Rao Blong Jeova Wetem Ol Nesen

“Bambae wan bigfala noes i go kasem ol ples long wol we oli farawe olgeta, from we Jeova i gat wan rao wetem ol nesen.”​—JEREMAEA 25:31.

1, 2. (a) ?Wanem i hapen long Juda afta long ded blong King Josia? (b) ?Hu i laswan king blong Juda, mo olsem wanem hem i harem nogud from fasin blong hem blong no stap tru long God?

KANTRI blong Juda i stap fesem ol hadtaem we i strong tumas blong winim. Wan gudfala king, Josia, i bin mekem se Jeova i holemtaet kros blong hem we i olsem faea. ?Be wanem i kamaot afta we oli kilim Josia long yia 629 B.K.T.? Ol king we oli kam biaen long hem oli mekem nogud long nem blong Jeova.

² Laswan king blong Juda, Sedekaea, namba fo pikinini boe blong Josia, i gohed, olsem 2 King 24:19 i talem, blong “mekem samting we i nogud long ae blong Jeova, olsem ol samting we Jeoakim, [fasbon brata blong hem] i bin mekem.” ?Wanem frut i kamaot? Nebukadnesa i kam agens long Jerusalem, i holemtaet Sedekaea, i kilim i ded ol pikinini boe blong hem long fes blong hem, i mekem Sedekaea i blaen, mo i tekem hem i go long Babilon. Antap long samting ya, ol man Babilon oli stilim ol kap we oli stap yusum long wosip blong Jeova, mo oli bonem haos prea mo taon ya wetem faea. Olgeta we oli no ded oli go kalabus long Babilon.

3. ?Bigfala trabol blong Jerusalem long yia 607 B.K.T. i statem wanem taem, mo wanem samting i mas kamaot long en blong taem ya?

³ Yia ya, 607 B.K.T., i makem laswan taem we oli spolem Jerusalem be tu i makem stat blong ‘rul blong ol hiten man,’ we Luk 21:24 i tokbaot. Ol 2,520-yia ya oli finis long laswan handred yia, long 1914. Long taem ya, hem i stret taem nao blong Jeova, tru long Pikinini blong hem, Jisas Kraes, we i tekem jea blong king, we i bigfala moa long Nebukadnesa, blong talemaot mo blong mekem jajmen i kamtru long rabis wol ya. Jajmen ya i kamaot fastaem long wan samting long taem blong yumi we i olsem Juda bifo, samting we i talem se hem i stap wok long nem blong God mo Kraes long wol.

4. ?Yumi save askem wanem kwestin long saed blong profet tok blong Jeremaea?

⁴ ?Yumi luksave se ol fasin olbaot we oli hapen long ol laswan yia blong Juda aninit long rul blong ol king blong hem​—we ol rabis wok blong hem oli stap spolem plante nesen we oli stap kolosap long hem, oli sem mak long ol fasin olbaot blong Krisendom tede? !Yes yumi luksave! ?Oraet nao, profet tok blong Jeremaea i talem wanem blong soem samting we bambae Jeova i mekem blong stretem ol trabol tede? Yumi luk.

5, 6. (a) ?Stat long 1914, olsem wanem ol samting we oli hapen long Krisendom oli sem mak long ol samting we oli hapen long Juda jes bifo we oli spolem hem? (b) ?Tede, grup ya we i olsem Jeremaea i stap talemaot wanem mesej long Krisendom?

⁵ Bertrand Russell, wan man Engglan, we i gat bigfala save long saed blong matematik mo i waes long tingting blong wol i talem 40 yia bifo se: “I stat long 1914, ol man we oli stap stadi long ol nyufala tingting we oli stap kamaot long wol, oli wari tumas from oli luk se wol ya i stap ron i go long wan rod we i olsem se wan man i makemaot finis, we bambae i kasem bigfala trabol moa.” Mo wan haeman blong gavman blong Jemani, Konrad Adenauer i talem se: “I stat long 1914, seftaem mo kwaet taem i lus long laef blong ol man.”

⁶ Tede, olsem long taem blong Jeremaea, fasin ya we ol man oli stap mekem fulap blad blong ol man we oli no gat fol i ron, antap moa long tu bigfala faet blong wol long laswan handred yia, i makem se en blong wan fasin blong laef i kolosap. Ol kantri blong Krisendom, we oli talem se oli stap wosip long God blong Baebol, olgeta nao, oli bighaf blong ol man we oli faet. !Oli gat tu fes ya! Yumi no sapraes se Jeova i sanem ol Wetnes blong hem blong talem long olgeta, olsem tok blong Jeremaea 25:​5, 6 se: “Tanem baksaed, plis, evriwan long ol rabis rod blong yufala mo long rabis fasin we yufala i stap mekem . . . Mo yufala i no mas wokbaot folem ol narafala god blong mekem wok blong olgeta mo blong mekem wosip long olgeta, blong yufala i no save mekem mi mi harem nogud from ol wok we han blong yufala i stap mekem, mo bambae mi no save mekem bigfala trabol long yufala.”

7. ?Wanem samting i pruvum se Krisendom i sakemaot ol woning blong Jeova?

⁷ Be, ol kantri blong Krisendom oli no bin tanem baksaed long ol rabis rod blong olgeta. Oli bin soemaot samting ya taem oli stap gohed blong mekem sakrifaes long god blong faet, long ol faet we oli mekem long Koria mo Vietnam. Mo oli stap gohed blong givim mane long ol man blong kilim man i ded, hemia ol man blong wokem ol tul blong faet. Ol kantri blong Krisendom oli givim bighaf blong kolosap wan trilyan dola blong pem tul blong faet long ol wanwan yia biaen long 1980. Stat long 1951 kasem 1991, mane we oli givim from tul blong faet long Yunaeted Stet nomo, i bitim profit we olgeta kampani blong Amerika oli winim. Stat long taem we oli talemaot en blong Kol Wo,a oli bin spolem sam long ol olfala nyuklia tul blong faet, be i gat ol bigbigfala dok oli stap yet, we oli fulapgud long ol narafala tul blong faet we oli save givim ded, mo ol man oli stap gohed blong mekem moa. Wan dei maet oli yusum ol tul ya.

Jajmen Agens Long Krisendom We i Letem Enikaen Fasin Nomo

8. ?Olsem wanem ol tok blong Jeremaea 25:​8, 9 bambae i kamtru long Krisendom?

⁸ Ol tok we Jeova i gohed blong talem, we yumi faenem long Jeremaea 25:​8, 9, naoia i go stret long Krisendom, we hem i no stap folem ol Kristin rul long saed blong stret fasin se: “From samting ya hemia nao ol samting we Jeova blong ol ami i talem, ‘From yu no bin obei long ol tok blong mi, yu luk, bambae mi mi sanem toktok i go mo bambae mi tekem olgeta famle blong not,’ hemia tok we Jeova i talem, ‘mo tu bambae mi sanem toktok i go long Nebukadnesa king blong Babilon, man blong wok blong mi, mo bambae mi tekem olgeta oli kam agens long kantri ya mo agensem ol man blong hem mo agensem ol nesen ya we oli stap raonabaot long hem; mo bambae mi spolemgud olgeta mo bambae mi mekem olgeta oli kam wan samting blong sapraes mo samting blong wisel long hem mo ol ples ya bambae oli nogud blong olwe.’” Taswe, bambae bigfala trabol i kamaot fastaem long ol man ya we oli stap talem se oli ol man blong God, Krisendom, biaen bambae i go moa long olgeta man long wol, long ‘olgeta nesen we oli stap raonabaot.’

9. ?Long wanem rod Krisendom i kam moa nogud long saed blong speret long taem blong yu?

⁹ Bifo, Krisendom i respektem Baebol, mo long olgeta ples long wol, kolosap olgeta man oli tingbaot mared mo famle laef olsem wan samting we i save givim bigfala glad, long taem ya ol man oli girap eli long moning mo oli faenem glad long wok blong olgeta evridei. Plante oli haremgud long tingting blong olgeta taem oli ridim mo stadi long Tok blong God wetem wan laet long sapa. Be tede, rabis fasin blong seks, divos, fasin nogud blong yusum drag mo dring tumas, fasin stronghed, fasin griri, fasin les long wok, lukluk televisin bitim mak, mo ol narafala rabis fasin, oli bin spolem laef kasem wan mak we i mekem man i fraet. Hemia nao samting we i kamaot jes bifo long bigfala trabol we Jeova God i rere finis blong mekem, blong spolemgud Krisendom we i stap letem enikaen fasin nomo.

10. ?Olsem wanem long Krisendom afta we hem i kasem jajmen blong Jeova?

¹⁰ Jeova i talem, olsem yumi ridim long Jeremaea japta 25, vas 10 mo 11 se: “Bambae mi tekemaot noes blong glad mo noes blong ol singsing we oli haremgud long olgeta, bambae mi tekemaot voes blong man mo woman we tufala i jes mared, mo noes blong ston we i stap graenem wit i kam flaoa, mo laet we i stap saenaot. Mo olgeta ples ya bambae oli kam olsem drae ples nomo, bambae oli kam samting blong sapraes.” Tru ya, bambae i rili wan samting blong sapraes taem ol strongfala haos prea mo ol flas haos blong Krisendom oli brobrok gogo oli kam nogud olgeta. ?Bambae trabol ya i kasem wanem mak? Long taem blong Jeremaea, Juda mo ol kantri we oli stap kolosap oli stap nogud gogo kasem 70 yia, mo Ol Sam 90:10 i tokbaot 70 yia olsem namba long ol yia blong laef blong man. Long taem blong yumi, bambae jajmen blong Jeova i fulwan, i blong olwe.

Jajmen Agens Long Bigfala Babilon

11. ?Bambae Jeova i yusum hu blong spolem Krisendom? ?From wanem?

¹¹ Olsem Revelesen 17:​12-17 i talem, i gat taem i stap kam we bambae Jeova i statem narakaen wok blong hem taem hem i putum long tingting blong “ol ten hon”​—ol memba blong Yunaeted Nesen we oli rere blong faet​—“blong mekem olsem we hem i wantem,” blong spolem ogenaesesen blong olgeta gyaman skul raonabaot long wol. ?Olsem wanem bambae samting ya i kamtru? I gat plante rod we “ol ten hon” blong Revelesen japta 17 oli save mekem, olsem vas 16 i talem, blong “agensem [woman blong rod ya] nao. . . bambae oli bonem hem long faea blong spolem hem olgeta.” I tru se oli bin mekem plante moa nyuklia tul blong faet mo oli stap gohed blong karem plante moa i go long olgeta ples long wol we ol man oli rere blong faet long olgeta. Be yumi mas wet mo luk olsem wanem bambae Jeova i putum tingting ya long hat blong ol politik rula blong bambae oli mekem jajmen blong hem i kamtru.

12. (a) ?Wanem i hapen long Babilon afta we hem i spolem Jerusalem? (b) ?Wanem bambae i hapen long ol nesen afta we Krisendom i lus?

¹² Long taem bifo, Babilon i kasem taem blong hem blong harem kros blong Jeova we i olsem faea. Folem samting ya, stat wetem Jeremaea japta 25, vas 12, profet tok ya i tokbaot ol samting we oli kamaot biaen long taem ya, mo i tokbaot long wan defren fasin. Jeova i no moa tokbaot Nebukadnesa mo Babilon olsem we tufala i blong mekem jajmen blong Jeova i kamtru, naoia tufala tu i stap long medel blong olgeta nesen blong wol. Samting ya i sem mak long ol samting we oli stap hapen tede. “Ol ten hon” blong Revelesen japta 17 bambae oli spolemgud ol gyaman skul, be biaen bambae tufala i lus wantaem wetem ol narafala “king blong wol,” olsem Revelesen japta 19 i tokbaot. Jeremaea 25:​13, 14 i tokbaot olsem wanem Babilon, wetem “olgeta nesen” we oli stap mekem nogud long ol man blong Jeova, bambae oli kasem jajmen. Jeova i bin yusum Nebukadnesa olsem man blong kilim ol man, blong panisim Juda. Be Nebukadnesa wetem ol king blong Babilon we oli kam biaen long hem, oli kam flas, nao oli leftemap olgeta agens long Jeova hem wan. Eksampel, oli soemaot samting ya taem oli stilim ol kap blong haos prea blong Jeova. (Daniel 5:​22, 23) Mo taem ol man Babilon oli spolem Jerusalem, ol kantri ya we oli stap kolosap long Juda​—hemia Moab, Amon, Taea, Edom, mo ol narafala kantri​—oli glad mo oli jikim ol man blong God. Olgeta tu, bambae Jeova i givim panis long olgeta stret long ol samting we oli mekem.

Jajmen Agens Long “Ol Nesen”

13. ?‘Kap blong waen blong bigfala kros’ i minim wanem, mo wanem bambae i hapen long olgeta we oli dring long kap ya?

¹³ Taswe, Jeremaea i talem, olsem i stap long japta 25, vas 15 mo 16 se: “Hemia samting we Jeova God ya blong ol man Isrel i talem long mi: ‘Kap blong waen ya we i minim bigfala kros blong mi, yu mas tekemaot long han blong mi, mo yu mas karem i go long ol nesen we bambae mi sanem yu long olgeta, mo yu mas mekem olgeta oli dring long hem. Bambae oli mas dring long hem, mo bambae oli seksek we oli no moa save stanap strong. Bambae oli kam olsem ol krangke man, from naef blong faet we bambae mi putum long medel blong olgeta.’” ?From wanem hem i wan ‘kap blong waen we i minim bigfala kros blong Jeova’? Long Matyu 26:​39, 42 mo Jon 18:​11, Jisas i tokbaot wan “kap” olsem pija blong wil blong God long hem. I sem mak, wan kap i olsem pija blong wil blong Jeova long ol nesen, blong oli dring long hem taem hem i givimbak long olgeta. Jeremaea 25:​17-26 i talem nem blong ol nesen ya we oli pija blong ol nesen tede.

14. Olsem profet tok blong Jeremaea i soemaot, ?hu bambae i dring long kap blong waen we i minim bigfala kros blong Jeova, mo samting ya i pija blong wanem long taem blong yumi?

¹⁴ Olsem Juda, Krisendom bambae i kam ‘wan samting blong sapraes mo blong wisel long hem mo blong mekem trabol long ol man,’ mo biaen long samting ya bambae bigfala trabol i kasem ol narafala gyaman skul long wol. !Biaen, fulwan wol, we Ijip i pija blong hem, bambae i mas dring long kap blong waen ya we i minim kros blong Jeova! Yes, “olgeta king blong not we oli stap farawe mo kolosap, wan afta long narawan, mo ol narafala kingdom blong wol we oli stap long graon ya” oli mas dring. Laswan olgeta, “king blong Sesak hem wan bambae i dring afta long olgeta.” ?Mo hu ya “king blong Sesak”? Nem ya Sesak i wan pija tok, wan nem we mining blong hem i haed, no wan saen blong talem Babilon. Olsem we Setan i king blong Babilon bifo we man i no save luk, ale hem i “masta long wol ya” kasem tede, olsem Jisas i soemaot. (Jon 14:30) Olsem nao, Jeremaea 25:​17-26 i laenap wetem Revelesen japta 18 kasem japta 20 blong mekem ol samting oli klia, ol samting we bambae oli kamaot wan afta narawan taem Jeova i pasem kap blong bigfala kros blong hem i goraon. Fastaem, ogenaesesen blong ol gyaman skul i mas lus, afta, ol politik paoa, mo biaen long taem ya, Setan bambae i go long bigfala hol ya we i godaon we i godaon.​—Revelesen 18:8; 19:​19-21; 20:​1-3.

15. ?Bambae wanem i hapen taem oli talemaot ‘pis mo seftaem’?

¹⁵ Stat long taem ya we i luk olsem Kol Wo i finis mo wan bigfala wol paoa nomo i stap, oli bin mekem plante toktok long saed blong pis mo seftaem. Olsem Revelesen 17:​10 i talem, bigfala wol paoa ya, namba seven hed blong wael anamol, i mas “stap smoltaem nomo.” Be “smoltaem” ya kolosap i kasem en blong hem. I no longtaem, ‘bigfala trabol we bambae i kam kasem olgeta, i spolem olgeta wantaem nomo’ bambae i tekem ples blong ol bigfala toktok blong politik long saed blong ‘pis mo seftaem.’ Aposol Pol i talem tok olsem.​—1 Tesalonaeka 5:​2, 3.

16, 17. (a) ?Sipos wan man i traem blong ronwe long jajmen blong Jeova, bambae hem i kasem wanem? (b) ?Bambae i no longtaem, wil blong Jeova i kamaot long wol long wanem rod we bambae i spolem plante samting?

¹⁶ Fulwan wol blong Setan, stat wetem Krisendom, oli mas dring long kap blong Jeova blong givimbak. Wan narafala oda we hem i givim long Jeremaea, we i stap long japta 25, vas 27 kasem 29, i tokbaot samting ya se: “Yu mas talem long olgeta, ‘Hemia samting we Jeova blong ol ami, God ya blong ol man Isrel i talem, se: “Dring mo yufala i drong mo traot mo foldaon, mekem se yufala i no save girap from naef blong faet we mi stap sanem i kam long yufala.”’ Mo sipos oli no wantem tekem kap ya long han blong yu blong dring long hem, yu mas talem long olgeta tu se, ‘Hemia samting we Jeova blong ol ami i talem: “Tru ya bambae yufala i mas dring. From we, !yu luk! bambae mi mi mekem bigfala trabol fastaem long taon ya we oli putum nem blong mi long hem, mo ?i stret we bambae yufala i faenem rod blong no kasem panis?”’ ‘Yufala i no save go fri we yufala i no kasem panis, from i gat wan naef blong faet we mi stap singaot i kam agens long olgeta man blong wol,’ hemia tok blong Jeova blong ol ami.”

¹⁷ Hemia ol strong tok ya​—i tru, ol tok we oli mekem man i fraet, from we Hae Masta blong heven mo wol, Jeova God nao i talem. Long plante taosen yia, hem i bin gat longfala tingting blong fesem ol rabis tok, nogud fasin, mo bigfala hif blong fasin agens we ol man oli bin hivimap long tabu nem blong hem. Be, taem i kam finis blong hem i ansa long prea blong Pikinini blong hem we i laekem tumas, Jisas Kraes, we hem i tijim long ol disaepol blong hem taem hem i stap long wol se: “From samting ya, i stret blong yufala i prea olsem hemia. ‘Papa blong mifala we yu stap long heven, nem blong yu i tabu. Mifala i wantem we olgeta man oli ona long yu, mo we yu yu kam king blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.’” (Matyu 6:​9, 10) Hem i wil blong Jeova se Jisas i mas wok olsem naef blong faet blong Hem blong givimbak.

18, 19. (a) ?Hu ya man we i ron long hos blong win long nem blong Jeova, mo from wanem hem i wet bifo we hem i finisimgud faet blong hem? (b) ?Taem ol enjel oli lego strong win blong bigfala kros blong Jeova, wanem samting we i mekem man i fraet tumas bambae i kamaot long wol?

¹⁸ Long fashaf blong Revelesen japta 6, yumi ridim se Jisas i stap ron i go long wan waet hos ‘blong bambae i win olgeta.’ (Vas 2) Samting ya i stat taem hem i tekem jea blong hem olsem King blong heven long 1914. Ol narafala hos mo ol man we oli stap ron long olgeta, oli kam biaen long hem. Oli pija blong olgeta faet, fasin we man i sot long kakae, mo ol strostrong sik we i bin gohed blong mekem trabol long wol blong yumi stat long taem ya. ?Be wetaem bambae olgeta trabol ya oli finis? Revelesen japta 7 i soem long yumi se fo enjel oli stap holemtaet ‘ol fo win long ol fo kona blong wol’ gogo kasem we Isrel long saed blong speret mo wan bigfala hif blong man we oli kamaot long olgeta nesen oli hivap blong kasem laef. (Vas 1) ?Ale wanem i bin kamaot?

¹⁹ Jeremaea japta 25, long vas 30 mo 31, i gohed se: “‘Antap olgeta, bambae Jeova hem wan i singaot bigfala, mo long tabu ples we hem i stap long hem, bambae hem i lego voes blong hem i kamaot. Bambae hem i mas singaot bigwan antap long ples blong hem. Long wan bigfala voes olsem hemia blong olgeta we oli stap purumbut long frut blong rop blong givim waen, bambae hem i singaot agens long olgeta man long wol. Tru ya bambae wan bigfala noes i go kasem ol ples long wol we oli farawe olgeta, from we Jeova i gat wan rao wetem ol nesen. Hem wan bambae i mekem kot long olgeta man. Long saed blong ol rabis man, bambae hem i letem naef blong faet i kam long olgeta.’ Hemia tok blong Jeova.” Bambae wan nesen i no save ronwe nating blong no dring long kap ya we i minim bigfala kros blong Jeova. From samting ya, i impoten tumas se olgeta we hat blong olgeta i stret, oli mas aot kwiktaem long ol rabis fasin blong ol nesen, bifo we ol fo enjel oli lego strongfala hariken blong bigfala kros blong Jeova. Tru ya, olsem wan hariken stret, from we profet tok blong Jeremaea i gohed long vas 32 mo 33 se:

20. ?Wanem pija long tingting blong yumi i makem se jajmen blong Jeova bambae i strong tumas, be from wanem wok ya i mas kamaot?

²⁰ “Hemia nao tok blong Jeova blong ol ami, se: ‘!Yu luk! Wan bigfala trabol i stap go blong kasem olgeta nesen long wol wanwan. Mo wan bigfala win olsem hariken bambae i girap long ol ples long wol we oli farawe tumas. Mo tru, ol man we Jeova i kilim i ded olgeta, long dei ya, bambae ol dedbodi blong olgeta oli stap olbaot long wol, i stat long wan saed blong wol i go kasem narasaed blong wol. Bambae i no gat man i krae long olgeta, bodi blong olgeta bambae i stap olsem nomo mo bambae man i no berem olgeta. Bambae oli kam olsem makas long graon nomo.’” Ol tok ya oli mekem wan pija long tingting we i rili mekem man i fraet, be wok ya i mas kamtru blong klinimaot ol rabis fasin long wol ya bifo we promes blong God long saed blong Paradaes i kamtru.

Ol Man Blong Lukaot Sipsip Oli Krae Mo Oli Singaot

21, 22. (a) Long Jeremaea 25:​34-36, ?hu ya “ol man blong lukaot long sipsip” long Isrel, mo from wanem oli mas krae? (b) ?Hu ya ol man blong lukaot sipsip tede we oli mas kasem kros blong Jeova, mo from wanem i stret we oli kasem?

²¹ Vas 34 kasem 36 i gohed blong tokbaot jajmen blong Jeova, i se: “!Yufala ol man blong lukaot long sipsip, yufala i krae, yufala i singaot! Yufala ol haeman long medel blong ol sipsip, yufala i tantanem yufala, from we taem i kam finis blong kilimdaon yufala, mo blong saksakem yufala, yufala i go olbaot. !Mo yufala i mas brobrok olsem wan naes graonpot! Mo ol man blong lukaot sipsip oli no moa gat ples blong go haed long hem, mo ol haeman blong ol sipsip oli no gat rod blong ronwe. !Yu harem! Krae blong ol man blong lukaot long sipsip, mo bigfala voes blong ol haeman blong ol sipsip, from we Jeova i stap spolem yad blong olgeta.”

²² ?Hu ya ol man ya blong lukaot long sipsip? Oli no ol lida blong skul, we oli dring finis long kros blong Jeova. Oli ol man blong lukaot long sipsip we oli rere wetem ol tul blong faet, we Jeremaea 6:​3 tu i tokbaot, we oli hivimap ol ami blong olgeta long ol bigbigfala grup blong faet agens long Jeova. Oli ol politik rula, we oli kam rij finis from ol man we oli stap aninit long olgeta. Plante long olgeta ya oli ol man blong pem mo salem samting, we oli gat gudhan blong mekem kruked fasin. Oli no bin hareap blong blokem fasin blong sot long kakae we i stap spolem plante man long ol pua kantri. Oli mekem “ol haeman blong ol sipsip,” olsem ol bigfala bisnes man blong salem tul blong faet mo ol griri man blong spolem win, wora mo graon, oli rij finis, be long semtaem oli no wantem givim smol mane nating blong pem meresin mo gudfala kakae we i save sevem plante milyan pikinini we oli stap ded.

23. ?Afta long bigfala trabol we bambae Jeova i mekem, olsem wanem long ples we Setan i stap wok long hem?

²³ Yumi no sapraes we long en blong Jeremaea japta 25, long vas 37 mo 38, i tokbaot olgeta ya we oli stap tingbaot olgeta nomo, ale oli bin lukaot pis blong olgeta nomo, se: “Ol ples we ol man oli stap long olgeta long pis oli no moa gat wan laef samting long olgeta, from we kros blong Jeova i hot tumas. Hem i bin livim ples blong hem olsem wan yangfala man laeon, from we kantri blong olgeta i bin kam wan samting blong sapraes, from raf fasin blong yusum naef blong faet mo from kros blong hem we i hot tumas.” !I rili wan samting blong sapraes! Be, yumi save sua se kros blong Jeova we i hot tumas bambae i kamtru, tru long Man ya we Revelesen 19:​15, 16 i tokbaot olsem “King blong ol king, mo Masta blong ol masta,” we bambae i lidim olgeta nesen long woking stik we oli wokem long aean. ?Mo bambae wanem i kamaot afta?

24. ?Taem ol gyaman skul mo ol narafala haf blong wol blong Setan oli lus, ol stret man bambae oli kasem wanem blesing?

²⁴ ?Yu bin stap long wan taem blong hariken no wan strong win? Hem i wan ekspiryens we i mekem yu fraet tumas. Be long nekis dei, nating we yu luk plante samting raonabaot oli kam nogud, kolosap evritaem skae i kliagud mo ples i kwaet mekem se yu haremgud mo yu save talem tangkyu long Jeova from wan dei we i nambawan tumas. Long sem fasin, taem strong win blong bigfala trabol i godaon, yu save lukluk wol ya wetem fasin tangkyu se yu yu laef mo yu rere blong joen long narafala wok blong Jeova blong klinim wol blong i kam wan gudfala paradaes. Long taem ya, rao blong Jeova wetem ol nesen i kasem en blong hem fulwan, hem i leftemap nem blong hem mo i openem rod blong wil blong hem i kamaot long wol aninit long Wan Taosen Yia Rul blong Kingdom blong Mesaea. !I gud Kingdom ya i kam kwik!

[Futnot]

Tingtingbak paragraf 5-24 long haf ya

◻ ?Wanem ol fasin tu fes blong Krisendom we naoia hem i kasem jajmen from?

◻ ?Yumi save luk wanem bigfala wok blong jajmen ya we i kamaot long Jeremaea 25:​12-38?

◻ ?Wanem kap ya we i fulap long fasin givimbak we bambae i kasem olgeta nesen?

◻?Hu ya ol man blong lukaot long sipsip we oli singaot mo oli krae, mo from wanem oli harem nogud?

[Tok blong pija long pej 18]

Jeova i jusum finis tul we bambae hem i yusum blong spolem Krisendom

[Tok blong pija long pej 23]

Afta we strong win blong bigfala trabol i godaon, bambae wan wol we i klin i kamaot