Fasin Hanggri Oli Talemaot Finis Bifo i Kamaot
LONG ol yia we i jes pas fasin ya blong kakae i sot i kam wan samting we yumi harem nogud long hem, we i fulap long ol ripot blong ol nyus long wol. Yumi no save fogetem pija blong ol man Itiopia mo sam narafala ples we man i safa from kakae i sot. Long 1992 olgeta man long wol oli lukluk nomo long ol man Somalia from we oli harem nogud tumas long hanggri, we i kamaot from we i no gat ren mo i gat faet. International Herald Tribune i ripotem long Septemba 1992 se: “I no gat man i save hamas man Somalia oli ded finis, be ol Red Kros oli putum namba ya antap long 100,000. Plante handred, sipos no taosen, oli ded evri dei.”
Ol namba ya oli no save soemaot fasin ya blong harem nogud mo soa tumas long wanwan man we oli kasem trabol ya. Wan woman Yurop Yvette Pierpaoli, hem i representem olgeta man we oli lego ples blong olgeta from ol trabol blong go haed long narafala ples, i raetem long UN magasin Refugees: “Long Nyu Yok no Jeniva, kwestin we i kamaot long saed blong ol man we oli lego ples blong olgeta blong stap narafala ples from ol trabol, i klia nomo; oli talem ol namba mo ol namba ya oli gat plante siro long hem we i hadwok blong kasem save long olgeta. Be plante taosen mael aot, long ol kantri we i no gat gavman no loa oli no moa save kontrolem, strong filing i jokem yu, bigfala namba blong man we oli safa oli mekem we yu wantem singaot.”
Ol Red Kros oli talem se ol samting we hem i mekem blong halpem Somalia oli bigfala moa bitim help we oli bin givim long ol narafala ples be, plante long ol man we oli luk samting ya oli komplen se ol help ya i smol tumas, i let tumas. Pierpaoli i talem se: “Ol kantri we oli givim presen oli no moa wantem blong gohed, oli taed blong sapotem Afrika we i stap brokdaon. . . . Oli talem se i fol blong ol man Afrika from we oli no save lukaot gud, griri fasin blong ol lida blong olgeta, faet i kamaot we i no gat en blong hem.”
Baebol i talemaot finis se bambae kakae i sot “long wan ples i go long narafala ples.” Kakae i sot ya, wetem plante narafala samting we i kam antap, olsem faet, graon i seksek, mo ol sik, i soemaot we Kingdom blong God i kolosap. (Luk 21:11, 31) Baebol i go moa blong soemaot se aninit long rul blong Kingdom ya blong God we bambae i mekem i gud long olgeta man, bambae i gat plante kakae blong olgeta man. Man blong raetem Ol Sam i raetem se, “Bambae i gat plante kakae long wol, we ol hil oli fulap gud long ol kakae.”—Ol Sam 72:16.