Stap Glad Long Bigfala Man We i Wokem Yumi

“Yumi ol man Isrel, yumi glad long bigfala Man we i Wokem yumi. Ol pikinini boe blong Saeon​—oli glad long King blong olgeta.”​—OL SAM 149:2, NW.

1. ?Nating we oli singaot se “fasin fri i kamaot,” wanem samting oli stap kamaot long wol?

WOL tede i kasem bigfala trabol olsem “woman we i gat bel i jes harem fastaem we bak blong hem i soa blong i bonem pikinini.” Hemia nao tok we Jisas i yusum long profet tok blong hem we i tokbaot saen we i soemaot taem “we fasin ya blong wol i kasem en blong hem,” (NW) taem blong bigbigfala trabol ya i stat wetem faswan bigfala faet blong wol long 1914. (Matyu 24:​3-8) Plante man blong politik oli ting se fyuja bambae i nogud nomo. Nating se long Is Yurop, oli singaot se “fasin fri i kamaot,” wan man we i bin presiden long ples ya i tokbaot ol trabol we oli stap hapen long wol tede se: “Namba blong ol man i stap go antap bigwan, i gat ol hol long blangket ya blong wol we i stap blokem hot blong san, mekem se wol i stap kam hot moa, AIDS, nogud fasin blong ol teroris mo bigfala mak we i seraotem ol rij kantri long ol pua kantri i stap kam bigwan moa oltaem, fasin hanggri, ol gudfala samting blong wol oli stap lus, ol man oli stap folem fasin mo tingting we oli luk long televisin mo oli fraet we bambae faet i kamaot long kantri blong olgeta​—ol samting ya, oli joen wetem plante taosen narafala trabol, mo oli save spolem evri man long wol.” I no gat man we i gat naf paoa blong tekemaot olgeta nogud trabol ya.​—Jeremaea 10:23.

2. ?Hu i save stretem ol trabol blong ol man long wol, mo wanem samting hem i mekem finis?

² Be, yumi save glad, se Bigfala Man we i Wokem yumi i gat paoa blong stretem. Long profet tok blong Jisas, “fasin ya blong wol i kasem en blong hem” (NW) i joen wetem taem we hem i “stap finis” (NW) olsem King we yumi no save luk hem wetem prapa ae blong yumi. (Matyu 24:​3, 37-39) Blong mekem “nyufala heven,” Jeova i putum Jisas long jea blong king olsem King Mesaea, ol profet tok we oli kamaot oli soem se samting ya i bin hapen finis long heven long 1914.a (2 Pita 3:​13, NW) Jisas i kam olsem man blong rul we i joengud wetem Hae Masta Jeova long Hae Rul blong hem, hem i kasem raet blong jajem olgeta nesen mo blong seremaot olgeta we tingting blong olgeta i stap daon, olsem ol sipsip, long ol stronghed man we oli olsem nani. Ol “nani” we oli no save obei long hem, i gat promes i stap finis long olgeta se oli mas “lus blong olwe” (NW) mo “ol sipsip” oli go blong kasem laef we i no save finis long wol ya aninit long rul blong Kingdom.​—Matyu 25:​31-34, 46.

3. ?From wanem ol tru Kristin oli save glad?

³ Bigfala hif blong man we oli olsem ol sipsip we oli stap obei oltaem, naoia oli joen wetem smol grup blong Israel long saed blong speret we oli stap yet long wol. Mo bigfala hif blong man ya oli gat ol samting we i mekem olgeta oli glad long Jeova, King blong olwe, olsem naoia hem i stap mekem bigfala plan blong hem i go kasem mak blong hem tru long Kingdom blong Pikinini blong hem. Oli save talem se: “Yes, bambae mi mi harem gud tumas long Jeova. Bambae sol blong mi i glad tumas from God blong mi. Hem i putum ol klos blong fasin sef oli stap long mi. . . . Olsem graon i mekem ol gras oli gru, olsem wan garen we oli planem sid long hem oli gru, long sem fasin Hae Masta Jeova bambae i mekem stret fasin i kam plante mo blong leftemap nem blong hem long fored blong olgeta nesen.” (Aesea 61:​10, 11) Olgeta ya we oli stap “kam plante” i soemaot se sam milyan man oli bin kamaot long olgeta nesen mo oli singsing blong presem Jeova.

‘Mekem i Spid Moa’

4, 5. (a) ?Olsem wanem Baebol i tokbaot ol man blong God we oli stap hivap tugeta? (b) ?Wanem gudfala namba we i kam antap we yumi luk long 1992 sevis yia?

⁴ Fasin blong hivimap ol man i stap gohed moa taem en blong fasin blong Setan i stap kam kolosap. Bigfala Man we i Wokem yumi i talem se: “Long saed blong ol man blong yu, bambae olgeta evriwan oli stret man . . . , gru blong ol samting we mi mi planem, wok we han blong mi i mekem, oli blong mekem mi mi luk naes. Man ya we i smolwan bambae i kam taosen man, mo hemia we i olsem nating nomo bambae i kam wan strongfala nesen. Mi, Jeova, mi mekem wok ya i spid moa long stret taem blong hem.” (Aesea 60:​21, 22) Long pej 12 kasem pej 15 long magasin ya i tokbaot ripot long Wok Blong Ol Wetnes Blong Jeova Long 1992, i soemaot se wok ya i stap spid moa.

⁵ Gudfala samting long ripot ya se nyufala namba blong 4,472,787 man blong talemaot Kingdom, i go antap long 193,967​—4.5 % bitim las yia. Ol 301,002 man mo woman we oli tekem baptaes long yia 1992 i soemaot se plante man oli wantem trutok blong Baebol. !Yumi glad tumas se long “dei ya we i tudak tumas, . . . i gat wan kaen pipol we namba blong olgeta i bigwan mo oli strong,” we oli olsem wan bigfala hif blong lokis, mo oli stap gohed blong talemaot Kingdom “gogo i finisim olgeta ples long wol”! (Joel 2:​2, 25; Ol Wok 1:8) I stat long kol ples long Alaska​—long ples ya we plen blong Sosaeti i mekem moa long 50 visit long ol teritori we i gat plante sno​—kasem long ol drae ples blong Mali mo Burkina Faso mo ol grup blong ol aelan blong Maekronesia, ol man blong Jeova oli stap saen i go olsem “wan laet long olgeta nesen, blong rod [blong Jeova] blong sevem man i save kasem olgeta ples long wol.”​—Aesea 49:6.

6, 7. ?Wanem jenis i kamaot long ol yia we oli jes pas, mo ol Wetnes blong Jeova oli folem olsem wanem?

⁶ Jeova i olsem wan sefples blong olgeta mo hem i olsem wan strongfala haos we i save protektem mo givim olgeta samting we ol man blong hem oli nidim. Long plante ples long wol, ol Wetnes blong Jeova oli mas stanap strong long plante yia from ol man oli stap mekem i nogud long olgeta mo oli stap ronem olgeta. (Ol Sam 37:​39, 40; 61:​3, 4) Be i no longtaem, samting we i bin hapen long 21 ples, i olsem wan merikel, oli bin tekemaot ol tabu mo ol loa we oli blokem ol Wetnes mekem se ol man blong God oli fri blong talemaot se Bigfala Man we i Wokem yumi i putumap finis Kraes olsem King antap long wol.​—Ol Sam 2:​6-12.

⁷ ?Olsem wanem, ol man blong Jeova oli stap yusumgud nyufala fasin fri we oli kasem? Makemgud ol namba we oli go antap long ripot ya, long ol kantri olsem Bulgaria, Romania, mo ol ples we Soviet Union i lukaot bifo long Is Yurop mo long Angola, Benin, mo Mosambik long Afrika. Long Sair tu, namba blong olgeta i stap kam antap moa. Ol brata blong yumi we oli fri finis oli givim ansa wetem glad we i stap long hat blong olgeta se: “Yumi talem tangkyu long [Jeova, NW] from we hem i gud tumas. . . . Hem nomo i stap mekem ol bigbigfala merikel. Oltaem bambae hem i [kaengud, NW] long yumi, gogo i no save finis.” (Ol Sam 136:​1, 4) Oli soemaot fasin tangkyu ya taem oli stap gohed strong long wok blong hivimap ol man we oli olsem sipsip oli go long saed blong Kingdom.

8. ?Olsem wanem ol nyufala man blong presem Jeova oli “flae i kam olsem klaod” long Is Yurop? long Afrika?

⁸ Long hot taem we i jes pas, long Yurop, ol man blong Jeova oli mekem ol asembli long ol ples we ol Komunis oli rul long hem fastaem, mo plante man oli kam joen. Mo samting we i nambawan tumas blong luk hemia namba blong ol man we oli tekem baptaes, olsem ripot long magasin ya i soemaot. I sem mak long Togo, long Afrika, gavman i bin tekemaot tabu we i blokem wok blong ol Wetnes blong Jeova long Desemba 10, 1991. Wan manis biaen, oli mekem wan nasnal asembli. Taem yumi skelem wetem 6,443 pablisa we oli stap joen long wok blong prij evri manis, namba blong olgeta we oli kam joen long ol asembli ya i go antap kasem 25,467, wetem 556 man we oli tekem baptaes​—8.6% long namba blong ol pablisa. Olsem Aesea 60:8 i talem, ol nyufala man blong presem Jeova “oli stap flae i kam olsem klaod, mo olsem ol sotleg we oli stap go long haos blong olgeta” long ol kongregesen blong ol man blong Jeova.

9. ?Wanem samting we oli givimaot we i mekem ol Kristin long ol kantri we oli jes fri oli save ‘kakae mo oli fulap’?

⁹ Olgeta we oli hanggri from kakae long saed blong speret long Is Yurop mo Afrika naoia oli haremgud. Ol faktri blong Watch Tower Sosaeti long Jemani, Itali, mo Saot Afrika, plante taem oli bin sanem ol trak we oli fulap gud wetem ol buk, magasin mo buklet long plante lanwis, long ol kantri we oli hanggri long saed blong speret. Fastaem, plante Wetnes oli mas mekem moa fotokopi blong gat i naf magasin long olgeta, be naoia oli kasem plante kakae long saed blong speret. Oli glad blong joen long profet tok ya we i kamaot se: “Bambae yu yu kakae, yu kakae mo bambae yu fulap gud, mo bambae yu yu presem nem blong Jeova, God blong yu, we hem i bin mekem ol nambawan samting long yu.”​—Joel 2:26.

Lukaotgud Long Wok We i Stap Kam Bigwan

10. ?Taem yumi luk bigfala namba blong man we i kam long Memoriol, olgeta ya we oli intres oli kasem wanem invitesen?

¹⁰ Yumi glad tumas long namba blong ol man raonabaot long wol we oli kam joen long Memoriol long ded blong Jisas, hemia 11,431,171, hem i go antap long 781,013, no 7.3% bitim las yia. !Welkam, yufala ol nyuwan we i jes kam! !Samting ya i gud tumas sipos olgeta nyuwan ya we oli intres oli glad blong stadi Baebol wetem ol Wetnes blong Jeova! (Lukluk Aesea 48:17.) Ripot Blong Sevis Yia i soemaot se 4,278,086 long olgeta stadi ya oli bin mekem long olgeta manis wanwan, wan gudfala 8.4% we i go antap. Be plante moa oli save haremgud long help ya. Ol Wetnes blong Jeova oli glad blong go plante taem blong visitim olgeta we oli intres blong mekem wan fri Baebol stadi long haos blong olgeta, nao oli givhan long olgeta ya blong stanap strong mo wokbaot long rod we i go long laef we i no save finis. (Jon 3:​16, 36) ?From wanem yu no wantem askem blong stadi olsem? !Mo tingbaot, bambae oli welkamem yu gud long Haos Kingdom!​—Ol Sam 122:1; Rom 15:7.

11, 12. (a) ?Wanem trabol we i stap yet long samfala ples? (b) ?Long wanem rod ol man long ol ples we oli rij mo ol ples we oli pua oli kasem ol samting i “sem mak” nomo?

¹¹ Ol kongregesen we oli gat nambawan Haos Kingdom oli kasem plante blesing. Be i defren long ol ples blong ol Wetnes we oli fasgud long God oli stap stanap strong plante yia finis long plante hadtaem, oli stap mekem miting long smol grup long ples we i haed. Long sam ples olsem, naoia oli fri be oli no gat plante Haos Kingdom. Hemia wan eksampel, long wan kantri long Afrika, 93 kongregesen blong man oli stap kam joen long trifala Haos Kingdom nomo. Ale plante taem oli mekem miting long ol bigbigfala flat ples. Wan kongregesen we i gat 150 pablisa, namba blong evriwan we oli stap kam oltaem long miting i save go antap kasem 450.

¹² Long Is Yurop, plante taem i hadwok blong pemaot wan pis graon no blong wokem haos, be sam samting i bin gohed gud. Oli dediketem branj ya blong Polan long Novemba 28, 1992. Plante presen mane we oli bin givim long wok blong ol Wetnes blong Jeova raonabaot long wol oli bin yusum blong bildim ol Haos Kingdom mo ol narafala samting we oli save mekem. Taswe, plante brata oli mekem i “sem mak” taem oli givim “plante samting” we oli gat blong givhan long ol kongregesen we oli gat nid long saed blong speret, mo oli stap long ol kantri we oli sot long plante samting.​—2 Korin 8:​13, 14.

!Wan Taosen Milian Haoa!

13. ?Hamas haoa oli spenem long wok blong prij mo blong tijim ol man long yia 1992, mo namba ya i soemaot fasin traehad blong hu?

¹³ ?Yu save mekem wanem wetem wan taosen milian haoa? Olgeta we bambae oli kasem laef we i no save finis oli save mekem plante haoa olsem, mo ating bambae oli mekem plante moa haoa long wok blong Jeova we i mekem olgeta oli haremgud. !Be tingbaot ol haoa ya we oli kamaot long wan yia nomo! Hemia nao samting we ol man blong Jeova oli mekem long yia 1992. Taem ol man blong talemaot Kingdom oli putum ripot blong olgeta i kam wanples, yumi faenem wan nyufala namba blong 1,024,910,434 haoa, we oli spenem long nambawan rod blong spenem haoa olsem​—oli stap presem Bigfala Man we i Wokem yumi, ‘oli stap tij . . . long fes blong ol man, mo long ol haos wanwan.’ (Ol Wok 20:20, NW) Long medel namba, evri manis 4,289,865 Wetnes oli stap givim ripot blong olgeta. Ol ripot ya oli blong ol man we oli gat ol defren kaen posisen long ol grup blong man. Sam oli no gat tumas taem blong givhan long wok blong Kingdom. Olgeta ya olsem ol hed blong famle, we oli mas wok blong givhan long famle blong olgeta, olgeta we oli olfala, mo plante we oli gat trabol from sik, i sem mak long ol pikinini we oli stap yet long skul. Yes, ripot we olgeta wanwan oli mekem i soemaot lav we oli gat long Jeova.​—Skelem wetem Luk 21:​2-4.

14. ?Olsem wanem ol yangfala oli “tingbaot Bigfala Man we i wokem” olgeta?

¹⁴ Wan bigfala grup blong ol yangfala naoia oli stap gruap long wok blong Jeova, mo yumi glad blong luk se bighaf blong olgeta ya oli stap folem tok blong Solomon long Eklesiastis 12:1 we i talem se: “Yu mas tingbaot Bigfala Man we i wokem yu. Yu mas tingbaot hem taem yu yu yang yet.” Oli stadigud long skul, mo tu oli kasem wan gudfala tijing long saed blong speret from ol papa mama blong olgeta we oli fasgud long God. Long ol asembli we oli pas i no longtaem, yumi glad blong luk bigfala namba blong ol yangfala we oli bin stanap blong givim laef blong olgeta mo tekem baptaes. I wan bigfala glad tu blong save se plante oli lanem sam kaen fasin blong mekem bisnes no blong gat gudhan blong mekem wan wok, blong oli save mekem plante samting blong kam paenia taem oli kamaot long skul. Taswe, oli save lukaot long olgeta nomo, olsem aposol Pol we i stap somap haos tapolen.​—Ol Wok 18:​1-4.

15, 16. ?Olsem wanem ol paenia mo ol narafala we oli wok fultaem oli givim olgeta blong mekem wok blong Kingdom i gohed moa, mo wanem blesing we sam long olgeta oli glad long hem?

¹⁵ !Ol paenia mo olgeta we oli wok fultaem long wok blong Jeova oli givhan bigwan blong mekem wok blong Kingdom i save gohed moa! Namba blong ol paenia i go antap kasem 931,521 long las yia. Taem we oli prij evri dei long ol haos wanwan mo taem oli mekem Baebol stadi wetem ol man long haos blong olgeta, oli kamgud moa long fasin blong yusum Baebol. Antap moa, plante oli kam naf blong joen long tu wik Skul Blong Paenia, we i givhan long olgeta blong gat gudhan blong mekem wok ya mo stap glad long hem, i bitim bifo.

¹⁶ Wanwan long olgeta ya we oli fasgud long God, oli stret nomo long tok we i stap long buk blong Aesea 50:4 we i talem se: “Hae Masta Jeova hem wan i givim tang long mi, olsem tang blong ol man we hem i tijim, blong mi save talem wan tok blong ansa long man we i slak.” I gat plante man long wol we oli taed long ol samting we oli stap kamaot raonabaot long olgeta, oli haremgud long ol tok we ol paenia oli talemaot.​—Skelem wetem Proveb 15:23; Esikel 9:4.

Bigfala Program Blong Wokem Haos

17. ?Wanem i joen wetem wok long saed blong speret we i givim wetnes long ol yia we oli jes pas?

¹⁷ Long olgeta ples long wol ol Wetnes blong Jeova oli kam rij moa long saed blong speret, samting ya i mekem se oli nidim moa haos blong wokem. Oli mas mekem ol haos blong prentem ol buk oli kam bigwan moa, ol ofis, ol haos Betel mo oli mas bildimap ol Haos Kingdom mo Haos Asembli. Ale long rod ya ol Wetnes blong Jeova oli kam olsem ol man blong wokem haos. Sem samting i kamtru long taem blong King Solomon. Solomon i wokem haos prea blong wosip long Jeova stret long “plan blong hem . . . we God i bin soemaot long hem,” Jeova i bin givim plan ya long papa blong hem, King Deved. (1 Kronikel 28:​11, 12) Taswe, Solomon i no givhan nomo long olgeta we oli lesin long hem long ol gudfala waes tok, be hem i lidim olgeta blong mekem nambawan haos we i bitim ol narafala haos long wol.​—1 King 6:1; 9:​15, 17-19.

18, 19. (a) ?Wanem wok we ogenaesesen blong Jeova i stap karemaot we i gohed gud mo i stap gohed kwik? (b) ?Olsem wanem speret blong Jeova i bin wok long fasin blong bildimap long saed blong bodi mo long saed blong speret?

¹⁸ Tede ol Wetnes blong Jeova oli no bildim haos we God i givim spesel plan blong hem, be oli gat speret blong God. I sem mak long taem blong ol man Isrel, samting ya i pusum olgeta blong wokem haos long fasin we olgeta man long wol oli sapraes long hem taem oli luk. (Sekaraea 4:6) Taem i sot. Oli nidim ol Haos Kingdom mo ol narafala haos bakegen kwiktaem. Long sam kantri oli bildim plante Haos Kingdom we oli wokem long tu dei nomo. Hemia wan eksampel, long ol 10 yia we oli jes pas, ripot blong Kanada i soemaot se oli wokem 306 haos, wanwan long ol haos ya we oli wokem i no bitim tu dei. From wok blong Jeova i stap gru kwiktaem long olgeta ples long wol, oli bin bildim no mekem plan blong bildim, no joenem bakegen 43 branj. Antap moa, long Bruklin oli wokem wan bigfala haos we i gat 30 store we i gat ples blong slip we i naf blong kolosap wan milyan brata mo sista we oli wok long Betel, mo naoia kolosap oli finisim hem. Mo tu long Nyu Yok, long Pateson oli stap bildim wan bigfala haos olsem bigfala ples blong tijim Baebol, we haos ya i bigwan bitim ol narafala haos we Watch Tower Sosaeti i lidim.

¹⁹ Ol wok ya we oli stap gohed gud tumas oli soemaot ol gudfala fasin blong wok we ol man blong wokem haos blong ol kampani raonabaot long wol oli sapraes tumas from. ?From wanem? From bigfala wok we ol Wetnes blong Jeova oli stap mekem blong wokem haos. Speret blong Jeova i pusum olgeta i no blong givim ol samting long saed blong bodi nomo be tu wetem fulhat blong olgeta, oli givim taem blong olgeta mo paoa blong olgeta. Ol ples we wok blong bildim i stap gohed long hem, fulap man oli stap we oli gat gudhan blong wok, mo oli givim olgeta fulwan blong mekem wok ya. I no gat man we i no wantem wok, mo i no gat man we i les blong mekem wok ya. Speret blong Jeova i stap pusum olgeta, i sem mak olsem i bin pusum ol man blong wokem haos tapolen long taem blong Moses mo olgeta we oli bin wokem haos prea long taem blong Solomon. Ol man we oli wantem mekem wok ya oli mas strong long saed blong speret.​—Skelem wetem Eksodas 35:​30-35; 36:​1-3; 39:​42, 43; 1 King 6:​11-14.

20. (a) ?Wok blong talemaot gud nyus bambae i go kasem wanem mak? (b) ?Wanem nambawan blesing we i stap rere long ol man blong Jeova?

²⁰ Solomon i gohed long plan blong wokem ol haos afta we hem i finisim haos prea. (2 Kronikel 8:​1-6) ?Wok blong prij bambae i gohed kasem wetaem​—mo tu olsem wanem long wok blong bildimap ol Haos Kingdom mo narafala haos? Yumi no save. Be yumi save, se taem gud nyus long Kingdom i kasem olgeta ples we Jeova i wantem, ale “bigfala trabol,” bambae i kam. (Matyu 24:​14, 21) Long wan wol we i no moa gat ol griri man, Jeova i stanemap “nyufala heven mo nyufala wol” we bambae i karem bigfala blesing long ol man. !I gud yumi ‘harem gud, yumi glad blong olwe from ol samting we God i stap wokem,’ yumi presem God we i Wokem olgeta samting!​—Aesea 65:​17-19, 21, 25.

[Futnot]

?Yu Yu Ansa Olsem Wanem?

◻ ?From wanem yumi mas glad long Bigfala Man we i Wokem yumi?

◻ ?Wanem i kam antap bigwan long ripot blong sevis yia long 1992?

◻ ?Long plante kantri we ol Wetnes blong Jeova oli no fri, wanem nambawan blesing oli bin talemaot?

◻ ?Olsem wanem ol yangfala mo ol paenia oli givim taem blong mekem se namba blong ol man i kam antap long ogenaesesen blong Jeova?

◻ ?Olsem wanem ol man blong Jeova oli bin bisi long wok blong bildimap long saed blong bodi mo long saed blong speret?

[Bokis blong pija long pej 17]

Long las yia i gat moa long wan bilion haoa we oli spenem long wok blong prij mo blong tijim ol man

[Ripot long pej 12-15]

1992 SERVICE YEAR REPORT OF JEHOVAH’S WITNESSES WORLDWIDE

(Lukluk niuspepa)

[Tok blong pija long pej 10]

Olgeta handred taosen man we oli tekem baptaes long las yia oli soemaot bigfala blesing we Jeova i givim long wok blong prij mo tijim man

[Tok blong pija long pej 16]

Bigfala namba blong ol yangfala oli stap ‘tingbaot Bigfala Man we i Wokem’ olgeta