Ebraham—?Oli Berem Long Ples Ya, Be i Stap Laef Yet?

Long plante handred yia finis ol man Jyu, ol Muslim, mo ol Kristin oli mekem trep blong kam long ples ya.

Yu yu save visitim ples ya long taon blong Hebron bifo, long saot blong Jerusalem. Bilding ya, oli kolem tufala nem ya Haram el-Khalil mo Beregraon Blong ol Olfala. Yes, plante man oli agri se hemia ples we oli berem ol olfala blong bifo olsem Ebraham, Aesak, mo Jekob, mo tu ol waef blong olgeta Sera, Rebeka, mo Lea.

Tingbaot we Baebol i talem se taem Sera, gudfala waef blong Ebraham i ded, hem i pem wan ples we i olsem wan bigfala hol long ston mo sam graon long Makpela kolosap long Hebron, blong berem waef blong hem. (Jenesis 23:​2-20) Biaen, oli berem Ebraham tu long ples ya, wetem ol narafala memba blong famle blong hem. Plante handred yia biaen, raon long ples ya blong berem dedman, Bigfala Herod i wokem wan naesfala bilding we biaen, ol ami we oli kam agensem ples ya oli jenisim mo mekem i kam bigwan moa, blong mekem se i soemaot prapa bilif blong skul blong olgeta.

Taem yu kam insaed, yu luk sikis senotaf (ol ston blong makem gref no ol emti ples blong berem ol dedman). Smol pija i soemaot wan blong Aesak, pikinini blong Ebraham. Kolosap long hem i gat ol hol long floa, we oli bin yusum blong godaon long ples we i stap aninit. Ol man we oli stap faenemaot ol samting, oli faenem ol rum we maet oli bin gat plante bun blong ol man blong bifo oli stap long olgeta.

?Olsem wanem long Ebraham? Sipos oli berem hem long wan hol long ston we naoia i stap aninit long ples ya, hem i ded longtaem finis, ?i tru? Plante man we oli stap kam blong visitim ples ya bambae oli agri. Be wan profet we i bigwan moa long Ebraham, i talem se long wan fasin Ebraham i stap laef yet. ?Olsem wanem? ?Mo samting ya i save mekem wanem long bilif blong yu?

Plis ridim store ya “Ol Fren Mo Famle Blong Yu We Oli Ded​—?Oli Stap Wea?” (Pej 3) Hem i soemaot wanem we bigfala profet ya i talem long saed blong poen ya se Ebraham i stap laef yet, mo save ya i save kam wan samting we i impoten tumas long yu mo long famle blong yu.