Wan Kwestin

?Wan Kristin i mas mekem wanem sipos hem i no faenem wan stret man no woman blong mared wetem?

Nating se yumi ol Kristin man we yumi wok strong long wok blong God, be yumi save harem nogud yet from sam samting we yumi wantem tumas be samting ya i no kamtru olsem we yumi wantem. Ol filing blong yumi oli save kamaot olsem tok we i stap long Proveb 13:​12, we i talem se: “Olgeta samting we yumi stap plan from se bambae oli kamtru be oli no kamtru kwik, oli stap mekem hat i sik.” Hemia nao samting we samfala Kristin oli stap harem taem oli stap tingting blong mared be oli no faenem wan stret fren. Hemia i tru moa long olgeta we aposol Pol i tokbaot se “oltaem man i wantem woman tumas.”​—1 Korin 7:9.

Jeova i putum tingting ya insaed long man se man i laekem wan woman we i save givhan long hem mo woman i laekem wan man we i save givhan long hem. Taswe, yumi no sapraes se plante Kristin we oli no mared oli save gat ol filing olsem. (Jenesis 2:18) Ol filing olsem we oli stret nomo oli save kamaot plante long ol ples we kastom i strong long saed blong mared (no i gat wan stret yia we man i mas mared long hem) no taem ol Kristin we oli no mared oli stap long medel blong kongregesen we i gat plante mared we oli glad. Be, i nogud blong letem fasin ya blong tingting tumas i stap longtaem. ?Taswe ol Kristin we oli stap long laef olsem, oli mas mekem wanem blong no letem tingting ya i winim olgeta?

I no isi blong winim traem ya, mo ol narafala man oli no mas mekem olsem we man we i wari long bisnes ya i stap gyaman no se bisnes ya i wan smol samting nomo. Bigfala samting blong winim fasin ya i dipen long samting we man we i no mared i save mekem.

Yumi faenem wan rod long rul ya blong Baebol we i save givhan, se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Man ya we i no mared, Jisas Kraes, i talem tok ya, mo hem i nafgud blong tokbaot bisnes ya. Fasin blong tingbaot ol narafala we i save pusum yumi blong mekem wan samting blong givhan long olgeta, hem i wan nambawan rod blong givhan long wanwan long yumi blong winim ol filing blong plan we yumi wantem se i kamtru be i no kamtru kwik. ?Samting ya i minim wanem long saed blong wan Kristin we i no mared?

Mekem sam wok blong soemaot kaengud fasin long famle blong yu mo long ol narafala we i stap insaed long kongregesen, mo gohed moa long minista wok blong yu. Advaes ya i no rod blong talem nomo se, ‘Stap bisi, mo bambae yu fogetem tingting ya blong wantem mared.’ No gat. Taem yu joen fulwan long wok ya blong ol Kristin, yu save faenem se ‘yu strong long hat blong yu, . . . yu gat paoa long prapa tingting blong yu’ (NW) mo yu save yusum laef blong yu naoia long wan gudfala rod.​—1 Korin 7:37.

Samfala we oli wantem tumas blong mared, oli letem tingting ya i kam fulap long olgeta. Oli mekem sam samting moa long hemia, olsem fasin blong raet from wan fren long ol nyuspepa. Be, i gud tumas blong mekem moa ol gudfala samting we i save karem gudfala frut long taem we yu no mared.​—Plis luk long haf blong Wajtaoa Novemba 15, 1987 (Engglis mo Franis) long haf ya we i talem se “Oli No Mared Be Oli Joen Fulwan Blong Mekem Wok Blong God” mo “Blong Stap We Yu No Mared​—Wan Rod We Yu Save Kasem Plante Samting Blong Laef,” mo long Wajtaoa blong Mei 15, 1992 long haf we i talem se “?Mared i Rod Ya Nomo Blong Stap Glad?”

Prea long Jeova blong askem hem blong givhan long yu blong stanap strong long taem ya we yu no mared. (Filipae 4:​6, 7, 13) Plante Kristin we oli no mared oli luk se i gud blong yusum ol taem we oli gat blong stadi mo tingting dip long Tok blong God mo blong joen oltaem long ol Kristin miting, oli haremgud mo ‘tingting blong olgeta i gat spel,’ olsem Jisas i promes long ol man blong hem. (Matyu 11:​28-30) Samting ya i givhan long olgeta blong kam moa gud long saed blong speret, blong oli save kam ol gudfala hasban no waef, sipos oli save faenem wan stret fren blong mared wetem.

Yu no mas foget se Jeova i save long laef blong man we i stap mekem wok blong hem be i no mared yet. Hem i save se bambae yu laekem moa laef blong yu sipos yu mared. Papa blong yumi long heven we i laekem yumi tumas i stap tingbaot tu wanem samting we yumi save haremgud long hem blong longtaem, long saed blong speret mo filing. Mo tu yu save sua long wan samting: Sipos yu gat longfala tingting blong wet long Jeova mo evri dei traehad blong folem olgeta rul we Tok blong Hem i talem, yu save sua se bambae hem i mekem nid blong yu i kamtru long rod we i save mekem yu yu haremgud blong olwe.​—Skelem wetem Ol Sam 145:16.