Glad Long Kampani Blong Ol Trufala Brata Raonabaot Long Wol

OLSEM WILLIE DAVIS I TALEM

Long 1934, bigfala taem blong trabol long saed blong mane i kam antap long wol, mo Yunaeted Stet i fesem hadtaem tumas long saed blong mane. Afsaed long ples we ol man oli stap kasem saplae long hem long Prospek, Klivlan, Ohaio, i gat wan faet bitwin wan polisman mo wan man we i strong blong folem tingting blong Komunis. Polisman ya i sutum Komunis ya i ded wetem wan woman we i stap stanap kolosap, hemia bubu woman blong mi, Vinnie Williams.

OL KOMUNIS oli traem blong talem se ol ded ya oli kamaot from fasin blong no laekem man blong defren kala, from we bubu woman blong mi i blak mo polisman i waet. Oli givimaot sam nyuspepa wetem ol taetel olsem “Polis Blong Klivlan We i No Laekem Ol Blakman” mo “Givimbak Long Man We i Kilim Ded Tufala.” Ol Komunis oli mekem plan mo oli berem bubu woman blong mi. Mi gat wan pija blong ol man we oli karem bokis blong dedman i go long beregraon​—⁠evriwan oli waet mo oli Komunis nomo. Wanwan long olgeta i taetem han blong hem mo i leftemap long fasin we biaen ol blakman oli yusum olsem saen blong soem faet blong blakman blong kasem ol raet olsem ol narafala.

Taem bubu woman blong mi i ded, dota blong hem i stap karem mi long bel blong hem, mo fo manis biaen, mi mi bon. Mi gat trabol long saed blong fasin blong toktok taem mi gruap. Mi no save toktokgud from tang blong mi i sot, taswe taem mi stat skul, mi lanem tu fasin blong toktok.

Papa mo mama blong mi, tufala i seraot taem mi gat faef yia, mo mama i lukaot long mi mo sista blong mi. Taem mi gat ten yia, mi stat blong wok afta skul blong halpem famle long saed blong mane, mi karem ol samting we ol man oli pem long stoa oli go long haos blong olgeta. Tu yia biaen, mi stat blong wok bifo mo afta long skul, mi kam olsem hemia we i wok moa blong kasem mane blong givhan long famle. Taem mama blong mi i go slip long hospital mo oli mas katem hem plante taem from sik blong hem, mi mi stop skul mo mi stat blong wok fultaem.

Joen Wetem Wan Kampani Blong Ol Brata

Long 1944, wan Wetnes blong Jeova i givim buk ya “The Truth Shall Make You Free” long waef blong kasen brata blong mi, mo mi joen long Baebol stadi we Wetnes ya i statem wetem hem. Long sem yia ya, mi stat blong go long Tiokratik Skul long Is Saed Kongregesen. Brata we i lidim skul, Albert Cradock, i gat sem problem long saed blong toktok olsem mi mi gat, be hem i lanem blong kontrolem problem ya. !Samting ya i leftemap tingting blong mi bigwan!

Bighaf blong ol man we oli stap long eria blong mifala, oli blong Itali, Polan, Hangari, mo ol man Jyu, mo ol brata mo sista long kongregesen oli kamaot long ol ples ya mo sam narafala grup blong man. Mi mo waef blong kasen brata blong mi, mitufala i stap wetem ol faswan Nigro blong Amerikaa blong joen wetem kongregesen ya we kolosap se i gat ol waet brata sista nomo, be ol Wetnes oli neva soem se oli agensem narafala from kala blong hem. Long defren fasin, oltaem oli tekem mi mi go long haos blong olgeta blong kakae.

Long 1956, mi muf i go long saot blong Yunaeted Stet blong wok long ples we i gat moa nid long saed blong ol Kristin minista. Long wan hot taem, taem mi gobak long not from wan distrik asembli, plante long ol brata sista long Klivlan oli kam blong luk mi mo oli soem kaen fasin mo intres long ol wok blong mi. Fasin blong olgeta blong tingbaot mi i tijim mi long wan impoten lesen se: Oltaem mi mas ‘no lukaot long ol bisnes blong mi wan nomo, be lukaotgud long ol bisnes blong ol narafala man tu.’​—⁠Filipae 2:⁠4.

Mekem Moa Long Fultaem Kristin Minista Wok

Long Novemba 1959, afta we mi stap wok tri yia long fultaem wok blong prij olsem wan paenia, oli askem mi blong go wok long Bruklin Betel, wol hedkwota blong ol Wetnes blong Jeova long Nyu Yok. Mi mi go wok long ples blong sanem ol buk oli go long ol kongregesen. Brata we i lukaot long ples ya, Klaus Jensen, mo brata we mitufala i slip long sem rum, William Hannan, we tufala i waet, tufala i kam olsem papa blong mi long saed blong speret. Wanwan long tufala i bin wok kolosap 40 yia long Betel taem mi mi kam.

Jes biaen long 1960, i gat samwe long 600 memba blong Betel famle, mo i gat samwe 20, oli ol Nigro blong Amerika. Long taem ya, ol man long Yunaeted Stet, oli stat blong no laekem nating ol man blong defren kala, mo kolosap se plante trabol i kamaot bitwin blakman mo waetman. Nating se i olsem, Baebol i tijim se “God i stap mekem i sem mak nomo long olgeta man,” mo yumi tu i mas mekem olsem. (Ol Wok 10:​34, 35) Ol storeyan long saed blong speret we mifala i mekem long tebel blong Betel evri moning i mekem tingting blong mifala i strong blong akseptem tingting blong God long ol bisnes ya.​—⁠Ol Sam 19:⁠7.

Taem mi stap wok long Bruklin Betel, mi mitim Lois Ruffin, wan paenia we i kam long Rijmon, Vijinia, mo mitufala i mared long 1964. Strong tingting blong mitufala i blong stap oltaem long fultaem Kristin minista wok, ale afta we mitufala i mared, mitufala i gobak long saot blong Yunaeted Stet. Fastaem mitufala i wok olsem spesel paenia, mo biaen, long 1965, oli askem mi blong mekem wok blong seket elda. Long ol ten yia we oli kam biaen, mitufala i visitim ol kongregesen long eria blong Kentaki, Teksas, Luisiana, Alabama, Jojia, Not Karolaena, mo Misisipi.

Kampani Blong Ol Brata i Kasem Wan Traem

Hemia ol yia we i gat ol bigbigfala jenis. Bifo we mitufala i muf i go long saot, ol blakman mo ol waetman oli bin seraot. Oli putum loa blong blokem ol blakman blong no go long ol sem skul olsem ol waetman, kakae long sem restoron, slip long sem hotel, pem olting long sem stoa, mo tu blong dring wora we i kamaot long sem ples we ol waetman oli stap dring long hem. Be long 1964, Kongres blong Yunaeted Stet i pasem loa blong Fasin Fri we i putum tabu long fasin blong seraotem blakman mo waetman long pablik ples, mo long pablik transpot tu. Ale i no moa gat wan loa we i sapotem fasin seraot from kala.

From samting ya, kwestin i stap se, ?ol kongregesen we i gat ol brata sista we oli blak nomo mo ol kongregesen we oli waet nomo, bambae oli joen tugeta mo soem lav mo filing long wanwan long olgeta, no fasin agens blong ol man raonabaot mo ol strong filing blong bifo bambae i mekem se oli no wantem joen wanples? I wan bigfala traem blong folem oda ya blong Baebol se: “Yufala i mas laeklaekem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.”​—⁠Rom 12:⁠10.

Stat long taem bifo we man i save tingbaot, tingting blong ol man, antap moa long Saot blong Yunaeted Stet, hemia se ol blakman oli daon long ol waetman. Ol grup long sosaeti blong man, olsem ol jyos, oli makem tingting ya i strong tumas long maen blong ol man. Taswe i no isi long sam waetman blong tingbaot ol blakman olsem se oli sem mak nomo. Tru ya, hemia i wan taem we kampani blong ol brata sista blong mifala oli kasem traem​—⁠traem blong ol brata we oli waet mo ol brata we oli blak.

I gud tumas, kolosap olgeta brata mo sista oli soem wan nambawan tingting blong mekem ol kongregesen blong mifala oli joengud. Tingting ya we i stap plante handred yia finis, se wan kala i hae long narawan, i no lus kwiktaem. Be taem fasin joen i stat, ol brata sista blong mifala oli folemgud fasin ya, bighaf blong olgeta, oli glad blong stap joen wanples.

Wan samting we yumi intres long hem se, plante taem, ol man we oli no Wetnes oli folem fasin joen blong ol kongregesen blong mifala. Eksampel, oli askem ol man we oli stap kolosap long Haos Kingdom long Lanet, Alabama, sipos oli agensem ol blakman we oli stap kam long miting. Wan olfala waet woman i sekhan long wan blak brata, mo i talem se: “!Kam long ples blong mifala mo wosip long God blong yu olsem we yu yu wantem!”

Ol Brata Long Itiopia We Oli Fasgud Long God

Long 1974, mitufala i glad tumas blong kasem trening blong faef manis haf long Wajtaoa Baebol Skul blong Gilead long Nyu Yok Siti, blong kam misinari. Biaen oli sanem mitufala i go long Itiopia, wan kantri blong Afrika. Oli jes aotem Haile Selassie, we hem i hed gavman, long jea blong hem mo oli putum wan gad long haos blong hem olsem we oli holem hem i stap kalabus long haos. From we oli putum tabu long wok blong mifala blong prij, mitufala i haremgud tumas long Kristin fasin joengud blong kampani blong ol brata sista.

Mitufala i stap mo wok wetem plante long olgeta we biaen, oli go long kalabus from we oli holemstrong long trufala wosip. Sam long ol gudfala fren blong mitufala, oli kilim olgeta oli ded. Adera Teshome, i wan elda we i wok wetem mi long wan kongregesen long Adis Ababa, bigfala taon blong Itiopia.b Afta long tri yia we hem i stap long kalabus, oli kilim hem i ded. Waef blong hem i sore tumas. !Sam yia biaen, i gud tumas blong luk we hem i glad bakegen taem hem i wok olsem paenia!

Worku Abebe, wan narafala brata we i fasgud long God, eit taem, oli talem se bambae oli kilim hem i ded.* !Be neva hem i fraet! Long laswan taem we mi luk hem, hem i soem sora blong hem long mi we ol gad blong presin oli kilim nogud long handel blong masket. Hem i tok plei se hem i kakae handel blong masket long moning, long dina, mo long sapa. Nating se hem i ded biaen long taem ya, ol brata oli tingbaot hem yet wetem fasin lav.

Hailu Yemiru i wan narafala brata we mi mi rimembagud hem.# Hem i soem gudfala eksampel long saed blong fasin lav long waef blong hem. Oli holemtaet waef blong hem, be from we hem i gat bel mo kolosap i karem pikinini, Hailu i askem ol haeman blong kalabus sipos hem i save tekem ples blong woman blong hem blong go long kalabus. Biaen, taem hem i no wantem lego bilif blong hem, oli kilim hem i ded.​—⁠Jon 15:​12, 13; Efesas 5:⁠28.

From fasin blong politik i kam moa nogud long Itiopia, mitufala i muf i go long Kenya long 1976. Seven yia, mitufala i mekem wok blong visitim ol kongregesen, mitufala i visitim ol brata sista long plante kantri long Is Afrika​—⁠olsem Kenya, Itiopia, Sudan, ol Aelan blong Seisel, Uganda, mo Tansania. Mi mekem sam trep tu long Burundi mo Ruanda, olsem wan long olgeta we i blong askem ol haeman blong gavman blong rejistarem wok blong mifala folem loa long tufala kantri ya.

Mi haremgud tumas blong gobak long Itiopia long Janewari 1992 blong joen long faswan distrik asembli we oli mekem long ples ya afta we oli tekemaot tabu long wok blong mifala. Plante long bitim 7,000 man we oli kam, oli no save wanwan long olgeta, from we fastaem ol brata oli stap joen long ol smosmol grup nomo. Long ol wanwan dei blong asembli, bighaf blong ol man oli kam tu haoa bifo we program i stat mo oli stap gogo kasem naet, blong haremgud long kampani blong ol brata sista blong mifala we oli gat lav.

Winim Fasin Blong Faet Bitwin Ol Laen

Long ol handred yia we oli pas, fasin blong faet bitwin ol laen i bin kam antap bigwan tumas long Afrika. Eksampel, long Burundi mo Ruanda, longtaem finis i kam, tufala bigfala laen ya, Hutu mo Tutsi, tufala i no laeklaekem nating tufala. Stat long taem ya we tufala kantri ya i kasem independen long rul blong Beljiom long 1962, ol memba blong tufala laen ya oli bin kilim i ded plante taosen long olgeta. !From samting ya, i gud tumas blong luk ol memba blong tufala laen ya we oli kam ol Wetnes blong Jeova, oli stap wok tugeta long pis! Trufala lav we oli soem long wanwan long olgeta, i leftemap tingting blong plante narafala blong lesin long ol trutok blong Baebol.

I sem mak, longtaem finis i kam, ol laen blong man long Kenya oli stap raorao wetem olgeta. !I defren olgeta long ol Kristin brata long kampani blong ol man blong Jeova long Kenya! Yu save luk ol man we oli kamaot long ol defren laen oli stap joen wanples blong wosip long ol Haos Kingdom. Mi haremgud tumas blong luk we olgeta ya oli lego fasin blong no laekem nating ol man blong defren laen mo oli soemaot trufala lav long ol brata sista blong olgeta we oli blong ol narafala laen.

Glad Long Kampani Blong Ol Brata Blong Mifala

Taem mi tingtingbak long 50 yia we mi joen long ogenaesesen blong God, hat blong mi i kam fulap long fasin tangkyu long Jeova mo Pikinini blong hem, Jisas Kraes. !I rili wan samting blong sapraes blong luk wanem we tufala i bin mekem long wol! Yes, ol samting oli no bin stret olgeta oltaem long medel blong ol man blong God, i sem mak tede. Be yumi no mas ting se ol tijing long saed blong no laekem nating ol man blong defren kala we wol blong Setan i tijim, we i bin stap plante handred yia finis, oli save finis long wan naet nomo. Tingbaot, yumi no stretgud olgeta yet.​—⁠Ol Sam 51:⁠5.

Taem mi skelem ogenaesesen blong Jeova wetem wol, hat blong mi i fulap long fasin tangkyu from kampani blong ol trufala brata raonabaot long wol. Wetem filing blong lav, mi tingbaot yet ol brata long Klivlan, we evriwan oli waet, we oli trenem mi long trutok. Mo hat blong mi i glad tumas taem mi luk ol brata blong mifala long saot blong Yunaeted Stet, waet mo blak, we oli putum fasin blong laekem tumas ol brata long hat blong olgeta, blong tekem ples blong fasin blong agensem narafala from kala. Biaen, taem mi go long Afrika mo mi luk wetem prapa ae blong mi olsem wanem Tok blong Jeova i save tekemaot fasin agens bitwin ol laen blong man, samting ya i mekem fasin tangkyu blong mi i kam bigfala moa long kampani blong ol brata sista raonabaot long wol.

Tru ya, King Deved bifo i soemaotgud fasin ya taem hem i talem se: “I gud tumas taem ol man blong God oli stap wanples, we oli gat wan tingting nomo. Fasin ya i gud tumas.”​—⁠Ol Sam 133:⁠1.

[Ol futnot]

[Tok blong pija long pej 23]

Sevis blong berem bubu woman blong mi

[Tok blong pija long pej 24]

Ol Wetnes blong tufala laen ya Tutsi mo Hutu oli stap wok tugeta long pis

[Tok blong pija long pej 25]

Mi wetem waef blong mi, Lois