Ol Fren Mo Famle Blong Yu We Oli Ded—?Oli Stap Wea?

ALEC i harem nogud tumas.Long wan wik nomo, hem i lusum tu fren blong hem. Wan long tufala, Nevil, i ded from wan man i sutum hem long masket. Narawan, Tony, i ded long wan akseden long trak. Boe ya blong Saot Afrika we i gat 14 yia, naoia i tingbaot ol kwestin we hem i no tingbaot bifo. Hem i wantem save, ?From wanem ol man oli mas ded? ?Mo wanem i kamaot afta long ded?

Long rod blong hem blong go long sevis blong berem Nevil, Alec i rili hop se bambae hem i kasem ansa blong ol kwestin ya. “Be,” hem i talem se, “pris i jes ridimaot tok blong wan buk mo i talem se Nevil i go long heven finis. Biaen, long beregraon, hem i talem se yumi stap wet long taem we bambae ol dedman oli laef bakegen. Tingting blong mi i fasfas. Sipos Nev­il i stap long heven, ?olsem wanem hem i save stap wet long laef bakegen?”

Biaen, long sem dei ya, Alec i go long sevis blong berem Tony. Oli mekem sevis ya we i stanap long kastom long wan lanwis we hem i no save. Be, fasin blong samfala we oli krae bitim mak i pruvum long Alec se tok we oli harem i no leftemap tingting blong olgeta nating. Hem i eksplenem se, “Long sem naet ya mi harem nogud tumas. Tingting blong mi i foldaon bigwan mo i fasfas. I no gat man we i save givim stret ansa long ol kwestin blong mi. Hemia i fastaem long laef blong mi, we mi rili wantem save sipos i gat wan God.”

Evri yia plante milyan man, olsem Alec, oli lusum ol fren no famle blong olgeta long ded. 1992 Britannica Book of the Year, i eksplenem se, “Long ful wol, i gat 50,418,000 man oli ded long 1991.” ?Mo hamas milyan man moa we oli ded biaen long taem ya? !Tingbaot ol wora blong ae blong ol man, we i ron olsem wan reva from oli sore tumas! Oli harem nogud mo antap long samting ya, tingting blong olgeta i fasfas from ol defren bilif long saed blong ded.

Olsem Alec, plante man oli lusum hop long tingting blong olgeta mo oli no moa ting se i gat hop blong laef long fyuja afta long ded. Encyclopedia of Religions i talem se, “Long olgeta yia we oli pas, ol man we oli tingting dip long samting ya oli bin gat tingting we i defren long bighaf blong ol man, . . . oli no bilif fulwan se wan sol no laef i save stap laef sipos i no gat bren mo bodi blong hem.”

Samting we i pulum intres blong yumi se, insaeklopedia ya antap i agri se Baebol i no sapotem bilif blong skul long saed blong sol we i stap laef olwe be i no gat bodi. I tru, long sam ples, Baebol i tokbaot “sol” blong wan man olsem we i aot long bodi we i ded mo i kambak tu, be “sol” long ples ya i minim “laef,” we i lus no i kambak. (Jenesis 35:​16-19; 1 King 17:​17-23) Plante taem, Baebol i yusum tok ya “sol” blong tokbaot ol samting we oli gat mit mo blad, hemia, ol samting we oli stap laef. (Jenesis 1:20; 2:7) Taswe, Baebol i talem plante taem bakegen se ol sol oli save ded. (Esikel 18:​4, 20; Ol Wok 3:23; Revelesen 16:3) Tok blong God i talem se taem ol sol oli ded, “oli no save wan samting nating.”​—Eklesiastis 9:​5, 10.

Narafala samting se, Baebol i tokbaot ol man we oli bin ded mo oli laef bakegen. Long saed blong Lasros, samting ya i kamaot afta we hem i bin ded long fo dei. (Jon 11:​39, 43, 44) ?Be, wanem bambae i kamaot long ol man we oli ded plante handred no taosen yia bifo? ?Hop blong olgeta blong laef bakegen long fyuja i min se bambae God i mekem olgeta oli girap wetem prapa bodi blong olgeta we oli gat taem oli ded?

No gat. Tingting olsem i no laenap wetem wanem we i stap kamaot long ol smosmol samting we oli kolem atom we oli mekemap wan dedbodi. Longtaem biaen we man i ded, ol tri mo gras oli tekem sam long ol atom ya oli go insaed long olgeta, ale biaen, ol anamol mo ol narafala laef samting oli kakae mo i kam haf long bodi blong olgeta.

?Samting ya i minim se i no gat hop blong ol man we oli ded longtaem finis? Si, i gat hop. Man ya we i Wokem bigfala wol ya blong yumi mo skae, i gat wan memori we i no gat stret mak blong hem mo i bigfala olsem we i mekem yumi fraet. Wetem memori ya blong hem we i stret olgeta, hem i naf blong putumgud olgeta fasin mo wei blong eniman we i ded we hem i wantem blong tingbaot bakegen. Antap moa, Jeova God i gat paoa blong wokem bakegen bodi blong wan man i stret nomo olsem prapa fasin blong man ya taem i bin laef bifo. Hem i save putum long bodi ya memori mo olgeta fasin blong man ya we hem i tingbaot, olsem Ebraham.

Kolosap tu taosen yia afta long ded blong Ebraham, Jisas Kraes i mekem promes ya: “Mo buk blong Moses tu i soemaot we ol dedman bambae oli save laef bakegen long ded, long store ya blong wan smol tri we faea i stap laet olbaot long hem. Long taem ya Moses i singaot Hae God, i talem nem blong hem se ‘Yu we yu God blong Ebraham, yu God blong Aesak, yu God blong Jekob.’ Nao Hae God, hem i no God blong ol dedman, hem i God blong olgeta we oli laef. Mo God i stap luk olgeta ya oli laef.” (Luk 20:​37, 38) I no Ebraham, Aesak, mo Jekob nomo, plante milyan narafala dedman tu oli stap laef long memori blong God, oli stap wet blong laef bakegen. Baebol i pruvum samting ya i se, “God bambae i mekem olgeta man oli laef bakegen long ded, ol man we oli stret, wetem ol man we oli no stret.”​—Ol Wok 24:15.

Sam wik afta we tufala fren blong hem i ded, Alec i faenem ansa blong ol kwestin blong hem. Wan Wetnes blong Jeova i kam long haos blong hem mo i soem wanem we Tok blong God i talem long saed blong ded mo long saed blong laef bakegen. Samting ya i leftemap tingting blong Alec mo i karem nyufala mining long laef blong hem.

?Yu tu yu wantem lanem moa long hop ya blong Baebol long saed blong laef bakegen long ded? Eksampel, ?bambae plante man oli laef bakegen long heven no long wol ya? ?Mo man i mas mekem wanem blong God i glad long hem mo blong kasem fulwan, nambawan promes blong Hem se ol man bambae oli joengud bakegen wetem ol fren mo famle blong olgeta we oli ded?