Holem Wan Ae We i “Klia Gud” Long Wok Blong Kingdom

Jeman Demokratik Ripablik (G.D.R.), no kantri we ol man oli bin kolem Is Jemani, i no bin stanap long plante ya. Fote wan yia we hem i bin stap i finis long Oktoba 3, 1990, taem teritori blong hem, kolosap saes blong Laeberia no stet blong Tenesi long Yunaeted Stet, i bin joen wanples wetem Federol Ripablik blong Jemani, we oli bin stap kolem Wes Jemani.

Mekem tufala Jemani oli joen wanples i bin minim se oli mas mekem plante jenis. Wanem we i bin seraotem tufala kantri ya hem i no wan boda nomo be strong tingting long saed blong politik we ol man oli gat we i olsem wan fenis we i seraotem olgeta. ?Ol samting ya oli minim wanem long ol man long ples ya, mo olsem wanem samting ya i jenisim laef blong ol Wetnes blong Jeova?

Wendea, wan bigfala jenis long saed blong politik we i kamaot long Novemba 1989 we i mekem tufala kantri ya i save joen wanples, i jes folem ol fote yia we oli pas blong wan gavman we i stanemap strongfala loa blong bos long olgeta samting. Long ol fote yia ya, oli putum tabu long wok blong ol Wetnes blong Jeova, mo samtaem oli mekem i nogud long olgetab. Taem fasin fri i kasem G.D.R., olgeta man oli haremgud tumas from. Be taem fasin glad ya i bin stap godaon, plante oli no moa save wanem rod blong folem, tingting blong olgeta i foldaon, mo antap moa oli lusum hop. Wok blong joenem tufala Jemani blong kam wan nomo, long politik, ekonomik mo blong mekem ol man oli haremgud wanples i kam olsem wan samting we i had blong kasem.

Folem ol haf blong “162 Tage Deutsche Geschichte” (162 Dei long Histri blong Jemani), long Der Spiegel, we oli jes kamaot afta we tufala kantri ya i joen wanples i gat wan bigfala fraet se bambae i no gat i naf wok, praes blong rentem haos mo pem ol samting i go antap. Plante man we oli bin stap long ples ya G.D.R. bifo oli stap askem se, “?ol mane we gavman bambae i givim long mi hem i naf?” ?Olsem wanem long saed long haos? “Long olgeta ples long G.D.R., ol olfala bilding oli stap kam nogud, plante rod oli no moa sef blong mekem man i stap long haos blong olgeta.” Fasin blong sakem doti olbaot i kam antap bigwan mo mekem ol man oli harem nogud.

Long plante trabol olsem long ekonomi mo long saed blong ol man we oli harem nogud tugeta, ?olsem wanem ol Wetnes blong Jeova we oli stap long ples ya “G.D.R. blong bifo”?

Holem Ae i Stap Stret Long Wan Mak Nomo

Ol Wetnes blong Jeova oli no gat wan tingting long saed blong politik we i stap seraotem olgeta. Bilif blong olgeta we i stanap long Baebol i sem mak nomo, nating se long Is no long Wes. Long medel blong ol man we tingting blong olgeta i stap jenis, plante Wetnes oli holemtaet fasin blong stap skelgud long saed blong speret taem oli holem ae blong olgeta i stap strong long mak ya blong mekem wok blong Jeova. ?From wanem samting ya i impoten tumas?

From we “wol ya wetem ol fasin blong hem, bambae i no longtaem hem i lus.” (1 Korin 7:31) Wan Kristin elda i talem se blong go long wok blong prij taem oli putum tabu long hem bifo bigfala jenis ya long saed blong politik Wende, i nidim fasin blong no fraet; samting ya i tijim ol Wetnes blong stanap long Jeova mo i trenem olgeta blong yusum Baebol. Be, “mifala i mas lukaotgud blong no letem ol sas samting mo ol wari blong laef oli no blokem mifala blong mekem wok blong God.”

Plante taem fasin fri mo fasin blong gohed oli laenap long fasin blong kasem moa sas samting. Plante man long ples ya oli harem se oli mas mekem ol wok mo ol pleplei we oli no save mekem bifo. Samting ya i kam klia taem wan man i draevem trak blong hem long rod we oli wokem wetem ol raon ston long ol taon mo long ol velej blong Turinjia mo Saksoni long saot. !Maet oli mas wokem ol rod bakegen, ol haos oli no flas, be oli gat fulap antena olsem bigfala raon plet blong kasem program blong televisin long olgeta ples long wol! I isi nomo blong wan man blong foldaon long trap ya blong bilivim se fasin sef mo glad oli kamaot from fasin blong kasem evri samting we ae i luk. !Wan trap we i denja tumas!

Long tok antap long hil, Jisas i tokbaot denja ya blong tingbaot tumas ol sas samting mo ol wari blong laef. Hem i givim woning se “I nogud yufala i stap hivimap ol gudgudfala samting blong yufala long wol ya.” Hem i gohed moa se: “Ae blong man, hem i olsem laet blong bodi blong hem. Sipos ae blong yu i klia gud, bambae i olsem we bodi blong yu i fulap olgeta long laet.” (Matyu 6:​19, 22) ?Wanem mining blong tok blong hem? Wan ae we i klia gud hemia wan ae we i stap lukluk long wan samting nomo mo i sanem ol klia pija oli go long maen. Wan ae long saed blong speret we i klia gud i holem pija blong Kingdom blong God i stap klia. Disisen blong wan Kristin blong holem ae blong hem i klia gud, i blong lukluk oltaem long Kingdom blong God, mo no tingting tumas long ol wari blong laef i givhan long hem blong stap skelgud long saed blong speret.

Samting ya i save kam moa klia long ekspiryens blong wan man wetem woman blong hem we oli stap long Zwickau, Saksoni, we oli bin soem intres long Baebol long taem blong bigfala jenis ya long saed blong politik Wende. Bisnes blong tufala i kakae plante taem, yet oli putum ol samting blong speret long fasples, oli go long olgeta Kristin miting. “Lukluk long saed blong bisnes blong mitufala, mitufala i no gat i naf taem blong go long ol miting, be long saed blong speret mitufala i nidim samting ya.” !Hemia wan waes disisen!

Tingbaot, tu, wan famle long Plauen, long semples ya Saksoni. Hasban i gat wan bisnes blong hem wan blong wokem ol waj from hem i wan man blong wokem ol waj. Folem bigfala jenis ya long saed blong politik Wende, rent long saed blong haos mo graon we haos i stap long hem i go antap bigwan. ?Bambae hem i mekem wanem nao? “I sas tumas, mi nidim plante mane, mo mi bin lanem trutok blong laef from trutok.” Nao hem i muf i go long wan haos we i stap long wan ples we i no gud tumas be praes blong rent i no sas tumas. Yes man blong wokem waj ya i lanem kwiktaem nomo blong holem ae blong hem i klia gud.

Samfala, oli kasem save be i let finis. Wan Kristin elda i stap tingting se nyu fri-maket ekonomi we oli jes stanemap i gat plante promes long hem, i blong joen long bisnes. Wan elda we i go raon i bin talem long hem wetem kaen fasin se hem i no mas letem ol samting blong bisnes oli blokem hem long saed blong speret. Be, sore tumas, hemia nao wanem i hapen. Sam manis biaen brata ya i no moa holem wok blong elda. Biaen hem i raetem se: “Stanap long prapa ekspiryens blong mi, mi wantem advaesem eni brata we i wantem kasem sam mak long wok blong Jeova blong no mekem wan bisnes we hemwan i bos long hem.” Samting ya i no minim se i rong blong wan Kristin blong gat wan bisnes we hemwan i bos long hem. Be nating se yumi gat prapa bisnes blong yumiwan no nogat, tingbaot oltaem long ol wari blong ekonomi i save mekem yumi kam slef blong mane long wan fasin we yumi no luksave. Jisas i soemaot se: “I no gat man we i save wok blong tu masta wantaem. Sipos man i mekem olsem, bambae hem i save agens long wan masta blong hem be i stap laekem tumas narafala masta blong hem. No bambae hem i save ona long wan masta blong hem be i stap lukluk nogud long narafala masta blong hem.” (Matyu 6:24) Goethe, wan man Jemani we i bin raetem ol naesfala store, i talem se: “I no gat wan man we i moa slef i no gat hop blong kamaot bitim hemia we i foldaon long gyaman bilif.”

Taem yumi stap long wan hariken, samting ya i fosem yumi blong satem haf ae blong yumi blong lukluk klia no putum han blong yumi raon long ae blong yumi blong lukluk klia long mak blong yumi. Taem i gat trabol long saed blong politik, ekonomi, no blong mekem ol man oli harem nogud tugeta, i nidim fasin tingting dip blong holem mak blong yumi long saed blong speret i stap klia oltaem. ?Sam Kristin oli stap mekem wanem blong holem ae blong olgeta i stap klia gud long wok blong Kingdom?

Mekem Moa Long Wok Blong Kingdom

Long olgeta ples we oli bin stap olsem G.D.R. bifo, ol Wetnes oli givim moa taem long wok blong prij bitim bifo. Long tufala yia we i pas, medel namba we oli spenem long wok blong prij i go antap long 21 pesen. Laswan samting we i moa gud se namba blong ol Baebol stadi i go antap long 34-pesen. !Mo tu, namba blong ol fultaem paenia naoia i fo taem antap moa long namba we i stap long las tu yia! Nomata ol narafala oli stap wari mo oli stap toktok smolsmol, moa long 23,000 Kristin we oli stap long ples ya we i bin stap olsem G.D.R. bifo, oli stap blokem ol samting we oli stap hapen taem oli holem ae blong olgeta i stap klia gud. Samting ya nao i mekem se i gat bigfala namba i kam antap long saed blong wok blong Kingdom.​—Skelem wetem Josua 6:15.

Wok we i kam antap i soemaot se oli wokgud long ol teritori long saot, long ples ya we bighaf blong ol Wetnes oli stap long hem. Plante long ples oli gat nem we oli gat mining long olgeta mo ol man mo long histri tu. Sipos yu laekem ol plet, mo ol narafala samting we oli stap yusum long tebel we oli wokem long ‘poselen’ bambae yu luksave taon blong Meissen, kolosap long Dresden, olsem stampa ples we sam long ol naesfala ‘poselen’ long wol oli kamaot long hem. Meissen naoia i kam olsem hom blong ol 130 pablisa blong Kingdom. No tingbaot Weima, “kapital taon blong ol man we oli raetem buk long Jemani”. Goethe-Schiller Memoriol long medel blong taon i soem se tufala man ya blong raetem histri oli bin stap long Weima mo i kam wan samting we plante man oli praod from. Tede Weima i save praod from i gat bitim 150 pablisa blong talemaot gud nyus.

Be, long not ol samting oli defren tumas. I no gat plante pablisa mo ol kongregesen oli stap longwe wan long narawan. Antap moa i had blong faenem wok. Plante we oli gat wok oli mas wok ova taem sipos oli wantem holemtaet wok blong olgeta. Wan brata we i stap wok olsem fultaem paenia long not i eksplenem: “Taem oli putum tabu long wok blong yumi, wanwan brata i nidim proteksen blong Jeova long wok blong prij, be blong faenem wan wok i no had. Naoia samting ya i jenis. Mifala i fri blong prij, be mifala i nidim hem blong lidim mifala long saed blong wok. Jenis ya i nidim taem blong samfala oli save folem.”

?Ol pablisa oli glad from se oli save prij moa? Hemia tingting blong Wolfgang: “I moa gud blong sem pablisa blong wok long semfala teritori bakegen mo bakegen. Ol man oli save trastem hem mo oli rere blong toktok”. Antap moa, ol man blong haos oli “no moa fraet blong tokbaot jyos long doa blong olgeta, nating se ol man oli pas mo oli stap lesin long olgeta. Jyos i no moa wan samting we i tabu blong tokbaot.” Ralf mo Martina oli agri long samting ya. “Mifala i glad blong wok long teritori blong mifala plante taem. Yumi save stat blong savegud ol man mo yumi glad blong luk ol defren buk we yumi gat.”

Gat Fasin Tangkyu Long Ol Buk Blong Yumi

Ralf mo Martina oli laekem moa buk ya Life​—How Did It Get Here? By Evolution Or by Creation? Blong plante man we oli joen long bilif ya se i no gat God long G.D.R. bifo, buk ya i nambawan blong yusum blong mekem Baebol stadi. Oli wantem tu se sipos i gat wan buk we i sem mak olsem be i sotfala moa. “Mifala i glad tumas taem buklet ya ?God i Rili Kea Long Yumi? i kamaot long 1992 Distrik Asembli ‘Ol Man Blong Karem Laet’ long Dresden. Hem i bin wan ansa long ol prea blong mifala.”

Plante man we oli no Wetnes oli kam blong luk ol buk blong Watch Tower. Long Julae 1992 wan tija we i tijim fasin blong mekem ol man oli haremgud tugeta i bin raet blong talemaot “bigfala respek mo fasin tangkyu blong hem” long ol buk ya, we naoia hem i stap yusum blong mekem rere ol tok blong hem we hem i stap mekem long pablik. Long Janewari 1992 wan woman long Rostock i karem wan kopi blong buk ya Yu Save Laef Foreva Long Paradaes Long Wol long tu Wetnes we oli bin pas long haos blong hem. Woman ya i raet i go long branj ofis blong Jemani: “Mi blong Lutheran Church. Mi presem bigwan wok blong ogenaesesen blong ol Wetnes blong Jeova. Oli soemaot klia se man i nidim God blong stap laef.”

?Hamas rul long saed blong speret we ol skul blong krisendom i stap givim long ol memba blong olgeta? Wan nyuspepa we ol man oli savegud long hem, Die Zeit, i talem long 1991 nating se Lutheran Church i bin “soemaot hem blong smol taem olsem mama blong bigfala jenis long saed blong politik we i gat pis long hem, namba blong ol man we oli sapotem hem i stap godaon kwiktaem.” Wan man blong Lutheran Church i talem se: “Ol man konfyus oli long laef blong fri-maket wetem paradaes.” Wan memba blong skul ya long Magdebug i raet i go long branj ofis blong Jemani blong askem sam infomesen. ?From wanem? Man ya i raetem se, “afta plante yia we mi no bilivim, naoia mi luksave se wol ya i stap kolosap long en blong hem mo bambae yumi kasem plante trabol long fyuja we i stap kolosap nomo.”​—2 Timote 3:​1-5.

Bildim Blong i Kam Bigwan Moa

Bifo we Wende i kamaot, oli no letem ol Haos Kingdom oli stap long ples ya G.D.R. Naoia i gat wan bigfala nid; oli putum wok blong bildim ol Haos Kingdom i stap fasples. Hemia nao wan narafala rod blong tru wosip we i gohed taem ol samting oli jenis bigwan. Ekspiryens blong wan brata i soem olsem wanem jenis ya i kam kwiktaem.

Long Maj 1990, jes sam haoa nomo afta we loa i agri long wok blong ol Wetnes blong Jeova long G.D.R., oli askem wan brata blong toktok long wan grup blong ol wetnes, mo hem i fastaem long laef blong hem we brata ya i yusum maekrofon blong toktok. Tu mo haf yia biaen, kongregesen we hem i stap joen long hem i dediketem wan nyufala Haos Kingdom. Kolosap long en blong 1992, oli bildim seven Haos Kingdom blong 16 kongregesen. Oli plan blong bildim 30 narafala moa wetem wan naesfala Haos Asembli.

Lukluk i Go Oltaem Long Kingdom Blong God

“Smoltaem afta Wende,” wan Kristin elda i talem se, “plante man oli sakemaot Baebol. Oli putum hop blong olgeta long nyufala gavman, we i promes blong givim wan gudfala laef long fyuja.” ?Hop blong olgeta i kamtru? “Long tu yia nomo oli jenisim tingting blong olgeta. Naoia ol man oli agri wetem mifala se ol gavman blong man i no save karem pis mo stret fasin.”

Plante man oli glad tumas taem strong rul we blong gavman we i bos long olgeta samting long G.D.R., i lusum paoa blong hem oli stap talemaot samting we oli luk olsem wan taem we i spesel tumas long tingting blong ol man Wes. Be tingting blong olgeta i foldaon bigwan. Nating wanem gavman i holem paoa, oltaem ol Wetnes blong Jeova oli gat ae we i klia gud mo oli lukluk long Kingdom blong God nomo, we i stap saen olsem wan sta long heven. Bambae hop olsem i neva lidim man blong gat tingting we i foldaon.​—Rom 5:5.

[Ol futnot]

[Tok Blong Pija Long Pej 26]

Ol Wetnes long Jemani oli stap yusum fasin fri blong olgeta blong joen moa plante taem long wok blong Kingdom