Taem Is i Joen Wetem Wes
“YES, Is hem i Is, mo Wes hem i Wes, mo neva bambae tufala saed ya oli joen.” Tok ya blong Rudyard Kipling, wan man blong raetem ol naesfala tok long Engglan, i mekem yumi tingbaot ol defdefren fasin blong laef we oli stap seraotem ol man, mo i mekem se raonabaot long yumi tede, ol man oli gat fasin blong no laekem nating ol narafala from laen, kala, mo kantri blong olgeta. Plante man oli askem se, ?God i save mekem wan samting long saed blong fasin ya? !Yes, hem i save mekem! !Mo naoia hem i stap mekem wan samting! Nekis haf blong ol naesfala tok blong Kipling i tokbaot samting ya. ?Bambae Is mo Wes tufala i seraot gogo kasem wetaem? Naesfala tok ya i talem se: “Gogo kasem we Wol mo Skae tufala i stanap fored long bigfala Jea blong God blong jajem ol man.”
God i givim responsabiliti ya blong jajem man long Pikinini blong hem, Jisas Kraes. (Jon 5:22-24, 30) ?Be taem ya blong jajmen i stat wetaem? ?Bambae hem i jajem hu, mo wanem frut bambae i kamaot from? Jisas nao i tokbaot ol profet tok long saed blong faet blong wol mo ol narafala trabol, we oli mekem ol man oli harem nogud tumas stat long 1914. Hem i talem se ol samting ya oli makem “saen” blong taem ya we hem i ‘stap finis, we yumi no save luk wetem prapa ae blong yumi, mo we fasin ya blong wol i kasem en blong hem.’—Matyu 24:3-8, NW.
Long en blong bigfala profet tok ya, Jisas i makem taem blong yumi olsem wan taem blong jajmen, hem i tokbaot hem wan se: “Long taem ya we mi, mi Pikinini blong man, bambae mi kamtru wetem olgeta enjel, bambae mi mi king, mi gat olgeta paoa blong mi, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i save seraot ol sipsip long ol nani blong hem. Bambae mi putum ol sipsip oli stap long raet saed blong mi, mo ol nani oli stap long lef saed blong mi.” I min se, naoia olgeta man long wol oli stap stanap fored long Jaj mo oli mas talemaot olsem wanem oli bin lesin long mesej blong hem blong sevem man. Taem jajmen i finis long taem blong bigfala trabol we bambae i kamaot i no longtaem, ol man we oli olsem nani we oli no save obei ‘bambae oli go blong kasem panis ya we i no save finis. Be ol stret man [olgeta we oli olsem sipsip we oli gat fasin obei] bambae oli go blong kasem laef ya we i no save finis.’—Matyu 25:31-33, 46; Revelesen 16:14-16.
‘Long Ples We San i Stap Kam Antap Mo Long Ples We San i Stap Godaon’
Jajmen blong wol ya i bin stat long taem blong Faswan Bigfala Faet blong Wol we laef i olbaot. Long taem ya, ol lida blong Krisendom oli sapotem fulwan ol grup blong man we oli stap faet. Samting ya i makem olgeta olsem haf blong wan kruked wol ‘we kros blong God i stap finis long hem.’ (Jon 3:36) ?Be olsem wanem long ol Kristin we oli laekem pis mo oli soemaot bilif long God? Stat long yia 1919, ol man ya oli stat blong hivap i kam long saed blong King, Jisas Kraes.
Oli kamaot long olgeta ples long wol, fastaem, haf blong ol 144,000 tabu man we oli stap yet long wol, we Kraes i bin jusumaot olgeta long ol handred yia blong Kristin taem. Ol man ya bambae oli ‘joen wetem Kraes’ long Kingdom blong hem long heven. (Rom 8:17) Profet blong God i talem long ol man ya se: “Yufala i no fraet, from we mi mi stap wetem yufala. Long ples we san i stap kam antap bambae mi mi tekem laen blong yu i kam, mo long ples we san i stap godaon bambae mi hivimap yufala i kam wanples. Bambae mi talem long not se, ‘!Yu kam!’ mo long saot se, ‘Yu no stap, yu kam. Tekem ol boe blong mi we oli stap longwe tumas oli kam, mo ol dota blong mi we oli stap long en blong wol oli kam, evriwan we oli kolem olgeta long nem blong mi mo mi bin wokem hem blong leftemap nem blong mi, we mi mi stampa blong hem, yes, we mi bin mekem hem.’”—Aesea 43:5-7.
!Be i no hemia nomo! Antap moa long ol yia biaen long 1930, wan bigfala hif blong man, we naoia namba blong olgeta i kasem plante milyan, oli stat blong hivap. Olgeta ya noa oli “ol sipsip” we Jisas i tokbaot long Matyu 25:31-46. Olsem ol tabu man ya bifo long olgeta, bigfala hif ya oli “bilif” long Hemia we i talem se: ‘Yufala ol wetnes blong mi, mo mi mi God.’ (Aesea 43:10-12) Wok blong hivimap bigfala kampani ya i stap gohed tu ‘long ples we san i stap kam antap mo i godaon long hem, long not mo long saot, mo long laswan haf blong wol.’
Ol sipsip ya we oli laekem pis oli bin joen wanples blong kam olsem wan bigfala famle blong brata long olgeta ples long wol. Oli toktok plante defren lanwis blong ol 231 kantri we oli stap long hem. Be yet oli joen gud long saed blong speret blong lanem “klin lanwis” blong mesej blong Kingdom, “blong mekem wok blong hem, we solda blong wan i joen long solda blong narawan.” (Sefanaea 3:9) Bilif blong olgeta we i joen gud, stampa tingting, mo wok blong olgeta i givim wan bigfala wetnes se Is i joen wetem Wes finis, mo ol man we oli stap long ol ples raonabaot oli kam, blong mekem wok mo blong presem Hae Masta Jeova.
Long sam kantri wok ya blong hivimap ol man i stap gohed gud tumas, olsem ripot we i kam biaen bambae i soem.