Ol Misinari Blong Maekronesia

NATING se solwora we i seraotem ol aelan blong Pasifik i bigwan tumas, ol misinari blong Maekronesia oli glad blong stap hivap yet long evri yia blong mekem “bakegen wan famle we i joengud.” ?Mo ol man ya blong talemaot gud nyus we oli kam long ol aelan we oli stap longlongwe oli mit long weples? I stret nomo, long ples we gavman blong ples ya i kolem se Rod Blong Jeova​—adres blong branj ofis blong Guam we i stap lukaot long wok blong olgeta.

Long Jun 1992, 56 misinari oli kam wanples long branj ya blong joen long Distrik Asembli ya “Ol Man Blong Karem Laet.” Bigfala glad i kamaot mo oli haremgud blong toktok plante, taem oli luk bakegen ol fren we oli save olgeta longtaem finis mo oli mekem sam nyufala fren. Olsem oltaem, oli sidaon wanples long ol step blong Haos Kingdom blong mekem wan foto mo biaen oli sidaon long tri longfala tebel we i gat kakae long hem blong joen long kakae blong misinari we oli mekem wan taem long wan yia. Long yia ya hem i nambawan tumas from i gat visit blong Albert Schroeder, wan memba blong Hed Kampani.

Plante long ol misinari ya, taem oli kam long Guam wan taem long wan yia, hemia wan jans nomo we oli gat blong livim ol smosmol hot ples blong olgeta. Mo i tru ol aelan ya oli smol tumas. Ebi aelan, wan long ol aelan blong Marsal, i gat 32 hektea nomo. Haos blong misinari long Majuro, long ol aelan blong Marsal mo haos blong misinari long Kiribati long ol aelan blong Gilbet, evriwan oli stap long ol longfala rif aelan we bigwan blong olgeta i no kasem wan kilomita. Ale ol misinari oli haremgud blong mekem nambawan trep blong olgeta i go long Guam.

Nating se tingting blong prij long wan smol hot aelan we i stap longwe i olsem wan drim nomo, i rili wan traem we samfala oli no naf blong winim. I gud blong save se, 7 nomo long ol 56 misinari ya oli kam long Wajtaoa Baebol Skul blong Giled. Plante long olgeta oli kam long Hawai no long Filipin we oli mekem wok blong paenia finis mo oli lan finis blong stap laef long ol hot ples ya, mo oli aot wantaem long ol kantri blong olgeta blong go stret long kantri we bambae oli wok long hem olsem misinari.

From ol aelan blong Maekronesia oli stap kolosap tumas long ekweta, ples i hot tumas mo i hadwok long ol misinari ya blong karem gud nyus i go long evriwan. Fasin blong toktok long olgeta man i save kam olsem wan bigfala traem. Wanwan aelan no wan grup blong aelan i gat prapa lanwis blong hem​—sam lanwis ol narafala man oli neva harem bifo, mo tu oli no raetem insaed long wan diksonari​—mo i tekem plante yia blong wan man we i jes kam i save toktokgud. Blong givhan long ol man ya we oli gat ol defren aelan mo ol defren kastom blong oli kasem save long Baebol, branj ofis long Guam i prentem ol buk long 11 lanwis, 9 i blong olgeta long ol wanwan ples blong Maekronesia.

Samfala aelan oli stap aot olgeta nomo mekem se oli mas yusum bot nomo blong kasem olgeta. Haos blong misinari long Tol aelan long Juk (Truk) i stap long wan aelan olsem, mo ol misinari long ples ya oli dipen long laet blong san blong givim lektrik long olgeta long sam haoa nomo long evri dei.

Evriwan, i gat 14 haos blong misinari long ol aelan blong Maekronesia, we i kavremap wan ples we kolosap i bigfala olsem kantri blong Amerika. Insaed long moa long ol 400,000 man we oli stap long eria ya, 1,000 oli man blong talemaot gud nyus, oli stap wok long 20 kongregesen mo tufala grup we oli stap longlongwe.

Ol man blong Maekronesia oli frengud tumas long olgeta man, be ol skul, ol kastom long ples ya mo ol trabol long famle oli mekem plante man oli no agri long trutok long saed blong Kingdom blong God. From samting ya, nating se wok blong talemaot gud nyus i gohed bigwan (ol 1,000 man ya blong talemaot gud nyus blong Kingdom oli mekem kolosap 2,000 Baebol stadi), be samfala kongregesen mo samfala grup oli stap smol nomo. Wan eksampel, i gat faef man nomo blong talemaot gud nyus long aelan blong Tinian, i gat 7 man nomo blong talemaot gud nyus long aelan blong Nauru, mo ol kongregesen ya long Yap, Kosria, mo Rota, namba blong ol pablisa long wanwan kongregesen ya i no kasem 40. Be nating, sam misinari oli bin stap long ol ples blong wok blong olgeta bitim 20 yia. Makemgud, ol sikis misinari long aelan blong Belau oli bin stap long ples ya blong 12 yia.

Long olgeta we oli stanap strong, oli kasem bigfala blesing. Evri dei oli gat jans blong sapraes long ol nambawan samting we Jeova i wokem. Ol aelan blong Maekronesia we i gat plante tri i gru long ol, oli stap olsem ol smol grin ston we oli saengud long blu solwora blong Pasifik. Ol longlongfala sanbij mo ol rif we oli fulapgud wetem fis we oli gat gudfala kala oli pulum ae blong ol man blong daeva blong lukluk sam long ol nambawan samting blong swim long wol. Mo long en blong wanwan dei, i naes tumas blong luk san we i godaon long solwora.

Be, blesing we i bigwan olgeta, hemia jans blong mekem wok blong Jeova blong talemaot nambawan promes blong hem long fyuja long ol narafala man. From we ol misinari blong Maekronesia oli stap gohed blong bambae oli kasem blesing ya, oli stap mekem profet tok blong Aesea 42:12 i kamtru se: “I gud oli givim glori long Jeova, mo tu long ol aelan i gud oli presem hem.”

[Tok Blong Pija Long Pej 21]

Ol misinari oli kam wanples long Guam, Jun 1992