Stret Tingting Long Fasin Sore Blong God

DOKTA i kaen mo i kea tumas. Long nambawan jajmen blong hem, wan woman i stap long denja, i nidim we oli katem blong sevem laef blong hem. Taem hem i no agri kwiktaem mo tokbaot kwestin long saed blong blad transfyusen, dokta ya i sapraes. Taem woman ya i eksplenem se from risen long saed blong skul hem i no save agri long wan operesen we i joen long blad transfyusen, dokta ya i sapraes. Hem i traehad blong tingbaot wan wei blong halpem woman ya. Nao, hem i ting se i faenem wan wei. Hem i talem se: “Yu save, sipos yu no wantem akseptem blad transfyusen, bambae yu ded. ?Yu no wantem samting ya, a?”

Woman ya we i sik i talem se, “Mi no wantem.”

“Be, ating, sipos yu akseptem wan, bambae yu go agensem ol bilif blong skul blong yu, we i impoten tu long yu. Nao, hemia i tingting blong mi. From wanem yu no wantem akseptem blad transfyusen mo sevem laef blong yu. Biaen yu talemaot sin blong yu long God, mo tanem tingting blong yu from sin ya. Long rod ya, bambae yu tekembak skul blong yu tu.”

Dokta ya we i wantem givhan i ting se i faenem finis stret ansa. Hem i save se sik woman ya i bilif long wan God we i fulap long fasin sore. Hem i ting se, hemia i wan prapa taem blong dipen long fasin sore blong God. ?Be tingting blong hem i stret?

?Samtaem Yumi Stap Tingting Olsemia?

Maet samtaem yumi wanwan i stap tingting olsem dokta ya i mekem. Ating yumi fraet taem wan i agensem yumi wantaem long skul no long wok. No maet yumi faenem yumi wanwan long wan rod we yumi sem we oli fosem yumi blong mekem samting we i agensem voes blong hat mo tingting blong yumi. From we samting ya i kamaot kwiktaem, maet yumi jusum rod we i isi blong kamaot long hem mo mekem wanem we yumi save se i rong, mo yumi wantem blong askem fogif biaen.

No maet wanwan man oli kasem traem from oli wantem folem tingting blong olgeta mo mekem samting we i no stret. Wan eksampel, maet wan yangfala man i faenem hem wan long wan ples we i gat strong tingting ya blong mekem nogud fasin blong seks. Maet hem i no faet agensem, hem i gohed nomo, hem i ting se hem i save mekem evri samting i stret wetem God biaen. Sam oli go moa, oli mekem ol sin we i nogud nating we oli save se Kristin kongregesen i save sakemaot olgeta from. Oli stap tingting olsem, ‘Bambae mi wet smoltaem i pas. Nao bambae mi tenem tingting long samting we mi mekem mo kambak bakegen long kongregesen.’

Olgeta samting olsemia i gat tu samting long hem we i sem mak. Faswan, ol man ya oli no traehad blong mekem wanem samting we i stret. Sekenwan, oli harem se afta we oli mekem samting we i rong, God bambae i fogivim olgeta kwiktaem nomo sipos we oli jes askem.

?Wanem i Stret Tingting?

?Hemia i soemaot fasin tangkyu long fasin sore blong God? Ale, tingbaot fasin sore ya blong smoltaem. Jisas i talem se: “God i laekem tumas ol man long wol, nao hem, i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Aposol Jon i eksplenem olsem wanem fasin sore i wok taem hem i talem se: “Mi mi stap raetem ol tok ya i go long yufala blong blokem yufala blong yufala i no mekem sin. Be sipos wan long yufala i mekem sin, i gat Jisas Kraes i stap, we fasin blong hem i stret gud, mo hem i man blong stanap long saed blong yumi blong tok from yumi long Papa blong yumi.” (1 Jon 2:1) Nao, yumi foldaon long sin, from we yumi no stretgud olgeta yumi save kam long God long prea mo askem fogif tru long sakrifaes blong Jisas.

?I minim, se nating, we yumi sin no yumi no sin, bigfala samting se yumi askem fogif biaen nomo? No gat. Tingbaot tok ya long fashaf blong vas ya se: “Mi mi stap raetem ol samting ya i go long yufala blong blokem yufala blong yufala i no mekem sin.” Tok blong Jon i go moa long vas ya i soemaot lav blong Jeova we i wokem rod blong yumi from we yumi no stret olgeta. Nating nomo, yumi mas traehad olsem we yumi save mekem blong blokem sin. Sipos no, yumi soemaot fasin we yumi no gat respek nating from lav blong God, olsem olgeta ya we Jud i tokbaot we oli yusum fasin sore blong God olsem wan eskyus blong mekem nogud.​—Jud 4.

Tingting se fasin sore blong God i olsem wan net blong sef we bambae i stap kasem yumi oltaem nomata wanem yumi mekem, i daonem fasin sore blong God, i olsem we sin i no olsemia nating, i gud nomo. Hemia i longwe tumas long trutok. Aposol Pol i talem long Taetas i se: “God i soemaot finis fasin blong hem blong givhan long man long gladhat blong hem. Fasin ya blong God i openem rod blong hem i sevem olgeta man. . . . Yumi no mas wantem tumas ol samting blong wol ya mo yumi mas blokem ol samting we yumi nomo i wantem. Nao yumi mas mekem ol fasin we oli stret, we God i stap harem long hem.”​—Taetas 2:​11, 12.

Pol i soemaot tangkyu blong hem long fasin sore blong God long rod ya we i faet agensem sin ya we i stap long hem. Hem i talem se: “I olsem we mi mi stap faetem bodi blong mi blong mekem bodi blong mi i stap kwaet, blong bambae i save mekem olsem we mi mi wantem. Mi mi singaot plante narafala man finis blong oli kam joen long resis ya. Be mi mi no wantem brekem rul blong resis ya, nao bambae oli sakemaot mi mi lus.” (1 Korin 9:27) Pol i no jes akseptem se sam samtaem bambae hem i mas foldaon long sin. ?Yumi tu i olsem?

Tingting We Jisas i Gat

Wan taem, Jisas i soemaot tingting blong hem long fasin blong lego tingting we i stret mo tekem wan rod we i isi blong blokem fasin ya blong harem nogud. Taem i stat blong talemaot long ol disaepol blong hem we sakrifaes blong ded blong hem i kolosap Pita i traem blong blokem hem, i se: “Yu kaen long yu wan, Masta; samting ya bambae i no hapen long yu nating.” ?Jisas i talem wanem bakegen? “!Setan, yu gowe long mi! Yu yu stap blokem mi nomo. Tingting blong yu i no tingting blong God, i tingting blong man nomo.”​—Matyu 16:​22, 23.

Strong tok blong Jisas blong stretem Pita i soemaot klia se Jisas i no wantem tekem wan rod we i isi blong go agens long wil blong God. Store ya i soemaot se Jisas i no save livim stret rod, oltaem hem i stap kasem trabol long han blong Setan. Long en blong hem oli tok nogud long hem, kilim nogud hem, mo i harem nogud tumas gogo hem i ded. Nating nomo, hem i no lego stret rod, mo from samting ya hem i save givim laef blong hem olsem wan ransom blong yumi. !Hem i no stanap strong long ol samting ya blong mekem se yumi save ‘kaen long yumi wanwan’ taem hadtaem no traem i kam antap!

Long saed blong Jisas Baebol i talem se: “Yu yu laekem tumas stret fasin, mo yu no wantem ol fasin we i nogud, yu agensem olgeta.” (Hibrus 1:9) Taem yumi tekem rod we i isi oltaem i joen long fasin we i nogud. Nao, sipos i tru we yumi no laekem fasin nogud olsemia​—olsem Jisas i mekem​—oltaem bambae yumi no wantem mekem samting we i no stret. Long buk blong Proveb, Jeova i talem se: “Yu mas waes, pikinini boe blong mi, mo mekem hat blong mi i glad, blong mi bambae mi ansa long hemia we i jikim mi.” (Proveb 27:11) Fasin blong Jisas blong skelem stret mo no daonem stret fasin i mekem hat blong Jeova i glad bigwan. Yumi tu i save mekem Jeova i haremgud sipos yumi folem fasin blong Jisas blong folem stret rod.​—1 Pita 2:23.

Fasin Blong Stanap Strong Longtaem i Save Trenem Yumi

Aposol Pita i raetem se: “Yufala i save harem gud from ol samting ya. Nating we naoia yufala i mas harem nogud from plante samting we oli kam traem yufala. Ol samting ya oli stap kam blong soemaot we fasin blong bilif blong yufala i tru. Gol i wan gudfala samting be i wan samting we i save lus tu. Be oli stap traem hem long faea blong luksave hem. Oraet long sem fasin, bilif blong yufala we long fes blong God i gud moa long gol, be hem tu i gat ol samting blong traem hem. Nao long dei ya we bambae Jisas Kraes i kamtru, God bambae i save presem yufala, i save leftemap nem blong yufala, i save ona long yufala.” (1 Pita 1:​6, 7) From we yumi no stret gud olgeta mo yumi laef long medel blong wol blong Setan, oltaem nomo bambae yumi fesem ol traem mo ol samting we Setan bambae i pulum yumi long hem. Olsem Pita i soemaot, samting ya i save givhan long yumi long wan gudfala rod. Oli testem bilif blong yumi, blong soemaot sipos bilif blong yumi i slak no i strong.

Mo tu oli blong trenem yumi. Jisas “i lanem fasin ya blong obei, long ol samting we oli mekem hem i harem nogud long bodi blong hem.” (Hibrus 5:8) Yumi tu i save lanem fasin ya blong obei, wetem fasin ya blong dipen long Jeova, sipos yumi stanap strong long ol traem we yumi stap kasem. Mo fasin blong lanem ol samting ya bambae i gohed gogo kasem taem we bambae yumi lanem fulwan, olsem Pita i talem: “God . . . hem wan bambae i finisim ol samting we yufala i lanem, hem bambae i mekem yufala i stap stret, hem bambae i mekem yufala i strong.”​—1 Pita 5:10, NW.

Sipos, we, yumi no agensem ol traem ya, yumi soemaot we yumi slak, sot long strong lav blong Jeova mo stret fasin no yumi sot long fasin ya blong bos long tingting. Eniwan long ol slak fasin olsem i save spolem fasin fren blong yumi wetem God. I tru, woning blong Pol i save kamtru long yumi: “Be nao yumi ya we yumi kasem save long ol trutok finis, sipos yumi girap, yumi stap gohed blong mekem ol sin, hemia bambae i no gat rod. Bambae i no moa gat wan samting i stap we yumi save kilim blong tekemaot ol sin ya blong yumi.” (Hibrus 10:26) !I gud moa blong no mekem sin fastaem i bitim we yumi foldaon mo blong lusum jans blong kasem gudfala laef!

Bilif We i Stret Gud

Long taem blong profet Daniel, i gat tri man Hibru we oli talem long olgeta se bambae oli ded long wan faea sipos oli no wantem wosip long wan aedol. ?Oli ansa se? “Sipos i olsem, God blong mifala we mifala i wosip long hem bambae i save tekemaot mifala. Aot long bigfala faea we i stap laet mo aot long han blong yu, O king, hem bambae i tekemaot mifala. Be sipos no, mifala i letem yu yu save, O king, se ol God blong yufala oli no God ya we mifala i wosip long hem, mo aedol ya we oli wokem long gol we yu putumap finis bambae mifala i no wosip long hem.”​—Daniel 3:​17, 18.

Oli stanap long rod ya nao from oli wantem mekem wanem we i stret. Sipos oli mas ded from, be i olsem. Tingting blong olgeta i stap long laef bakegen. Sipos God i tekemaot olgeta, hemia i gud tumas. Be bilif blong olgeta i no dipen long samting ya. Ol man blong God tu oli mas mekem olsem oltaem.

Long taem blong yumi i gat sam man we oli no wantem lego bilif blong olgeta, ale oli satem olgeta finis long kalabus, oli kasem panis, oli kilim olgeta i ded. Sam narafala oli mekem sakrifaes long saed blong bodi, oli jusum blong stap pua i bitim we oli kam rij from we oli lego ol stret rul. Wanem i hapen long Kristin woman we i stap long stat blong haf ya? Hem i glad tumas long kaen fasin blong dokta ya nating se hem i no gat stret tingting, be hem i no lego bilif blong hem. Defren olgeta, fasin ya blong hem blong gat respek long loa blong Jeova i lidim hem blong no wantem we dokta i katem hem. Yumi glad se woman ya i kam gud bakegen mo gohed strong blong wosip long Jeova. Be, taem woman ya i talemaot tingting blong hem, hem i no save wanem samting bambae i kamaot from, be hem i rere blong lego olgeta samting long han blong Jeova.

?Wanem i halpem hem blong gohed blong stap strong long wan traem olsem? Hem i no traem blong dipen long prapa paoa blong hem wan, mo i no dipen long wan narafala man blong God. Tingbaot, “God hem i sef ples blong yumi. Oltaem hem i rere blong givhan long yumi long taem blong trabol.” (Ol Sam 46:1) !I gud moa blong yumi tanem yumi i go long God blong hem i halpem yumi taem yumi kasem trabol i bitim we yumi mekem sin finis nao yumi tanem yumi i go long hem blong i sore long yumi!

Yes, yumi no mas tingting nating long bigfala fasin sore ya blong God. Be yumi mas wokem tingting ya we yumi rili wantem blong mekem wanem we i stret, nating sipos yumi kasem ol hadtaem. Samting ya bambae i mekem fasin fren blong yumi wetem Jeova i dip moa, i trenem yumi olsem yumi nidim blong yumi save laef blong olwe, mo soemaot prapa respek long fasin sore blong God. Waes fasin olsem bambae i mekem hat blong Papa blong yumi long heven i glad.

[Tok Blong Pija Long Pej 24]

Fasin ya blong bilif fulwan long laef bakegen long ded i halpem trifala man Hibru blong stap tru long God