Jeova i Jenisim Ol Defren Kaen Taem Long Romania

JENIS i kamaot long ol ples long Is Yurop long 1989. Long sam manis nomo, ol gavman we bifo oli stanap strong olsem stonwol oli stap foldaon olsem wan afta narawan. Wetem jenis long saed blong politik, i gat jenis tu long saed blong ol samting long laef, ekonomi, mo, hemia we ol Wetnes blong Jeova oli intres bigwan long hem, hem i ol jenis long saed blong skul. Long ol kantri wanwan, ol gavman oli luksave ol Wetnes blong Jeova folem loa, mo oli givim fasin fri long olgeta bakegen blong oli gohed long wok blong olgeta long saed blong skul.

Be i luk olsem ol samting bambae i no sem mak long Romania. Gavman i holemtaet ol man blong hem mekem se i luk olsem bambae i no gat bigfala jenis. Taem ol Wetnes blong Jeova long ples ya oli harem wanem i stap kamaot long ol narafala kantri long Is Yurop, oli stap askem olgeta wanwan se “?Bambae yumi save haremgud long fasin fri blong wosip bifo Amageden?” Oli wantem tumas taem ya we oli save joen long ol Kristin miting wetem ol brata mo sista blong olgeta long saed blong speret, talemaot gud nyus long pablik, mo stadi ol buk blong olgeta long saed blong Baebol long klia ples, i no nid blong haedem olgeta oltaem. Ol samting ya i olsem wan drim nomo.

!Nao drim ya i kamtru! Hem i kamaot long Desemba 1989. Evriwan oli sapraes se, rul blong Ceauşescu i foldaon wantaem nomo. Kwiktaem, ol Kristin ya oli haremgud. Long Epril 9, 1990, gavman i luksave ol Wetnes blong Jeova olsem wan ogenaesesen blong skul long Romania. Jeova i bin jenisim ol defren kaen taem long ol 17,000 Wetnes long ples ya.​—Lukluk Daniel 2:21.

Wan Longfala Histri

Long 1911, Carol Szabo mo Josif Kiss tufala i aot long Amerika mo kambak long Romania. Long Amerika tufala i bin lanem trutok blong Baebol mo givim laef blong tufala long Jeova blong mekem wil blong hem. Tufala i wantem talemaot gud nyus long ol man ples blong tufala. Taem tufala i kasem Romania, kwiktaem tufala i stat blong prij. Taem Namba 1 Bigfala Faet blong Wol i kamaot, polis i holemtaet tufala from wok we tufala i stap mekem. Be, ol sid blong Kingdom we tufala i bin planem i stat blong gru. Long 1920, taem wok i gohed gud bakegen, i gat kolosap 1,800 pablisa blong talemaot Kingdom long Romania.

Long taem ya tingting blong rebelian we i stap kamaot long Balkans i stap kam bigwan moa long Romania, mo ol faet oli kam plante. Nating se i gat ol hadtaem olsem, ol brata blong yumi long saed blong speret oli gohed long wok ya. Long 1924 Watch Tower Sosaeti i openem wan ofis long 26 Regina Maria Street long Kluj-Napoka blong i lukaot long wok ya long Romania, Hangari, Bulgaria, Yugoslavia, mo Albania.

Politik i strong tumas, mo antap long trabol we i kam long ol haeman blong gavman, i gat trabol tu insaed long ogenaesesen. 1930 Year Book i givim ripot ya se: “From we man ya we Sosaeti i sanem hem i go long ples ya i no stap tru, ol brata mo sista oli seraot wanwan mo bilif blong olgeta i foldaon bigwan. Sosaeti i stap lukluk blong tekem jans blong mekem wok i gohed bakegen long kantri ya, be ol haeman long ples ya oli blokem evri samting, mo yumi mas wet go kasem Masta i openem wan rod we i gud moa.”[1] Nao, long 1930, oli putumap Martin Magyarosi, wan Wetnes blong Romania we i baptaes long 1922, i kam olsem nyufala man blong lukaot long branj, mo biaen oli seftem ofis i go long 33 Crişana Street, Bukares. Afta we oli stap traehad longtaem finis i kam, nao long 1933 Sosaeti i kasem raet olsem wan kampani folem loa blong stap long Romania.

Ol Hadtaem Oli Gohed

Ol strongfala traem oli gohed blong kasem ol Wetnes long Romania. 1936 Year Book i givim ripot ya se: “I tru i no gat ples long wol we ol brata oli wok wetem ol hadtaem i winim ol brata long Romania.” Nating se i gat ol trabol olsem, ripot blong 1937 sevis yia i talem se i gat 75 kongregesen wetem 856 pablisa long Romania. Long Memoriol, i gat 2,608 man i stap.

Long taem blong Namba 2 Bigfala Faet blong Wol, trabol i kasem Romania tu. Long Septemba 1940, Jenerol Ion Antonescu i tekem paoa long gavman ya mo i statem wan rul we i sem mak long rul blong Hitler. Oltaem i gat ol samting we oli mekem ol man oli fraet. Oli holemtaet sam handred long ol brata blong yumi, oli kilim olgeta, mo kilim nogud olgeta i ded. Oli holemtaet brata Magyarosi long Septemba 1942, be hem i save gohed yet blong lukaot long wok long Transylvania taem hem i stap long kalabus.

Trabol i gohed yet taem ol soldia blong Hitler oli kamtru long kantri ya long 1944. Wan ripot i kam long Bukares i tokbaot laef long taem ya we Nasi i stap rul se: “Oli kilim nogud ol Wetnes blong Jeova long kantri ya. Oli putum olgeta oli kalabus wetem ol Komunis, ol haeman blong skul we oli stap sapotem Hitler oli talem se ol Wetnes oli nogud moa long ol Komunis, plante long mifala i mas stap long kalabus long 25 yia, no sam long mifala i mas stap kalabus long ful laef blong mifala no sam long mifala i mas ded.”

Biaen faet i finis, mo long Jun 1, 1945, ofis blong Sosaeti long Bukares i statem wok bakegen. Nating se i hadwok blong kasem ol pepa, olgeta oli wok strong blong prentem bitim 860,000 buklet mo bitim 85,000 kopi blong Wajtaoa long lanwis blong Romania mo Hangari. Jeova i blesem bigwan hadwok blong olgeta. Long 1946 kolosap 1,630 nyuwan oli tekem baptaes. Bigfala samting long yia ya hem i bigfala asembli we oli holem long Bukares long Septemba 28 mo 29. Ol haeman blong jyos oli traem blong spolem mo blokem asembli ya, be oli no winim, mo kolosap 15,000 man oli kam long pablik tok. Hem i fastaem we ol brata long Romania oli save gat wan asembli olsem.

Sosaeti i sanem Brata Alfred Rütimann we i stap long branj long Swiselan i go long Romania. Long Ogis 1947 hem i toktok wetem kolosap 4,500 brata long ol 16 defren ples, hem i mekem se oli mas stap strong, rere long samting we bambae i kamaot biaen. I no longtaem trabol bakegen bambae i kam long ol Wetnes, naoia trabol i kam from rul blong Komunis. Long Febuwari 1948 ol haeman long gavman oli putum tabu long wok blong prentem mo wok blong prij. Mo, long Ogis 1949, ol man oli kam insaed long ofis we i stap long 38 Alion Street. Nao oli holemtaet plante brata, olsem Brata Magyarosi. Naoia oli talem se ol Wetnes oli stap agensem gavman, oli sanem olgeta i go long ol kalabus no kalabus blong ol man we oli stap fosem olgeta blong wok strong. Long ol nekis 40 yia, oli putum tabu long wok, mo ol Wetnes blong Jeova oli kasem bigfala trabol. Trabol we enemi i mekem insaed long ogenaesesen i ademap moa trabol long hemia we i stap finis. !Biaen, rul blong Ceauşescu i foldaon long 1989, mo olgeta oli fri! ?Bambae oli mekem wanem naoia wetem fasin fri ya blong olgeta?

Oli Prij Long Pablik Bakegen

Ol Wetnes oli no westem taem. Kwiktaem oli stat blong prij long ol haos wanwan. Be samting ya i no isi long olgeta ya we long plante yia finis oli stap wok long fasin haed taem oli stap holem jans blong prij. Naoia we oli save prij long pablik oli fraet. Plante long olgeta oli neva mekem samting ya bifo, mo lastaem olgeta oli prij long ol haos wanwan, hem i long ol yia we oli ron bitwin 1945 mo 1950. ?Wanem kaen frut olgeta oli kasem? I gud yumi traem luk.

Wan gudfala ples blong stat hem i long bigfala taon, Bukares, we i gat 2.5 milyan man oli laef long hem. Tu yia bifo, i gat fo kongregesen nomo long taon ya. Naoia i gat ten kongregesen, mo bitim 2,100 oli kam long lafet blong Memoriol long 1992. Wetem plante Baebol stadi we oli stap mekem, maet i no longtaem sam nyufala kongregesen bambae oli stanap.

Kraiova hem i wan taon we i gat kolosap 300,000 man oli laef long hem, hem i stap long saotwes blong kantri ya. Kam kasem 1990, i gat 80 Wetnes nomo long ful taon ya. Nao tingting blong paenia i kasem olgeta, mo wok i gohed moa. Long 1992 nomo, 74 man oli baptaes, mo oli mekem bitim 150 Baebol stadi. Wetem bitim 200 pablisa, oli stap traem faenem wan gudfala ples blong wan Haos Kingdom.

Long Tirgu-Mures, wan Wetnes sista wetem tu brata oli go long pris blong Otodoks blong hem i tekemaot nem blong sista ya long jyos blong hem. Taem pris i harem risen blong visit blong olgeta, hem i askem olgeta blong oli go insaed, mo oli gat wan gudfala storeyan. Nao pris i talem se: “Mi mi jelas long yu be i no from wan nogud samting. Mifala nao i mas mekem wok ya we yu stap mekem. !Sore tumas we Otodoks Jyos i wan bigfala jyos we i stap slip!” Hem i tekem buklet ya Should You Believe in the Trinity? mo wan kopi blong Wajtaoa. Sista ya i glad tumas se hem i no moa haf blong “bigfala jyos we i stap slip.”​—Revelesen 18:4.

I klia nomo se plante long olgeta we oli stap lanem trutok tede oli yangfala. ?From wanem? Olgeta oli stap tingting se plante samting bambae oli jenis taem gavman i jenis, be tingting ya i gyaman nomo. Oli glad blong lanem se Kingdom blong Jeova nomo i save winim ol trabol blong yumi blong olwe.​—Ol Sam 146:​3-5.

Ol Bigfala Samting Oli Kamaot Long Ol Smol Ples

Okoles hem i wan smol velej long Romania saed i go long not. Long 1920 wan man we nem blong hem Pintea Moise i kambak long Rasia, ples ya we hem i stap olsem wan presina blong faet. Bifo hem i wan Katolik, be bifo we hem i kambak hem i kam wan Baptis. Tri wik biaen, ol Baebol studen, hemia nem we ol Wetnes blong Jeova oli stap holem bifo, oli kam toktok wetem hem. Afta long visit ya, hem i talem se: “!Naoia mi faenem trutok long saed blong God!” Long 1924 i gat wan grup blong 35 man long Okoles.

Tede, long medel blong ol 473 man we oli laef long ples ya, i gat 170 pablisa blong talemaot Kingdom i stap. Wanwan pablisa i gat olsem tu haos blong i prij long olgeta, mo oli wokem ol velej we oli stap kolosap tu. Be, olgeta oli holem gudfala tingting long saed ya yet. Oli jes bildim wan naesfala Haos Kingdom we i save tekem 400 man. Ol Wetnes long ples ya nomo oli mekem olgeta wok ya.

Valea Lagă hem i ples we Brata Szabo mo Brata Kiss tufala i stap long hem long 1914. Long 1991, insaed long medel blong 3,700 man we oli stap laef long ples ya, i gat eit kongregesen mo 582 pablisa blong talemaot Kingdom. Long Memoriol long 1992, i gat 1,082 man i stap​—kolosap 1 long 3 man we oli stap long vali ya.

Ol Spesel Paenia Oli Mekemrere Rod

Ol spesel paenia oli mekem bigfala wok blong talemaot gud nyus i go long ol ples we oli stap olgeta nomo. I no longtaem afta we oli letem olgeta blong oli prij, Ionel Alban i stat blong wok long tu taon, hem i spenem tu dei evri wik long Osova mo faef dei long Turnu-Severin.

Ples ya Osova i no gat Wetnes long hem taem Ionel i kam. Long faswan wik, hem i statem wan Baebol stadi wetem wan boe blong 14 yia. Yangfala i mekem plante jenis long laef blong hem long tu manis, mekem se wan fren wetem wan we i stap laef kolosap oli stat blong stadi tu. Roland, hem we i stap laef kolosap mo i wan Katolik, hem i gohed gud. Afta wan mo haf manis nomo, hem i joen wetem Ionel long wok blong prij, mo faef manis biaen hem i baptaes. Hem i go stret long fultaem wok blong prij. Mama blong hem i stat blong stadi tu mo hem i baptaes long 1992 Distrik Asembli ya “Ol Man Blong Karem Laet.” Naoia i gat ten pablisa long Osova, mo oli mekem 30 Baebol stadi.

Faswan man blong kasem trutok long Turnu-Severin hem i wan resepsenis long hotel ya we Ionel i stap long hem. Afta long tu manis man ya i kam wan pablisa we i no baptaes yet, mo tri manis biaen hem i baptaes. Naoia i gat 32 pablisa long ples ya we oli stap mekem 84 Baebol stadi.

Narafala spesel paenia, Gabriela Geica, i mekem wok olsem fultaem paenia taem oli putum tabu long wok blong yumi. Sista ya i wantem tumas blong wok long ples we i gat moa nid long hem. Oli sanem hem i go long wan bigfala teritori. Samtaem hem i save go 100 kilomita go kasem 160 kilomita blong visitim olgeta we oli intres. Wan taon we hem i stap wok long hem, hem i Motru, ples ya i gat fo Wetnes nomo. Sista ya i talem se, “From wok i stap gru moa long Motru, ol pris mo ol narafala skul oli stat blong agensem mifala. Oli pulum mea wetem polis blong oli fosem ol famle we oli stap letem mi mi stap wetem olgeta blong oli agensem mi. Nao oli sakemaot mi long haos, taswe kolosap evri manis mi mas lukaotem wan narafala ples blong stap long hem.”

Long Osova, Gabriela i statem wan stadi wetem wan woman we i no gat bilif, woman ya i talem se hem i no intres long skul mo tu hem i no intres long Baebol. Be afta long fo manis stadi nomo, woman ya i stat blong stap long saed blong Baebol. Nating se hasban blong hem i lokem doa i no letem hem i kam insaed long haos long naet mo i talem se bambae hem i divos long hem no bambae hem i kilim hem, be woman ya i holemtaet bilif blong hem. Yes bifo we hem i baptaes, woman ya i stap mekem ten Baebol stadi.

Nambawan Fyuja i Stap

Long Ogis 1992, Romania i kasem bigfala namba blong 24,752 pablisa long 286 kongregesen. Ol man we oli kam long Memoriol i bitim 66,000. Long smol branj ofis we i stap long Bukares, 17 man we oli wok long hem oli stap traehad blong lukaotgud long ol brata blong olgeta long ol nid long saed blong speret. Oli stap lukluk i go long fyuja i no longtaem blong statem wok blong bildim wan branj we i bigwan moa.

Ol Wetnes blong Jeova long Romania oli sapraes tumas long ol jenis we oli kamaot kwiktaem long ol yia we oli pas i no longtaem. Oli talem tangkyu long Jeova God from se oli haf blong bigfala kongregesen long ful wol we i holem nem blong hem mo i stap lidim ol man blong oli kasem stret save long Jeova mo plan blong hem we i no save jenis. !Afta long plante yia we oli stap kasem ol hadtaem mo ol man oli stap ronem olgeta, oli tangkyu tumas long Jeova se i tru tumas hem i jenisim ol defren kaen taem long Romania!

[Map blong pija long pej 23]

(Lukluk niuspepa)

HUNGARI

ROMANIA

Bukares

Cluj-Napoca

Kraiova

Tirgu-Mures

Osova

Turnu-Severin

Motru

Turda

BULGARIA

[Tok Blong Pija Long Pej 24, 25]

1. Kolosap 700 brata oli hivap wanples long ol tri long 1947

2. Ol pepa blong wan tok long 1946

3. Long asembli we i jes pas long Romania

4. Wok blong prij long Kluj-Napoka tede

5. Haos Kingdom kolosap long Turda

6. Betel famle long Bukares