Wan Kwestin
Taem ol soldia blong Sol oli kakae mit wetem blad, ?from wanem oli no ded, from we hemia nao panis ya we God i talem long Loa blong hem?
Ol man ya oli brekem loa blong God long saed blong blad, be maet oli bin soemaot fasin sore long olgeta from we oli gat respek long blad, nating se oli mas traehad moa blong soemaot respek olsem.
Lukluk long problem ya. Ol man Isrel we oli stap aninit long King Sol mo boe blong hem Jonatan oli stap faet wetem ol man Filistaen. Taem faet ya i kasem mak we “i strong tumas long ol man Isrel,” Sol i kwik tumas blong mekem promes se ol man blong hem oli no mas kakae kasem we oli winim ol enemi blong olgeta. (1 Samuel 14:24) I no longtaem promes ya i mekem wan problem i kamaot.
Ol man blong hem oli stap winim strong faet ya, be hadwok blong olgeta i stap mekem olgeta oli harem nogud. Oli hanggri mo paoa blong olgeta i finis. ?Oli mekem wanem long taem ya we oli harem nogud tumas? “Ol man ya oli stat blong tekem samting blong ol man we oli winim long faet, long griri fasin, mo oli tekem ol sipsip mo ol buluk mo ol pikinini buluk mo kilim olgeta daon long graon, mo ol man ya oli foldaon long fasin ya blong kakae mit wetem blad.”—1 Samuel 14:32.
Hemia i agensem loa blong God long saed blong blad, olsem sam long ol man blong Sol oli talem long hem se: “!Yu luk! Ol man ya oli mekem sin agens long Jeova taem oli kakae mit ya wetem blad.” (1 Samuel 14:33) Yes, Loa i talem se taem oli kilim ol anamol, oli mas kafsaedem blad blong hem bifo we oli kakae mit blong hem. God i no talem se oli mas mekem ol samting we i bitim mak blong tekemaot ol laswan drop blong blad. Sipos oli mekem ol samting we i stret blong mekem ol blad i ron, ol man blong hem oli save soemaot respek long bigfala mining blong blad. (Dutronome 12:15, 16, 21-25) Oli save yusum blad blong anamol blong mekem sakrifaes long olta, be i no blong kakae. Sipos oli save loa ya be oli brekem, oli save kasem panis blong ded, from we, God i talem long ol man blong hem se: “Yu no mas kakae blad blong enikaen mit, from blad i olsem laef blong olgeta samting. Eni man we i kakae, bambae i ded.”—Levitikas 17:10-14.
?Ol soldia blong King Sol oli minim blong brekem Loa? ?Oli soemaot se oli no wantem obei nating long loa blong God long blad?—Skelem Namba 15:30.
Yumi no nidim blong tingting olsem. Store ya i talem se oli ‘kilim ol anamol daon long graon mo kakae mit wetem blad.’ Taswe, maet oli bin traem blong mekem wan samting blong kafsaedem blad. (Dutronome 15:23) Be, taem oli no moa gat paoa, mo oli hanggri, oli no hangem anamol we oli kilim finis mo letem taem blong blad blong hem i ronaot. Oli kilim ol sipsip mo ol buluk “daon long graon,” samting ya i save mekem se blad i ronaot slou. Mo oli kwik blong katem mit blong anamol we i ded we maet blad i stap ronaot long hem yet. Taswe, nating sipos oli tingbaot blong obei long loa blong God, oli no gohed blong folem prapa rod blong hem no blong mekem fulwan.
Samting we i kamaot se “ol man ya oli foldaon long fasin ya blong kakae mit wetem blad,” we i wan sin. Sol i luksave samting ya mo i givim oda ya se bambae oli rolem wan bigfala ston i kam long hem. Hem i talem long ol soldia se: “Wanwan long yufala i karem buluk mo sipsip blong hem i kam long mi, mo yufala i mas kilim long ples ya mo kakae, mo yufala i no mas mekem sin agens long Jeova taem yufala i kakae mit wetem blad.” (1 Samuel 14:33, 34) Ol soldia ya we oli bin mekem sin ya oli obei long hem, mo “Sol i bildim wan olta i go long Jeova.”—1 Samuel 14:35.
Ating fasin blong kilim ol anamol long ston i mekem se blad i ronaot gud. Oli save kakae mit blong anamol longwe lelebet long ples we oli kilim anamol long hem finis. Maet Sol i putum sam long ol blad ya we i ronaot, long olta blong askem fasin sore blong God from ol man we oli bin mekem sin. Jeova i soemaot sore long olgeta, ating from we hem i save wanem ol soldia oli bin traehad blong mekem, nating se oli taed mo hanggri. Mo tu, maet God i bin tingbaot se promes we Sol i kwik tumas blong mekem, i fosem ol man blong hem blong mekem samting ya we i bitim mak.
Store ya i soemaot we wan trabol we i pusum yumi blong mekem wan samting kwiktaem, i no wan risen blong no obei long loa blong God. I mas halpem yumi tu blong luksave nid ya blong tingtinggud bifo yumi mekem wan promes, from we wan promes we i kwik tumas i save mekem ol problem long yumi wanwan mo long ol narafala.—Eklesiastis 5:4-6.