“I Strong Bitim Wan Bigfala Taon”

“FOLEM fasin we i stap naoia, samwe 40% long ol pikinini blong Yunaeted Stet, bambae oli luk en blong mared blong papa mama blong olgeta bifo we oli kasem 18 yia.” (Science, Jun 7, 1991) !Bigfala namba ya i mekem man i fraet tumas! ?From wanem samting ya i stap hapen?

Edward M. Ginsburg, wan jaj long saed blong ol trabol blong mared, long wan toktok wetem The Boston Globe, i givim tingting blong hem. Hem i talem se: “Yumi wan grup blong man we yumi tingbaot yumi nomo. Yumi wantem se i blong ‘mi.’ Yumi askem se, ‘?Mi save kasem wanem samting blong mi naoia from bisnes ya?’ Yumi wantem kasem samting blong yumi haremgud naoia nomo.”

Fasin ya we i olsem fasin blong pikinini, blong no tingbaot ol narafala man i mekem se kros mo rao i kamaot long mared. Jaj Ginsburg i talem se taem hasban mo waef tufala i kasem mak ya we oli stap pas long kot blong divos, tufala i wantem win nomo. Wanwan long tufala i wantem wan man i talem long olgeta se oli mekem i stret mo hasban no waef blong olgeta i rong. Oli wantem wan man i talem se: “Yu yu winim faet ya finis.”

Ol tok blong hem oli mekem yumi tingbaot proveb ya we i kamaot from tabu speret se: “Man we brata blong hem i mekem i no stret long hem, hem i save kam moa strong i bitim wan bigfala taon.” (Proveb 18:19) Yes, taem trabol i kamaot long wan mared, tufala we tufala i agensem tufala oli save talem mo mekem sam samting we oli no laenap nating wetem stret tingting mo oli save strong tumas. Plante taem, oli no wantem nating blong agri long samting we i stret, oli strong olsem “wan bigfala taon” we ol ami oli traem blong winim hem.

?Ol samting oli mas olsem? No gat, i gat wan narafala rod blong folem. Ol mared oli strong mo oli stap longtaem taem ol hasban mo waef, long stat blong mared, tufala i folem ol tok ya blong aposol Pol se: ‘Yufala i mas soem kaengud fasin long yufala, yufala i mas soem fasin sore long yufala wetem filing. Mo yufala i mas fogivim yufala, olsem we God i fogivim yufala finis, we yufala i joen long Kraes.’ (Efesas 4:32) ?I isi blong wokem ol fasin olsem? No gat, i no isi oltaem. ?Be divos i isi olsem wanem? ?Long wan mared we i brok, trabol long filing mo long saed blong mane i mekem tufala i soa olsem wanem? ?Mo olsem wanem long ol pikinini, we plante taem oli stap harem nogud from divos blong papa mama blong olgeta kasem taem we oli kam bigman?

I moa gud blong hasban mo waef tufala i wok blong lukaotgud long mared blong tufala, oli no mas kam olsem wan bigfala taon, we oli strong tumas, oli no rere blong agri. Advaes blong Pol long ol Kristin i tru moa long ol hasban mo ol waef se: “Yufala i mas laekem tumas ol man. From we fasin ya blong laekem tumas ol man, hem i save joenem olgeta samting, blong ol kam wan nomo stret.”​—Kolosi 3:14.

[Foto Credit Line blong pija long pej 32]

The Complete Encyclopedia of Illustration/J. G. Heck