Wan Kwestin

?Olsem wanem, Matyu 28:17 i minim se sam aposol blong Jisas oli no bin bilif go kasem taem we hem i laef bakegen long ded mo hem i soemaot hem wan long olgeta?

Nogat, yumi no mas tingting olsem from Matyu 28:​16, 17 we yumi ridim se: “Nao ol leven man blong Jisas oli go long Galili, long wan bigfala hil we Jisas i bin talemaot long olgeta bifo. Nao taem olgeta oli luk Jisas, oli nildaon long hem, oli ona long hem. Be sam long olgeta, bilif blong olgeta i no strong.”

Yes, bifo Jisas i bin traem blong givhan long ol disaepol blong luksave “we bambae hem i mas go long Jerusalem, mo ol elda blong ol man Isrel, wetem ol jif pris mo ol tija blong Loa bambae oli mekem hem i harem nogud long plante samting. Bambae olgeta oli kilim hem i ded, mo biaen long tri dei, bambae God i mekem hem i laef bakegen.” (Matyu 16:21) Be tingting blong ol disaepol blong hem oli foldaon mo i fasfas long taem we oli holem Jisas mo oli mekem i nogud long hem. I wan sapraes taem hem i laef bakegen. Mo taem hem i laef bakegen mo i tekem bodi olsem yumi, fastaem samfala “oli glad tumas, be oli sapraes tumas tu, nao from samting ya oli no save bilif gud yet.” (Luk 24:​36-41) Fasin we hem i soemaot long olgeta taem hem i laef bakegen, i givhan long ol man blong hem we bifo oli stap oltaem wetem hem blong savegud se hem i girap i laef bakegen. Samting ya i mekem se Tomas tu i bilif se Jisas i laef bakegen finis long ded.​—Jon 20:​24-29.

Afta long samting ya ol 11 aposol blong Jisas we oli gat strong bilif oli “go long Galili.” (Matyu 28:16; Jon 21:1) Taem oli stap long ples ya, Jisas “i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem.” (1 Korin 15:6) Long taem ya nao we Matyu 28:17 i talem se “sam long olgeta, bilif blong olgeta i no strong.” Olsemia nao olgeta we oli no bilif oli bin stap long medel blong ol 500 handred man blong Jisas.

Yumi save intres long samting ya taem yumi tingbaot tok blong C. T. Russell, faswan presiden blong Watch Tower Sosaeti:

“Ol man ya we oli no bilif, yumi no save talem se hemia sam long ol leven aposol, from we ol leven aposol ya oli haremgud tumas, oli bilif strong, mo oli soemaot samting ya finis. Yumi save talem se, olgeta we oli no bilif, hemia sam long ol ‘memba blong faef handred man’ we oli stap joen insaed long wan miting, mo olgeta ya oli no bin joen wetem Jisas nating afta we hem i laef bakegen. Mo sam long olgeta, yumi save talem se ating, olgeta ya, bilif blong olgeta i no strong, i no olsem ol aposol mo ol spesel fren we Jisas i bin toktok wetem olgeta afta we hem i laef bakegen long ded. Long tok ya se ‘sam long olgeta, bilif blong olgeta i no strong’ i wan pruf blong soem trutok blong man we i raetem. Mo tu samting ya i soemaot long yumi se, ol man blong Masta oli no bitim mak long fasin blong bilif kwiktaem, be tu oli rere blong kasem mo skelemgud olgeta pruf we oli kamaot, mo ol tingting we i kam afta. Strong wok blong olgeta we oli bilif mo oli gat fasin blong no tingbaot olgeta nomo, oli givim bigfala pruf long yumi, oli soemaot trufala fasin blong olgeta blong tingbaot laef bakegen blong Masta blong yumi, we olgeta mo yumi tu yumi tingbaot hem olsem wan bigfala doa blong bilif long hem. Sipos Kraes i no bin girap blong i laef bakegen, bambae bilif blong yumi i blong nating nomo mo bambae yumi stap yet long ol sin blong yumi.​—1 Kor. 15:17.”​—Zion’s Watch Tower and Herald of Christ’s Presence, Mei 1, 1901, pej 152.

Yumi save makem rod we Matyu i yusum blong talem poen ya we i givim sam pruf long yumi se ol store blong Baebol yumi save trastem olgeta. Sipos wan man i mekem wan gyaman store, hem i save mekem sam samting blong talemaot sam tok we i save mekem man i save bilif long store blong hem. Hem i save se sipos hem i no ademap plante smol samting long store blong hem bambae ol man oli no save bilif long store ya. ?Be olsem wanem long Matyu?

Hem i no mekem samting ya blong talemaot ol tok blong eksplenem prapa tingting blong hem se “sam long olgeta, bilif blong olgeta i no strong.” Long saed ya, Mak, Luk, mo Jon i no talem wan samting nating, taswe ol tok blong Matyu oli no go long ol leven aposol, we hem i wan long olgeta. Be, Matyu i mekem wan smol tok we hem i no bin givim wan klia pruf afta. Fotin yia biaen, aposol Pol i raetem faswan buk blong Korin. I klia long ol tok we hem i raetem long 1 Korin 15:​6, yumi kasem save se olgeta we oli no gat bilif, hemia i no olgeta aposol be ol disaepol long Galili we Jisas i no bin soemaot hem yet long olgeta. Olsem nao, tok blong Matyu i tru se “sam long olgeta, bilif blong olgeta i no strong.” Hem i stret blong talem se man we i raetem i givimaot ol tru tok long saed ya we hem i no traem blong eksplenem evri laswan smosmol tok blong hem.