“Bifo Long Ol Hil”
“I STAT bifo olgeta, i kam kasem naoia, oltaem, yu yu olsem hom blong mifala. Bifo long ol hil no long taem ya we yu no wokem wol ya nating yet, yu yu God we yu stap we yu stap, mo bambae yu save stap oltaem, gogo i no save finis.” (Ol Sam 90:1, 2, New International Version) !Ol tok ya oli go long Man we i Wokem yumi, mo oli leftemap tingting blong yumi—antap moa long taem blong yumi tede, we i no gat wan samting we i rongud!
Long wan taem we ekonomi i foldaon, i no gat plante man we oli stap tingting strong long saed blong fyuja. Fasin blong brekem loa we i go antap mo fasin nogud blong yusum drag i bin jenisim sam taon i kam olsem ples blong faet. Mo tu bigfala samting ya we i bin stat longtaem finis i kam, famle laef, i stap kam nogud. Yumi harem ol nyufala fasin, olsem fasin we man i slip wetem man i save gat wan famle blong hem. Ol mama we oli stap olgeta nomo oli stap kam plante, mo plante taem oli mas traem blong winim bigfala trabol. Ol trabol olsem fasin blong rao long mared mo fasin blong mekem nogud wetem pikinini, oli spolem pis blong plante famle.
?Bambae hu i lidim yumi tru long ol hadtaem ya? Yes, i gat plante advaes blong ol man we oli stadi long tingting blong man, ol man blong tijim man, mo ol narafala, be plante long ol advaes ya oli no sem mak. Long plante yia finis long ol kantri long Wes, Dokta Benjamin Spock i wan nambawan man blong givim advaes long bisnes blong tijim ol pikinini. !Biaen hem i talem se i gat mastik long advaes blong hem!
!I waes tumas blong luk long God olsem ‘hom blong yumi’! Long ol taem ya blong trabol, hem i wan ston we i no save muf, i stap “oltaem, gogo i no save finis.” Hem i yusum profet Malakae blong tokbaot hem wan se: “From we mi mi Jeova, mi mi no jenis.” (Malakae 3:6) Ol rod blong God, olsem i stap long Baebol, oli no save gyaman nating. Hem i stap “bifo long ol hil,” mo advaes blong hem we oli kamaot long tabu tok blong Baebol, oli stanap long waes blong hem we i no save finis. Hemia nao stret samting we yumi nidim blong stap glad mo blong winim ol trabol.
Ale, i waes blong trastem Tok blong God, Baebol. Stadi long hem blong karem frut from waes blong God. Trastem samting we yu lanem, mo letem hem i kam olsem laet blong lidim yu i go long rod blong laef. (Ol Sam 119:105) Olgeta ya nomo we oli mekem olsem oli gat risen blong tingting strong long fyuja mo oli gat trufala pis long tingting blong olgeta.