:12.
4. ?Nyufala wol we ol man oli wantem stanemap i stap aninit long paoa blong hu, mo wanem risal i save kamaot from?
4 Nyufala fasin blong wol we man i stap tingting blong putumap i no se ol man we oli gat ol slak fasin nomo oli rul long hem be rul ya tu i stap aninit long paoa blong ol rabis speret—yes, Devel Setan mo ol rabis enjel blong hem. Setan i satem tingting blong plante man blong oli no save bilif long “laet ya [we] i kamaot long gud nyus blong Jisas Kraes.” (2 Korin 4:3, 4; Efesas 6:12) From samting ya, wol i stap harem nogud long ol trabol nomo. Wol i stap trabol mo i stap spolem hem wan taem hem i stap traehad blong rulum hem wan, hem i no wantem God i givhan long hem mo hem i no tingbaot wil blong God. (Jeremaea 10:23; Jemes 3:15, 16) Taswe, olsem aposol Pol i talem, se “wol i no kasem save long God from waes blong hem.”—1 Korin 1:21, NW.
5. ?Waes blong wol i mestem wanem samting?
5 ?Wanem i stampa blong waes ya blong wol, olsem ol plan blong hem long saed blong nyufala fasin blong wol? Wol i no luksave samting we hem i no save ronwe long hem—hemia hae rul blong Jeova God. Wol i flas i no wantem luksave hae rul blong God. Wol i no wantem Jeova i stap long ol plan blong hem mo hem i dipen long prapa waes mo plan blong hem. (Lukluk Daniel 4:31-34; Jon 18:37.) Baebol i mekem i klia se ‘sipos yu wantem kam waes, fastaem yu yu mas fraet gud long Jeova.’ (Proveb 9:10; Ol Sam 111:10) Be, wol ya i no lanem nating stampa fasin blong waes. ?Sipos God i no givhan long hem, olsem wanem plan blong olgeta i save wokgud?—Ol Sam 127:1.
Wok Blong Talemaot Kingdom —?Hem i Krangke No i Waes?
6, 7. (a) ?Olgeta we waes blong God i stap lidim olgeta oli stap talemaot wanem, be wol i tingbaot olgeta olsem wanem? (b) ?Ol lida blong Krisendom oli stap talemaot waes blong hu, mo wanem i kamaot from?
6 Be, olgeta we oli save God oli stap soemaot waes blong God mo oli wantem se waes ya i lidim olgeta. Olsem Jisas i bin talem, olgeta oli stap talemaot “gud nyus ya se God i king blong olgeta man . . . long olgeta ples long wol.” (Matyu 24:14; 28:19, 20) ?Naoia wok blong prij i waes, taem wol i fulap long fasin jelas, fasin blong mekem doti long wol, fasin blong kam puaman, mo trabol we ol man oli kasem? Ol man we oli gat waes blong wol, oli luk wok blong talemaot Kingdom blong God olsem we i krangke nomo, i no save wok. Oli luk ol man blong talemaot Kingdom blong God olsem ol krangke man we oli stap blokem ol politik gavman blong oli no gohed blong kasem mak blong olgeta. Ol haeman blong Krisendom oli sapotem olgeta long tingting ya, oli stap prij folem waes blong wol ya mo oli no talemaot samting we ol man oli nidim blong save long saed blong nyufala wol blong God mo Kingdom gavman blong hem, we hemia nao stampa tijing blong Kraes.—Matyu 4:17; Mak 1:14, 15.
7 H. G. Wells, man blong raetem histri i poenemaot wok ya we ol haeman blong Krisendom oli no mekem. Hem i raetem se: “Tijing long saed blong Kingdom blong heven i wan impoten samting long Jisas, be long tijing mo fasin blong plante Kristin jyos hem i no impoten nating.” Be, sipos ol man blong laen naoia oli wantem kasem laef, fastaem oli mas harem mesej blong Kingdom blong God we i stanap finis, mo from samting ya i mas gat man i talemaot gud nyus blong Kingdom ya.—Rom 10:14, 15.
8. ?From wanem i waes blong talemaot gud nyus blong God tede, be wanem rod man i no save kasem blesing blong olwe from?
8 Wok blong talemaot gud nyus, hem i gudfala samting blong mekem tede. From we mesej blong Kingdom i givim trufala hop we i fulumap hat blong ol man wetem fasin glad long ol las dei ya taem ‘laef long wol ya i kam strong tumas.’ (2 Timote 3:1-5; Rom 12:12; Taetas 2:13) Laef long wol ya i olbaot mo i sot nomo, be laef long nyufala wol blong God bambae i blong olwe, long fasin glad, wetem plante samting, mo pis bambae i stap long wol ya. (Ol Sam 37:3, 4, 11) Olsem Jisas i talem, “?Sipos wan man i kasem olgeta samting blong wol, be i lusum laef blong hem, hem bambae i save winim wanem? Sipos laef blong man i kam nogud, bambae hem i no save givim wan samting olsem jenis blong laef blong hem, blong mekem laef blong hem i kam nyufala bakegen.” ?Sipos wan man i lusum jans blong hem blong laef long nyufala wol blong God, wol ya we i stap lus bambae i givim wanem long hem? Ol samting we wanwan man oli stap haremgud long hem naoia long wol oli blong nating nomo, mo bambae oli finis kwiktaem.—Matyu 16:26; Eklesiastis 1:14; Mak 10:29, 30.
9. (a) ?Man ya we i askem Jisas blong hem i save kam man blong hem afta nomo, Jisas i talem wanem long hem? (b) ?Olsem wanem ansa ya blong Jisas i stret long yumi?
9 Wan man we Jisas i askem blong hem i kam man blong hem i talem se: “Masta, plis yu letem mi mi go berem papa blong mi fastaem.” ?Jisas i givim wanem advaes long hem? Jisas i save we man ya i wantem livim impoten wok fastaem blong wet go kasem taem we papa mama blong hem tufala i ded, nao Jisas i ansa i se: “Yu letem ol man we oli no kasem laef oli go berem ol dedman blong olgeta. Yu go talemaot nyus ya we God i stap kam king blong ol man blong hem.” (Luk 9:59, 60) Olgeta we oli soemaot fasin waes blong obei long Kraes oli no save livim wok ya blong talemaot mesej blong Kingdom. Waes blong God i mekem olgeta oli luksave se wol ya mo ol rula blong hem bambae oli lus. (1 Korin 2:6; 1 Jon 2:17) Ol man we oli sapotem hae rul blong God oli save se trufala hop blong ol man i stap nomo long samting we God bambae i mekem mo fasin blong rul blong hem. (Sekaraea 9:10) Nao taem ol man we oli gat waes blong wol ya oli no bilif long Kingdom blong God mo oli no wantem gavman ya blong heven, ol man we waes blong God i lidim olgeta oli stap mekem ol samting we oli givim trufala blesing long ol narafala man, oli stap mekem olgeta oli rere blong kasem laef we i no save finis long nyufala wol blong Jeova we hem i promes long hem.—Jon 3:16; 2 Pita 3:13.
“I Olsem Krangke Tok Nomo Long Ol Man Blong Lus”
10. (a) ?Taem Sol man Tasis i tanem tingting blong hem, wanem wok hem i mekem, mo hem i tingbaot wok ya olsem wanem? (b) ?Ol man Gris bifo oli wanem kaen man, mo wanem tingting blong God long saed blong waes fasin blong olgeta?
10 Sol, man Tasis, we biaen i kam Pol we i aposol ya blong Jisas Kraes, hem i stap mekem wok ya blong sevem ol man. ?I stret blong ting se taem Jisas Kraes i tanem tingting blong Sol, Hem i givim wan krangke wok long hem? No gat Pol i no ting olsem. (Filipae 2:16) Long taem ya ol man oli tingbaot ol man Gris se oli waes moa long olgeta man long wol. Oli stap tokflas from ol bigfala save blong olgeta mo ol waes man blong olgeta. Nating se Pol i tok lanwis blong ol man Gris hem i no folem ol waes tok blong ol man Gris mo tijing blong olgeta. ?From wanem? From we long saed blong God, waes blong wol i olsem i krangke tok nomo long Hem.a Pol i lukaot waes blong God, we i pusum hem blong talemaot gud nyus long ol haos wanwan. Nambawan man ya blong prij, Jisas Kraes, i givim wan gudfala eksampel, mo i talem long Pol blong i mekem sem wok olsem hem.—Luk 4:43; Ol Wok 20:20, 21; 26:15-20; 1 Korin 9:16.
11. ?Pol i talem wanem long saed blong wok blong prij we hem i mekem mo waes blong wol?
11 Pol i tokbaot wok blong hem blong prij i se: “Kraes i sanem mi . . . blong mi talemaot gud nyus blong hem. Mo i no sanem mi blong mi talemaot nyus ya long ol waes tok blong man. From we sipos mi yusum waes tok olsem blong talemaot nyus ya, bambae tok ya i kilimdaon paoa blong ded blong Kraes long [pos, NW]. Tok blong talemaot ded blong Kraes long [pos, NW], hem i olsem krangke tok nomo long ol man blong lus. Be long yumi ya we God i stap sevem yumi, tok ya i olsem paoa blong God. Baebol i talem se ‘Waes blong ol man we oli gat waes bambae mi mekem i lus olgeta. Mo save blong ol man we oli gat save bambae mi mekem i nating nomo.’ ?Wehem ol man we oli gat waes? ?Wehem ol man we oli gat save? ?Wehem ol man we oli stap toktok oltaem long ol bisnes blong wol? !Oli no gat! God i mekem finis we ol waes tok blong man i kam olsem krangke tok nomo. God i waes gud, mo hem i mekem finis we ol man oli no save yusum waes blong olgeta nomo blong save hem. Hem i wantem yusum tok ya we yumi stap talemaot, we ol man oli stap talem se i krangke, blong i sevem olgeta we oli bilif long hem.”—1 Korin 1:17-21.
12. ?Jeova i yusum ‘krangke tok we oli talemaot’ blong mekem wanem, mo ol man we oli wantem “waes long heven” bambae oli mekem wanem?
12 I defren olgeta, ol man ya we wol i luk olgeta olsem we oli krangke, Jeova i stap yusum olgeta olsem ol man blong hem blong oli prij. Yes, long wok ya blong talemaot gud nyus we ol man blong prij oli stap talemaot olsem we i krangke tok nomo, God i stap sevem olgeta ya we oli bilif long hem. Jeova i mekem se ol man blong talemaot tok ya we i olsem “krangke” tok oli no save leftemap olgeta from, mo ol narafala man we oli harem gud nyus long olgeta ya oli no save leftemap olgeta from. Samting ya i kamaot olsem blong “i no gat wan man nating we bambae i save tok flas long fes blong God.” (1 Korin 1:28-31; 3:6, 7) Tru ya, man blong prij i mekem wan impoten wok, be mesej we hem i stap talemaot hemia nao samting we i wok blong sevem ol man we oli bilif long hem. Olgeta we oli wantem “waes long heven” oli no save tok nogud long mesej blong ol man blong prij from we man ya i olsem krangke man nomo mo hem i daon moa long ol narafala man, ol man oli stap ronem hem, mo from we hem i stap go long ol haos wanwan. Be, ol man we tingting blong olgeta i stap daon bambae oli respektem wan man blong talemaot Kingdom olsem we hem i wan man blong prij we Jeova God i sanem mo hem i kam long nem blong God. Bambae oli tokbaot impoten mesej ya we man blong prij i talem long maot blong hem mo long ol buk we oli prentem.—Jemes 3:17; 1 Tesalonaeka 2:13.
13. (a) ?Ol man Jyu mo ol man Gris oli tingbaot mesej blong ded blong Kraes long pos olsem wanem? (b) ?Wanem grup blong ol man we i no gat plante man i kamaot long hem blong oli kam man blong Jisas, mo from wanem?
13 Pol i stap gohed blong tokbaot rod ya blong God, hem i se: “Ol man Isrel oli wantem luk ol saen blong paoa blong God, mo ol man Gris oli wantem harem ol waes tok. Be yumi stap talemaot Kraes ya, we ol man oli nilim hem long [pos, NW]. Tok ya, ol man Isrel oli harem olsem we i no stret nating, nao oli trabol long hem, mo ol hiten man oli harem olsem we i krangke nomo. Be yumi evriwan ya we God i singaot yumi, yumi harem i narafala. Nating we fastaem yumi man Isrel no yumi hiten man, be tok ya i talem Kraes, we hem i paoa blong God mo hem i waes blong God tu. Fasin ya blong God we ol man oli luk se i krangke nomo, hem i waes moa, i winim fasin blong man. Mo fasin ya blong God we ol man oli luk se i no gat paoa, hem i gat paoa moa, i winim fasin blong man. Ol brata mo sista. Yufala i traem tingbaot. ?Taem we God i singaot yufala, yufala i wanem man? I no gat plante long yufala, we long fes blong ol man, yufala i waes man, no yufala i gat paoa, no yufala i haeman. Be God i jusumaot ol samting we ol man blong wol oli stap talem se oli krangke, blong mekem ol man we oli gat waes oli sem. Mo hem i jusumaot ol samting we ol man blong wol oli stap talem se oli no gat paoa, blong mekem ol man we oli gat paoa oli sem.”—1 Korin 1:22-27; lukluk Aesea 55:8, 9.
14. (a) ?Sipos ol man oli askem long ol Wetnes blong Jeova wanem haeskul oli stadi long hem, ol Wetnes oli talem wanem? (b) ?From wanem Pol i no wantem soem waes blong wol blong mekem ol man Gris oli glad long hem?
14 Taem Jisas i stap long wol, ol man Jyu oli askem hem long wan saen we i kam long heven. (Matyu 12:38, 39; 16:1) Be Jisas i no wantem givim wan saen long olgeta. Sem mak, ol Wetnes blong Jeova tede oli no mekem ol saen blong leftemap olgeta. Be, oli stap soem wok blong olgeta blong talemaot gud nyus, olsem we i stap long ol vas ya blong Baebol long Aesea 61:1, 2; Mak 13:10; mo Revelesen 22:17. Ol man Gris bifo oli stap lukaot waes, kasem haeskul blong lanem ol samting long wol ya. Pol i bin lanem ol waes blong wol taem hem i skul, be hem i no soemaot ol waes ya blong wantem mekem ol man Gris oli glad long hem. No gat. (Ol Wok 22:3) Hem i stap toktok mo hem i stap raet long ol tok we ol man Gris oli stap yusum long taem blong hem, be hem i no mekem long ol flas toktok blong ol man Gris we oli skulgud. Pol i talem long ol man Korin se: “Taem mi mi kam long yufala, mi kam blong talemaot plan ya blong God we fastaem i blong haed. Be mi no kam blong talemaot long ol flas tok mo long ol waes tok blong man, no gat. . . . Taem mi prij long yufala, mi talem ol tok blong mi, be mi no yusum ol waes tok blong man blong pulum yufala. Tok blong mi i blong soemaot paoa blong Tabu Speret nomo, blong bambae stampa blong bilif blong yufala i no stap long waes tok blong man, i stap long paoa blong God nomo.”—1 Korin 2:1-5.
15. ?Pita i talem wanem long saed blong ol man we oli stap laf long gud nyus, mo olsem wanem taem blong yumi i sem mak long taem blong Noa?
15 Naoia long ol las dei, ol man blong laf long gud nyus blong nyufala wol blong God we bambae i kam mo en blong wol ya oli kasem woning we aposol Pita i bin talem long saed blong taem blong Noa we “[God] i spolem wol ya we i stap bifo, long wora ya we i ron bigfala.” (2 Pita 3:3-7) ?Long taem ya we Noa i fesem bigfala trabol, hem i mekem wanem? Plante man oli tingbaot hem olsem wan man blong wokem sip nomo. Be Pita i talem se taem God i mekem Bigfala Wora i ron long wol ya bifo, “hem i sevem Noa we i wan prija blong talemaot stret fasin, wetem seven narafala man tu.” (2 Pita 2:5) Long waes blong wol we oli gat, ol man ya bifo long taem blong bigfala wora we i ron oli laf long mesej we Noa i stap talemaot mo oli stap talem se hem i krangke, tok blong hem i no tru, mo i no waes. Tede, ol man oli stap mekem i sem mak long ol trufala Kristin, from we Jisas i talem se ol man long taem blong yumi oli sem mak long ol man long taem blong Noa. Nating se ol man oli laf long yumi, wok blong talemaot gud nyus blong Kingdom i no toktok nomo. !Olsem wok blong prij we Noa i mekem, hem i save sevem man we i prij mo olgeta we oli lesin long hem!—Matyu 24:37-39; 1 Timote 4:16.
‘Kam Krangke Man Long Fes Blong Ol Man Blong Kam Waes Man Tru’
16. ?Wanem samting bambae i hapen long waes blong wol long Amageden, mo hu bambae i laef i go insaed long nyufala wol blong God?
16 I no longtaem long Amageden, Jeova God bambae i mekem se olgeta “waes blong ol man we oli gat waes” bambae oli lus olgeta. Bambae hem i sakem ol waes blong ol “man we oli gat save” we oli stap talemaot se nyufala fasin blong wol blong olgeta bambae i mekem laef blong ol man i kamgud moa. “Bigfala Dei blong God ya we i gat olgeta paoa” bambae i finisim ol gyaman tok, ol waes tok blong man, mo waes blong wol ya. (1 Korin 1:19; Revelesen 16:14-16) Olgeta we bambae oli stap laef tru long faet ya mo kasem laef long nyufala wol blong God hemia olgeta ya nomo we oli stap obei long tok ya we ol man blong wol oli stap tingbaot olsem krangke tok—yes, hemia gud nyus blong nambawan Kingdom blong Jeova.
17. ?Olsem wanem ol Wetnes blong Jeova oli kam olsem “krangke man,” mo ol man blong talemaot gud nyus blong God oli tingting strong blong mekem wanem?
17 Ol Wetnes blong Jeova, we tabu speret blong Jeova i stap lidim olgeta oli no sem blong talemaot tok ya we ol man blong wol oli tingbaot olsem krangke tok. Oli no traem blong kam waes long waes blong wol, be oli kam olsem ‘ol krangke man.’ ?Olsem wanem? Oli mekem olsem, taem oli stap mekem wok blong talemaot Kingdom blong oli save kam waes from, olsem Pol i raetem i se: “Man we i stap tingbaot se hem i wan waes man long fes blong ol man, hem i mas lukaot gud. I nogud we hem i stap gyaman long hem. I moa gud man olsem i kam wan krangke man long fes blong ol man, nao long fasin ya hem i save kam wan waes man tru.” (1 Korin 3:18-20) Ol man blong Jeova we oli man blong talemaot gud nyus, oli save se mesej blong olgeta i impoten tumas blong sevem ol man, mo bambae oli gohed blong talemaot oli no save stop go kasem en blong wol ya wetem waes blong hem long faet blong Amageden. I no longtaem, Jeova God bambae i leftemap hae rul blong hem long heven mo long wol mo bambae i givim laef we i no save finis long olgeta ya we oli bilif mo oli stap mekem ‘krangke tok ya we oli stap talemaot’ i wok long laef blong olgeta.
[Futnot]
a Nating se ol man Gris bifo oli gat ol waes fasin blong toktok mo ol fasin blong skelemgud ol tok, be ol tok we oli stap raetemdaon i soemaot se oli no trufala stampa blong hop. Tija J. R. S. Sterrett mo Samuel Angus tufala i poenemaot se: “Ol buk blong olgeta i soemaot fasin sore no fasin soasore long laef, fasin blong lav we i stap smoltaem, gyaman fasin blong hop, mo ol nogud fasin blong ded we i kasem ol man.”—Funk and Wagnalls New “Standard” Bible Dictionary, 1936, pej 313.
?Wanem Ansa Blong Yu?
◻ ?Wanem tufala fasin ya blong waes?
◻ ?Waes blong wol i mestem wanem?
◻ ?From wanem i waes blong mekem wok blong talemaot gud nyus tede?
◻ ?I no longtaem bambae wanem samting i hapen long waes blong wol?
◻ ?From wanem ol Wetnes blong Jeova oli no sem blong talemaot tok ya we ol man blong wol oli stap tingbaot olsem krangke tok?
[Tok Blong Pija Long Pej 23]
Ol man Gris oli stap lukaot waes blong wol mo oli tingbaot wok blong prij we Pol i stap mekem olsem we i krangke