Ripot Long Wok Blong Kingdom
God i Stap Mekem i Sem Mak Nomo Long Olgeta Man
BITIM 1,900 yia bifo, aposol Pita i talem long Konilyas, wan kapten blong ol soldia, i se: “Naoia mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.” (Ol Wok 10:34, 35) Konilyas i soem fasin fraetgud long God mo i soem se hem i laekem stret fasin. Hem i akseptem mesej we Pita i givim mo i kam wan Kristin.
Semfala rul ya i tru yet long taem blong yumi—God i stap mekem i sem mak nomo long olgeta man. Yumi makemgud samting ya long wan ekspiryens long Jemani. Ripot i talem se:
“Long teritori blong kongregesen blong mifala, i gat ol bigfala haos we ol ami blong Rasia oli stap long olgeta. Long 1989, smoltaem afta we Stonwol blong Belin i foldaon, ol elda oli askem sipos wan long ol pablisa i save toktok lanwis Rasia. Sam long mifala i toktok, mo mifala i go blong prij long teritori ya, we i givim wan bigfala glad long mifala. Ekspiryens we i kam biaen i wan long plante ekspiryens we mifala i kasem.
“Mi mi stap prij wetem wan pablisa we i no baptaes yet (we naoia hem i baptaes finis) ale mitufala i toktok long wan kapten blong ol ami. Kapten ya i lesin long samting we mitufala i wantem talem, mo biaen hem i askem mitufala blong storeyan wetem ol soldia blong hem. Hem i talem se oli mas harem store long saed blong God mo Baebol tu, ale mitufala i mekem plan blong kambak.
“Mitufala i askem wan sista we i toktokgud lanwis Rasia blong kam wetem mitufala blong tanem tok blong mitufala i go long lanwis Rasia. Insaed long bigfala rum blong spel blong ol ami, mifala i putum plante buk antap long tebel mo mifala i toktok long 68 soldia mo ansarem ol kwestin blong olgeta. Biaen, oli glad tumas blong tekem 35 buk mo kolosap 100 magasin. Taem mifala i livim rum ya, mifala i luk sam smosmol grup we oli stap storeyan long saed blong ol buk ya.
“Mifala i mekem plan blong kambak long Julae 4, 1992. Taem mifala i kam kasem ples ya long 10:50 long moning, man we i lukaot long get i talem long mifala se ol soldia oli stap wet long mifala. Wan haeman blong ol ami i tekem mifala i go insaed long bigfala rum blong spel, mo mifala i faenem se wan woman, we bifo hem i bin tekem sam buk long mifala blong putum long ples blong putum buk, hem i bin livim ol kad long ol haos blong ol soldia blong talem se bambae mifala i kam. Tri brata oli givim ol sotfala tok long saed blong wok blong mifala long olgeta ples long wol mo trifala i soem from wanem yumi save bilif long Baebol. Biaen mifala i lesin long ol kwestin blong olgeta, mo mifala i yusum Baebol blong givim ansa. Wan long ol kwestin ya se, ?Wanem tingting blong ol Wetnes blong Jeova long saed blong wok long ami, mo i gat wan long ol Wetnes we i soldia? Samting ya i givim jans long pablisa ya we i no baptaes yet we i bin joen wetem mi fastaem, blong tokbaot 25 yia we hem i bin wok olsem ami long Is Jemani, mo long ol laswan yia, hem i wok olsem wan kapten blong ol plen blong faet. Hem i tokbaot olsem wanem hem i bin kasem save long saed blong God mo Baebol, mo naoia i wantem kam wan Wetnes blong Jeova. Ol soldia oli sapraes tumas taem oli harem samting ya. Long seven menet nomo ol soldia oli tekem olgeta buk we mifala i karem i kam, mo plante long olgeta oli wantem Baebol. Long wan stoa blong salem buk, mifala i kasem seven Baebol long lanwis Rasia, mo ol soldia oli glad blong kasem ol buk ya. Hem i wan bigfala glad blong givim save blong Baebol long olgeta ya we oli hanggri long saed blong speret, mo mifala i hop se bambae oli folem ol save ya.”
Tru ya, God i stap mekem i sem mak nomo long olgeta man. Tru long Tok blong hem, hem i pulum olgeta we hat blong olgeta i stret, nating se oli wanem kaen man, mo weples oli stap long hem. Hem i wantem se oli kasem save long hem mo long Pikinini blong hem, Jisas Kraes, mo plante man oli stap mekem samting ya, nating se oli gat ol defren kaen wok long laef.—Jon 17:3.