“Yu Wokem Bodi Blong Mi, Yu Mekem Hem i Gud We i Gud”

“?MI MI kam weples?” Hemia wan kwestin we bighaf blong ol pikinini oli askem samtaem. Taem ol pikinini oli gruap, plante taem, kwestin blong olgeta i kam dip moa se: “?Laef i kam weples?” Plante taosen yia finis, ol man oli bin tokbaot kwestin ya, mo naoia plante sayentis oli ting se evolusen nao i stret ansa long kwestin ya long saed blong stampa blong laef. Bigfala mining blong ol tok blong ol man we oli bilif long evolusen, se laef i kamaot olsem nomo.

Samwe long 3,000 yia bifo, King Deved i raetem se: “Bambae mi mi presem yu, from we taem yu wokem bodi blong mi, yu mekem hem i gud we i gud.” (Ol Sam 139:​14, NW) Taem yumi lanem moa long saed blong laef, yumi luk se tok ya i tru moa. Tru ya, Fred Hoyle, wan man blong stadi long ol laef samting, i raetem se: “Taem ol man we oli stap stadi long ol kemikol long bodi blong man oli stap faenemaot plante moa samting blong sapraes long saed blong ol samting we oli mekemap laef, save ya i soem se i gat smol jans nomo se laef i kamaot olsem nomo, yes, i no gat jans nating. Laef i no save kamaot olsem nomo.”

?Ale wanem stampa blong laef? Tufala faswan haf blong magasin ya i ansa long kwestin ya. Sipos yu wantem kasem moa save, plis raet long Association “Les Témoins de Jéhovah,” B.P. 787, Nouméa, Nouvelle-Calédonie, no raet long wan adres long pej 2 we i stret long ples blong yu.