!Taem Blong Tekem Kakae Long Garen!

?LONG ol yia we i pas finis, from wanem ol fasin blong ol skul we oli talem se oli “Kristin” oli no olsem Kraes nating? Plante man we oli tingtinggud oli askem kwestin ya, be Jisas i ansa long hem kolosap 2,000 yia i pas finis long wan parabol. Hem i tokbaot “wan masta we hem i go planem ol gudfala sid blong wit long garen blong hem.” Nao, “wan enemi hem i kam, i planem ol sid blong wan rabis gras long garen ya.” Taem ol sid ya i stat gru, ol man blong wok oli luksave ol rabis gras mo oli wantem blong pulumaot olgeta. Be man ya i talem: “Tufala i save gru wantaem gogo kasem taem blong tekem kakae blong wit i kam.” Long taem ya blong tekem kakae, bambae oli seraotem ol wit long ol rabis gras.​—Matyu 13:​24-30.

Jisas i eksplenem parabol ya, i talem se hem wan i man ya we i planem “gudfala sid”​—ol trufala Kristin. Enemi ya i Setan, we i planem ol “rabis gras” long medel blong ol gudfala wit—​hem i mekem sam gyaman Kristin oli kam insaed long kongregesen. Jisas i letem ol gyaman mo ol trufala Kristin blong stap wan ples​—kasem taem blong tekem kakae nomo. Nao bambae oli seraot.​—Matyu 24:​36-44.

Olsem ya nao, yumi no sapraes taem yumi lanem se ol “Kristin” ogenaesesen long ol handred yia ya we i pas finis oli no ona long God taem oli karem ol tijing blong ol hiten man, oli agri long ol nogud fasin, sapotem ol bigfala faet blong ol nesen, mo mekem ol nogud faet long saed blong skul. Long ol samting ya yumi luksave nogud sid ya we Setan i planem. Be, taem yumi ridim se wanwan man oli safa long kalabus no oli ded from we oli no wantem agensem ol rul blong Baebol, yumi luk se i no spolem fulwan gudfala sid.

Jisas i talem se taem blong tekem kakae ya i “en blong wol ya.” !From we yumi laef long en blong fasin blong wol blong naoia, hem ya i mas taem blong tekem kakae! Mekem se fasin blong seraotem ol trufala Kristin long ol gyaman Kristin i mas kamaot finis. Tede, i mas gat wan grup blong ol man, i no ol wanwan man olbaot nomo, we oli gat ol fasin blong ol trufala Kristin we Jisas i tokbaot​—we oli stap aninit long Kingdom blong God mo talemaot gud nyus blong Kingdom, we oli leftemap ol gudfala fasin we i stanap long Baebol, we oli sakemaot ol tijing blong hiten mo akseptem trutok blong Baebol, we oli talemaot nem blong God blong ol man i save, mo oli no haf blong wol.​—Matyu 6:33; 24:14; Jon 3:20; 8:32; 17:​6, 16.

!Mifala i talem stret long yu, se ol man olsem oli stap! ?Yu yu wantem mekem wok blong God long fasin we hem i glad long hem? Ale lukaotem ol man blong hem, mo mekem wok blong God wetem olgeta.