Ripot Long Wok Blong Kingdom
Fasin Blong Holem Strong i Karem Plante Blesing
JISAS i bin talem se bambae ol man oli ronem mo mekem nogud long ol man blong hem, mo aposol Pol tu i talem, olsem i stap long 2 Timote 3:12 se: “Mo yufala i save we olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save ronem olgeta ya, bambae oli save mekem nogud long olgeta.” Be fasin blong holem strong long wok blong Jeova i karem plante blesing.
◻ Samting ya i tru long wan taon long not-is kos blong Malesia. Nating se wan papa i strong long Budis we plante taem i tijim ol pikinini blong hem, hem i no naf blokem trifala dota mo trifala boe blong hem blong stadi Baebol wetem ol Wetnes blong Jeova. Waef blong hem tu i soem intres long trutok. Ale wan dei wan man we i stap kolosap long hem i jikim hem se: “?Olsem wanem yu no save kontrolem ol pikinini blong yu mo letem olgeta blong kam ol Wetnes blong Jeova? Ol pikinini blong mi oli joen gud wetem mi mo long Budis skul blong ol bubu blong mifala. !Sore tumas long yu!”
Papa ya i hareap i go long haos mo i talem se bambae hem i faetem sista ya we i stap mekem stadi wetem ol pikinini blong hem. Be, ol pikinini ya oli kwaetem hem mo oli gohed blong stadi Baebol wetem ol Wetnes blong Jeova mo mama blong olgeta i givhan long olgeta blong go long ol miting.
Be afta, papa ya i singaot ful famle blong kam long fored blong hem. Hem i talem se, “Yufala i jusum, yufala i wantem mi mo blong stap long haos no yufala i wantem kam Kristin man mo aot long haos.” Wantaem nomo, fas bon boe, wan boe we i kaen long fasin blong hem blong toktok, i stat fulumap olting blong hem blong i aot. Nao papa ya i singaot se, “!No, yufala i no go! From we yufala i gat fasin rebol, i moa gud we mi mi ded.” Famle i biaenem hem taem hem i ronaot long haos, mo oli askem hem blong no kilim hem wan i ded. Tok blong olgeta i tajem hat blong hem mo hem i gobak long haos.
Taem i pas. Papa ya i stat blong luksave gudfala paoa blong trutok blong Baebol long fasin blong ol pikinini blong hem. Wan dei hem i mitim fren blong hem we i bin jikim hem, be naoia fren blong hem i sore, i talem se: “Mi wari tumas long ol pikinini blong mi. Oli stap trikim mi mo oli stap stil long mi.” Be papa ya we ol pikinini blong hem oli stap stadi wetem ol Wetnes blong Jeova i talem se: “!Oh, ol pikinini blong mi oli defren! Oli kaen tumas long mi mo oli halpem mi tu blong pem lon blong trak blong mi taem mi no gat wok.”
Naoia, trifala dota mo mama blong trifala oli baptaes finis. Wan boe i wan spesel paenia. ?Mo olsem wanem long papa ya we bifo i strong long Budis mo i gat fasin blong kros? Naoia hem i gat fasin fren mo hem i bin go long Memoriol.
Jeova i blesem boe ya wetem trifala sista blong hem mo mama blong olgeta tu from fasin blong olgeta blong holem strong long Jeova. Naoia oli wok strong blong talemaot Kingdom mo oli mekem hat blong Jeova i glad.—Proveb 27:11.