Mi Mas Jusum Bitwin Tu Papa

“!Yu yu no moa pikinini blong mi! !Yu livim haos ya wantaem nomo! !Yu no moa save kambak, go kasem taem we yu lego jos ya!”

TAEM mi livim haos, mi no karem wan samting, mi gat ol klos we mi werem nomo. Long naet ya, ol bom oli faerap raonabaot, mo ni no save weples bambae mi go. Bitim sikis yia oli pas bifo we mi kambak long haos blong mi.

?Wanem samting i mekem se wan papa i kros tumas, i sakemaot pikinini blong hem? I gud we mi eksplenem olsem wanem samting ya i hapen.

Mi Gruap Long Wan Wol We i Fulap Long Fasin Blong No Laekem Ol Narafala

Papa mo mama blong mi oli laef long Beirut, Lebanon. Long taem bifo, plante turis oli glad blong kam long kantri ya. Be, stat long 1975, go kasem 1990, wan strongfala faet i spolem taon ya Beirut. Mi bon long yia 1969, mi mi fasbon blong wan famle blong Amenia we i gat tri pikinini. Taswe, ol faswan memori blong mi oli fulap long pis.

Papa mo mama blong mi oli stap long Amenia Apostolik Jos, be long wan yia, mama i tekem mifala i go long jos tu taem nomo, long Ista mo Krismas. Famle blong mifala i no strong long saed blong jos. Nating se i olsem, tufala i sanem mi mi go long wan skul blong ol Evanjelis we oli givim long mi save blong jos. Long taem ya, mi no intres long jos.

Wan samting we plante man Amenia oli lanem taem oli pikinini yet, hemia blong no laekem ol man Teki. Long Faswan Bigfala Faet blong Wol, ol man Teki oli kilim plante handred taosen man Amenia oli ded, mo oli sakemaot plante long olgeta afsaed long kantri blong Amenia. Long 1920 haf blong kantri long is i kam wan ripablik blong Soviet Yunion. Taem mi yangfala yet, mi gat strong tingting blong mekem se stret fasin i kamtru.

Tingting i Jenis

Be, long ol yia 1980, taem mi yangfala yet, ol tok we angkel blong mi i talem oli mekem tingting blong mi i jenis. Hem i talem se God we i gat Olgeta Paoa, i no longtaem bambae hem i stretem ol fasin we oli no stret. Hem i eksplenem se Jisas i tijim ol disaepol blong hem blong prea from wan Kingdom, mo God bambae i yusum Kingdom ya blong singaot ol man we oli ded long ol faet, blong oli laef bakegen long wol.—Matiu 6:9, 10; Ol Wok 24:15; Revelesen 21:3, 4.

Mi glad tumas. Mi wantem harem moa samting bakegen, mi stap askem plante kwestin. Samting ya i mekem se mi stadi Baebol long haos blong wan Witnes blong Jeova.

Taem mi kasem moa save long Jeova, Papa blong mi long heven, mo mi laekem Hem moa bakegen, mi fraet se wan dei bambae mi mas tekem wan bigfala disisen, hemia jusum bitwin famle blong mi mo Jeova God.—Ol Sam 83:18.

I Hadwok Long Wan Yangfala We i Gat 17 Yia Blong Jusum

Sloslou, mama i lanem se mi frengud wetem ol Witnes blong Jeova. Hem i kros tumas mo i tok strong blong mi stop stadi Baebol. Taem hem i luk se mi strong long ol bilif blong mi, hem i talem se bambae hem i tok long papa. Long taem ya, mi no fraet from we mi ting se bambae mi save stanap strong long fored blong papa blong mi. Be mi rong.

Taem papa i lanem se mi frengud wetem ol Witnes blong Jeova, hem i kros tumas. Hem i talem se sipos mi no stopem Baebol stadi blong mi, bambae hem i sakemaot mi afsaed long haos. Mi ansa se bambae mi no stop from we mi stap lanem trutok. Hem i singaot, i kraeaot, hem i tok nogud, mo afta hem i stat krae olsem wan pikinini. Hem i askem strong long mi blong mi stop frengud wetem ol Witnes.

Mi trabol tumas, mi stap bitwin tu papa—Jeova mo papa blong mi. Mi save se tufala i laekem mi bigwan mo mi wantem mekem tufala i hapi, be mi no save mekem samting ya. Mi no naf blong stanap strong long traem ya. Mi talem papa se mi mekem olsem hem i wantem. Long tingting blong mi, mi ting se taem mi olfala moa bambae mi stadi bakegen mo kam wan Witnes. Long taem ya, mi gat 17 yia nomo.

Biaen, mi sem long samting ya we mi bin mekem. Mi harem olsem se Jeova i no hapi mo mi no trastem ol tok blong Deved we i talem long ol Sam se: “Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” (Ol Sam 27:10) Be mi stap go long skul mo papa mo mama blong mi tufala i pem blong mi kasem edukesen ya.

Mi Stanap Moa Strong

Blong bitim tu yia, mi no visitim angkel blong mi mo ni no luk ol Witnes from we mi save se papa mama blong mi oli luk evri samting we mi mekem. Wan dei long 1989, taem mi gat 20 yia, mi mitim wan Witnes we mi save hem. Long kaengud fasin hem i askem sipos mi wantem kam blong visitim hem. Hem i no talem wan samting nating long saed blong wan Baebol stadi, taswe mi go luk hem.

Biaen, mi stat stadi Baebol mo go long ol miting we ol Witnes blong Jeova oli mekem long Haos Kingdom. Mi stadi long ples blong wok from we i no gat man i save spolem mi long ples ya. From samting ya, mi kasem save moa long ol nambawan fasin blong Jeova mo tu se i impoten blong stap klosap long Jeova mo frengud wetem Hem nomata wanem samting i save hapen. Long Ogis blong semfala yia, mi stat serem ol samting we mi lanem wetem ol narafala.   

Famle blong mi i no save nating yet. Sam dei biaen, mi mo papa blong mi mitufala i agensem mitufala bakegen. Be long taem ya, mi rere moa blong stanap strong. Hem i traem askem long kwaet fasin se: “Pikinini blong mi, ?i tru se yu stap frengud yet wetem ol Witnes blong Jeova?” I gat wota long ae blong hem taem hem i wet long ansa blong mi. Mama mo sista blong mi tufala i no mekem noes be oli stap krae.

Mi eksplenem se i no longtaem i pas, mi stap frengud bakegen wetem ol Witnes, mo tu se tingting blong mi strong blong kam wan Witnes. Nao, ol samting oli hapen kwiktaem tumas. Papa i singaotem ol tok ya we oli stap long fastok blong haf ya. Hem i holem mi mo i kraeaot se bambae hem i kilim mi mi ded bifo we mi save gowe long haos blong mifala. Mi naf blong ronwe, mo taem mi resis i godaon long ol step, mi harem yangfala brata blong mi i traem kwaetem papa blong mi. Mi prea long Jeova se “Naoia yu Papa blong mi, mi jusum yu, nao plis yu lukaotgud long mi.”

Oli Givimbak

Sam dei biaen, papa i go long haos blong angkel blong mi from we hem i ting se mi stap long ples ya. Hem i agensem angkel blong mi mo i wantem kilim hem i ded, be sam Witnes we oli kam visitim angkel oli stopem papa blong mi. Papa i lego be hem i talem se bambae hem i kambak. Smoltaem biaen, hem i kambak bakegen wetem ol soldia we oli gat masket. Oli tekem ol Witnes mo angkel blong mi we i sik tumas oli go long hedkwota blong olgeta.

Afta long samting ya, oli lukaot ol narafala Witnes long ples ya. Oli kam insaed long haos blong wan Witnes, oli tekem ol buk mo ol Baebol tu. Oli putum olgeta buk ya long rod mo oli bonem olgeta long faea. Oli holem sikis Witnes mo sam narafala man we oli stadi wetem ol Witnes ya. Oli putum olgeta long wan smosmol rum, oli askem kwestin long olgeta mo oli kilim olgeta. Oli yusum ol sigaret blong bonem samfala. Ol man raonabaot long ples ya oli kasem save long ol samting ya kwiktaem nomo. Ol soldia oli lukaot mi long evri ples. Papa blong mi i askem long olgeta blong faenem mi mo yusum evri rod blong mekem tingting blong mi i jenis.

Sam dei biaen, ol soldia oli kam insaed long Haos Kingdom taem wan kongregesen i gat miting. Oli sakemaot olgeta man, woman mo pikinini afsaed long haos. Oli tekemaot ol Baebol mo oli mekem olgeta oli wokbaot go kasem hedkwota. Long ples ya, oli askem kwestin long olgeta.

Mi Ronwe Long Gris

Taem ol samting ya oli hapen, mi stap long wan famle blong Witnes we i lukaot long mi, longwe long trabol. Wan manis biaen mi go long Gris. Taem mi kasem ples ya, mi givim laef blong mi long Jeova God mo mi tekem baptaes blong soemaot samting ya.

Long Gris, I haremgud from lav blong ol Kristin brata sista blong mi we oli kam long plante defren kantri—mo sam oli Teki tu. Mi luksave se ol tok ya blong Jisas oli tru, se: “Man we i tinghevi long mi, mo long gud nius blong mi, nao hem i lego haos blong hem, no brata no sista blong hem, no papa no mama blong hem, no pikinini blong hem, no graon blong hem, hem bambae i no save sot long ol samting ya. Tru mi talem long yufala. Long wol ya, wanem samting we hem i lego, olsem haos blong hem, no brata no sista blong hem, no mama blong hem, no pikinini blong hem, no graon blong hem, bambae hem i save kasem wan handred taem antap bakegen. Be ol man bambae oli mekem i nogud long hem tu. Be long niufala wol ya we bambae i kam, hem bambae i gat laef we i no save finis.”—Mak 10:29, 30.

Mi stap tri yia long Gris. Plante taem mi raetem leta i go long papa be hem i neva ansa long mi. Biaen, mi lanem se taem ol fren oli kam luk hem mo askem kwestin long saed blong mi, hem i talem se: “Mi no gat pikinini we i gat nem ya.”

Joengud Bakegen Afta Long Sikis Yia

Mi gobak long Beirut long 1992, taem faet i finis. Tru long wan fren, mi talem long papa blong mi se mi wantem kambak long haos. Hem i ansa se mi save kambak be mi mas lego bilif blong mi bifo. Mi no mekem olsem taswe mi stap long wan smol haos we mi rentem long tri yia. Long Novemba 1995, wantaem nomo papa i kam long ples we mi wok long hem mo i askem blong luk mi. Mi no stap taem hem i kam, ale hem i letem wan mesej se hem i wantem se mi kambak long haos. Fastaem, mi no wantem bilivim samting ya. Taswe tingting blong mi i no strong gud, taem mi go luk hem. Mifala i gat strong filing fastaem we mifala i joen bakegen. !Hem i talem se hem i no moa agensem mi olsem wan Witnes mo i hem wantem se mi kambak long haos bakegen!

Tede mi wok olsem wan Kristin elda mo fultaem paenia long wan kongregesen long lanwis Amenia. Plante taem, mi luk ol man olsem papa blong mi we oli agensem ol memba blong famle from we olgeta ya oli wantem mekem wok blong Jeova. Mi luksave se papa i tingting wetem fulhat blong hem se hem i stret taem hem i agensem wosip blong mi. Baebol i rerem ol Kristin taem hem i talem se maet famle i agensem olgeta.—Matiu 10:34-37; 2 Timoti 3:12.

Mi hop se wan dei papa blong mi mo ol narafala memba blong famle blong mi bambae oli serem hop blong mi we i stanap long Baebol, se bambae wan wol we i moagud i kamtru. Long taem ya bambae i no moa gat fasin blong faet no fasin blong kilim plante man oli ded. Mo from we stret fasin i stap i no moa gat man i mas lego kantri blong hem no i kasem hadtaem. (2 Pita 3:13) Mo long taem ya ol man bambae oli no mas jusum bitwin tu samting we oli sas tumas long olgeta.—Wan man i sanem stori ya i kam.