Wan Kwestin

God i givim woning long Ken se ‘sin i stap kolosap long doa, mo i wantem tumas blong winim hem,’ olsem wael anamol we i wantem kakae mit. (Jenesis 4:7) ?Sipos ol anamol bifo long Bigfala Wora, oli kakae gras nomo, from wanem oli yusum tok ya?

Long ol buk we Moses i raetem, yumi faenem sam vas we i talemaot ol samting no histri we i luk olsem se oli no stret wetem taem we oli hapen.

Eksampel, store we i stap long Jenesis 2:​10-14 i tokbaot ples we garen blong Iden i stap long hem. Moses i raetem se wan reva i stap “pas kolosap long ples ya Asiria, long saed blong hem we san i kam antap.” Be kantri blong Asiria i tekem nem blong hem long Asuru, boe blong Sem we i bon afta long Bigfala Wora. (Jenesis 10:​8-11, 22; Esikel 27:23; Maeka 5:6) I klia se, long stret store blong hem, we tabu speret i pusum hem blong raetem, Moses i yusum tok ya “Asiria” blong tokbaot wan eria we ol man we oli ridim buk blong hem oli savegud.

Tingbaot wan narafala eksampel long ol faswan japta blong Jenesis. Afta we Adam mo Iv tufala mekem sin mo God i ronemaot tufala long garen, Jeova i blokem tufala blong no kambak insaed long garen. ?Olsem wanem? Jenesis 3:24 i talem se: “Mo hem i putum ol jerubim oli stap gad long gudfala ples ya long Iden, long saed ya blong hem we san i stap kam antap. Mo i putum wan longfala naef blong faet i stap long ples ya tu, blong i gad long hem. Naef ya, faea i stap laet long hem, mo hem nomo i stap saksakem hem i go olbaot. Hae God i mekem olsem blong blokem rod, blong ol man bambae oli no save go kolosap long tri ya we frut blong hem i save givim laef.” Makemgud, ‘naef blong faet we faea i stap laet long hem.’ ?God nao i mekem ol naef blong faet fastaem?

Yumi no save talem se Man we i Wokem yumi we i laekem yumi tumas i faswan man we i wokem naef blong faet. Adam mo Iv tufala i luk wan samting we i stap tantanem fored long ol enjel, we faea i stap laet long hem. ?Rili, wanem ya samting ya? Long taem we Moses i raetem buk blong Jenesis, naef blong faet i wan samting we oli savegud mo oli yusum blong mekem faet. (Jenesis 31:26; 34:26; 48:22; Eksodas 5:21; 17:13) Taswe tok blong Moses se ‘naef blong faet we faea i stap laet long hem’ i halpem ol man we oli ridim buk blong hem blong pijarem smol long tingting blong olgeta wanem samting i stap long rod blong go insaed long Iden. Save we oli gat long taem blong Moses i givhan blong kasem save long ol bisnes olsem. Mo ol tok we Moses i yusum oli mas stret nomo, from we Jeova i mekem se oli raetemdaon long Baebol.​—2 Timote 3:16.

?Be olsem wanem long Jenesis 4:7? Long ples ya God i givim woning long Ken se: “Sipos fasin blong yu i stret, bambae mi mi glad long yu, be fasin blong yu i no stret. Mo from we fasin blong yu i no stret, fasin nogud ya blong yu i olsem wan wael anamol we i stap kolosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.” Olsem vas ya i talem, i luk olsem se i stap tokbaot wan wael anamol we i stap rere blong jyam kwiktaem blong kilim wan anamol blong kakae.

Nating se i olsem, Baebol i pruvum se Adam mo Iv tufala i gat pis wetem olgeta anamol. Maet sam long ol anamol ya oli no fraet blong stap kolosap long ol man, no ating oli haremgud blong stap kolosap long ol man. Ol narafala oli ol wael anamol, ol anamol we oli gat fasin blong stap longwe long ol man. (Jenesis 1:​25, 30; 2:19) Be, Baebol i no talem se wan long ol anamol ya i save kakae wan narafala anamol no i save kakae man. Fastaem olgeta, God i talem se ol defren frut mo gras nao oli stret kakae blong ol anamol mo blong ol man. (Jenesis 1:​29, 30; 7:​14-16) Samting ya i no jenis kam kasem biaen long Bigfala Wora, olsem Jenesis 9:​2-5 i soemaot.

?Oraet, olsem wanem nao long woning ya we God i givim long Ken, olsem yumi ridim long Jenesis 4:7? I tru se i isi long ol man long taem blong Moses blong tingbaot pija blong wan wael anamol we i rere blong jyam i go long narafala anamol we hem i wantem kakae, mo yumi tu yumi kasem save long hem. Taswe, bakegen, ating Moses i yusum ol toktok we ol man biaen long Bigfala Wora oli savegud. Mo nating se Ken i neva luk wan anamol olsem, hem i save kasem poen long woning ya we i laenap long tingting ya blong wantem mekem sin wetem wan wael anamol we i hanggri tumas.

Ol impoten samting we i mas gat bigfala paoa long yumi, hemia: Kaen fasin we God i gat blong givim woning long Ken, gudfala frut we i kamaot sipos yumi akseptem advaes wetem tingting daon, olsem wanem i isi blong fasin jelas i spolem wan man, mo olsem wanem yumi mas tinghevi long ol narafala woning we God i putum long Baebol from yumi.​—Eksodas 18:20; Eklesiastis 12:12; Esikel 3:​17-21; 1 Korin 10:11; Hibrus 12:11; Jemes 1:​14, 15; Jud 7, 11.