Wan Jyos We i Seraot—?I Nogud Olsem Wanem?
“OLSEM wan bigfala famle we oli stap long wan olfala haos, nao oli sapraes taem wol blong haos long fored i foldaon wantaem, ale, long sem fasin i luk olsem se i gat rao i stap gohed long evri rum long ples ya—hemia ol pikinini blong Jisas we oli stap kilim ol tamborin, mo oli stap singaot long wan grup blong Anglikan-Katolik we oli man blong slip wetem man bakegen, we oli putum ol flas blak klos we oli wokem long silik.”—The Sunday Times, London, Epril 11, 1993.
Famle ya i olsem Anglikan Jyos. Oli rao from kwestin ya se i stret blong letem ol woman blong kam pris no no gat. Klia eksampel ya we i soem bigfala fasin seraot, i stret nomo long olgeta skul blong Krisendom. Ol bisop blong Otodoks Jyos mo pop oli agensem disisen ya blong letem ol woman oli kam pris, ale wan ripot i talem risal blong samting ya se, “naoia, drim blong joengud bakegen wetem ol narafala skul long Krisendom i go longwe moa bitim bifo.”
?Fasin Seraot Long Jyos i Bigwan Olsem Wanem?
Olsem yumi ridim long Matyu 7:21, Jisas Kraes i talem se plante man bambae oli talem se oli bilif long hem olsem Masta, be bambae oli no ‘mekem wil blong Papa blong hem.’ Magasin blong Maclean’s i talem se: “Ol man we oli stap ridim buk blong Matyu blong lukaot rod blong kasem laef, yumi save fogivim olgeta sipos tingting blong olgeta i fasfas long kwestin ya se, ?Wanem nao wil blong God stret? taem yumi luk we ol Kristin, mo ol skul blong olgeta, oli gat ol tingting we oli defdefren tumas long kwestin ya.” Wan stadi we oli mekem long ol man Kanada i soem se “ol bilif mo fasin blong ol Kristin long Kanada oli defdefren tumas—oli moa defren bitim we ol wanwan memba blong wan jyos oli defdefren, yes oli moa defren bitim we ol skul oli defdefren.”
Stadi ya i soem se 91% blong ol Katolik oli agri se ol man mo woman oli save yusum ol samting blong blokem woman blong i no gat bel, nating se skul blong olgeta i agensem fasin ya; 78% oli ting se i stret blong letem ol woman blong kam pris; mo 41% oli talem se i oraet “samtaem” blong mama i kilim pikinini long bel. Fasin seraot insaed long ol defren skul “long plante kwestin long saed blong ol tijing blong jyos, i soemaotgud fasin seraot we i stap spolem fasin joen blong ol bigfala skul,” olsem Maclean’s i talem.
Tu Defren Rul
Long saed blong ol gudfala fasin, samfala oli no stap folem ol rul we oli ting se ol narafala oli mas folem, no maet oli stap folem ol rul ya samtaem nomo. Sam man oli talem se oli stap folem ol rul blong Baebol, be sam narafala oli sakem ol rul ya. Eksampel, ?yu ting se “mared” we Metropolitan Jyos long Toronto i mekem long tufala woman we tufala i stap slip wetem tufala bakegen, i laenap wetem wil blong God? Tufala we i mared, tufala i gat tingting olsem. Tufala i talem se: “Mitufala i wantem soemaot olsem wanem mitufala i glad long lav blong mitufala, long fes blong ol man mo long fes blong God.”
Wan man blong raetem nyuspepa i askem from wanem “wan ajbisop blong Katolik we fulap man oli kam long hem blong komplen, i sanem sam pris we oli stap mekem nogud wetem ol pikinini, oli go long narafala jyos we oli save mekem nogud long ol narafala olta boe.”a Pris Andrew Greeley i talem se maet samwe long 2,000 kasem 4,000 pris oli bin mekem nogud long 100,000 pikinini, mo plante taem jyos i mekem smol samting nomo blong stretem.
Wan jyos we i seraot i mekem ol man tu oli seraot. Long ol ples long Balkans, ol “Kristin” man Sebia mo Kroat, olgeta evriwan oli bilif se Kraes i stap wetem olgeta long “stret” faet we oli stap mekem. Plante man oli hangem kros raon long nek blong olgeta long taem blong faet; wan man, ripot i talem se, “oltaem hem i putum kros blong hem long maot blong hem taem faet i kam strong tumas.”
“Bambae Yufala i No Moa Seraot”
Tru ya, Baebol i talem se man i mas skelemgud sam bisnes folem voes blong hat blong hem, be samting ya i no mas mekem ol man oli seraot olsem. Aposol Pol i talem klia se: ‘Yufala i mas agri long toktok [mo ol fasin] blong yufala, mo . . . bambae yufala i no mas seraot.’—1 Korin 1:10; Efesas 4:15, 16.
Sipos yumi luklukgud long “Kristin Skul” naoia, tu taosen yia afta we aposol Pol i raetem ol tok ya, i gat sam bigfala kwestin oli stanap. ?From wanem “ol Kristin” oli no gat wan tingting nomo? ?Wan skul we i seraot i save gohed? ?Bambae Krisendom i joengud samtaem? Nekis haf bambae i ansa long ol kwestin ya.
[Futnot]
a Ol boe we oli mekem sam smosmol wok blong givhan long ol pris.
[Tok blong pija long pej 3]
Ol pris oli mekem demonstresin agensem fasin blong kilim pikinini long bel
[Credit Line]
Cover and above: Eleftherios/Sipa Press