Gat Fasin Tangkyu Long Tabu Wok Blong Yu

BLONG kasem wan gudfala mak, yumi mas rere blong lego sam samting we yumi laekem tumas. Man we i wantem kam wan dokta, hem i nidim blong stadi plante yia, gat strong tingting, mo mane tu. Wan nambawan jimnasa i spenem bighaf blong yangtaem blong hem long trening, sloslou i mekem ol samting we oli strong moa, hem i stap gohed nomo, hem i no stop blong traehad blong mekem long fasin we i stretgud olgeta. I sem mak, wan man we i gat gudhan blong plei piano, i save tingtingbak long plante yia we hem i bin spenem blong lanem wok ya.

Be i gat wan mak we i save givim ol blesing we oli bigwan bitim ol samting we man i mas lego long olgeta blong kasem mak ya. ?Wanem mak ya? Hemia jans blong stap olsem man blong Hemia we i Hae Olgeta, Jeova God. Nomata hamas yumi givim, long saed blong taem, mane, mo paoa, be jans blong mekem tabu wok blong Man we i Wokem yumi, i givim ol blesing we oli bigwan tumas blong skelem wetem ol narafala samting. Ol tok blong aposol Pol oli tru, se: ‘Sipos yu stap traehad oltaem blong mekem ol fasin we God i wantem, hemia i gud tumas long evri rod. Man we i mekem olsem, hem i gat promes blong hem long laef naoia, mo bakegen long laef ya tu we bambae i kamtru biaen.’ (1 Timote 4:⁠8) I gud yumi luk olsem wanem samting ya i tru.

Fastaem We Yumi Kasem Save Long Saed Blong God

Bighaf blong ol man we oli glad blong lesin long gud nyus mo oli stat blong stadi Baebol, oli no luksave ol bigfala jenis we bambae oli kamaot long laef blong olgeta from. Fastaem, maet nyufala Baebol studen ya i lusum sam fren, we oli no kasem save from wanem hem i no moa folem olgeta blong ronem ol samting we naoia, hem i luksave se oli no givim ona long God. (1 Pita 4:⁠4) Samfala, maet famle i agensem olgeta mo maet oli harem nogud taem oli luk se olgeta we oli laekem tumas, oli soemaot se oli no laekem Jeova nating, oli agensem hem. (Matyu 10:36) Hemia i wan samting we i had tumas blong winim.

Long ples blong wok no long skul, i gat sam samting tu oli mas winim. Afta we sam taem i pas, nyufala Baebol studen bambae i no moa joen long ol pati blong wol mo sam narafala lafet. Bambae hem i no moa lesin long ol doti tok blong ol man we hem i wok wetem olgeta no ol fren long skul, mo bambae hem i no moa joen wetem olgeta long ol tok plei we oli nogud. Bambae hem i traem blong folem advaes we yumi faenem long Efesas 5:​3, 4, se: “From we yufala i tabu, yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok, mo ol krangke tok, mo ol tok plei we i nogud. I stret blong yufala i stap talem tangkyu long God.”

Ol jenis olsem, oli save mekem se Baebol studen i no haf blong grup blong olgeta. Samting ya i had, antap moa long wan yangfala we i stap yet long skul. From we i gat plante lafet blong ol holede, wan afta long narawan, mo ol tijing we oli agensem God, olsem evolusen, mo ol traem blong pulum olgeta blong folem tingting blong ol narafala, i mekem se ol yangfala Kristin oli mas gohed blong faet oltaem long saed blong bilif. Fasin blong folem ol rod blong God bambae i mekem se yangfala i defren long ol narafala mo samting ya i save mekem se ol fren blong hem long klasrum mo ol tija, oli save jikim hem. Samting ya i rili had blong akseptem taem wan yangfala i gat bitwin 13 mo 19 yia. Be i no gat wan samting we i bigwan tumas blong winim, blong mekem se God i glad long yumi.

?I Rili Had Tumas Blong Lego Sam Samting?

Sam narafala samting we fastaem, i luk olsem se i had tumas blong lego olgeta, oli kamaot olsem ol blesing. Sam man oli stopem fasin blong smok tabak. (2 Korin 7:⁠1) !Samting ya i wan hadwok, be i wan bigfala blesing taem oli winim nogud samting ya we i save mekem man i harem nogud! Samting ya i sem mak tu long olgeta we oli winim fasin blong dipen long alkol mo drag. !Laef i moa gud taem i no gat sam samting olsem we i save spolem! Sam narafala, oli mas stretem ol bisnes blong olgeta long saed blong mared. Man mo woman we tufala i stap wanples, be tufala i no mared, tufala i mas mared, sipos no, tufala i mas seraot. (Hibrus 13:⁠4) Olgeta we oli gat plante waef, oli mas stap wetem faswan waef blong olgeta nomo. (Proveb 5:18) I nidim tingting blong sakrifaes blong mekem ol jenis olsem, be oli mekem se pis i stap long haos.

Tingbaot Ol Blesing

Tru ya, man we i obei long ol loa blong Jeova, hem i rili haremgud. Baebol studen ya i stat blong singaot long nem blong Jeova God, Man we i Wokem hem. (Ol Sam 83:18) Baebol studen ya i stat blong laekem tumas Jeova taem hem i stap kasem save long ol nambawan samting we Hem i mekem finis mo we bambae i mekem long olgeta man long fyuja. Sipos i stap long wan kantri we ol man oli fraet long ol dedman, Baebol studen ya i no moa fraet long ol gyaman bilif, hem i save se ol dedman, i olsem we oli slip nomo, oli stap wet long taem ya we bambae oli laef bakegen. (Eklesiastis 9:​5, 10) !Mo studen ya i haremgud tumas blong save se Jeova i no stap mekem ol man oli harem nogud blong olwe long hel! Yes, trutok i rili mekem man ya we i stap stadi Baebol i fri.​—⁠Jon 8:⁠32.

Taem studen ya i stap mekem laef blong hem i laenap moa wetem ol rul blong Jeova, hem i kasem wan voes blong hat mo tingting we i stap kwaet, mo i gat respek long hem wan. Taem hem i stap lanem blong folem trufala Kristin fasin long laef, samting ya i halpem hem blong kamgud moa long fasin blong lukaot long famle blong hem, we i mekem hem i haremgud mo i glad tumas. Mo hem i stat blong go long ol miting long Haos Kingdom. !Hemia wan taem we i mekem hem i haremgud tumas! Long ples ya, ol man oli rili stap soem fasin lav wetem kaen fasin, we Baebol i talem se fasin ya i mas makemaot ol man blong God. (Ol Sam 133:1; Jon 13:35) Ol toktok blong olgeta oli klin mo oli leftemap tingting blong narafala taem oli stap talemaot “ol bigbigfala wok ya we God i mekem.” (Ol Wok 2:11) Yes, fasin blong joen wetem “olgeta Kristin man,” i wan stampa blong fasin glad. (1 Pita 2:17) Nambawan fasin joen olsem i halpem Baebol studen blong putum ‘nyufala laef we God i wokem long yumi, we i stret wetem laef blong hem. Ol fasin blong nyufala laef ya oli stret, oli gud, oli tabu, from we oli kam long trutok nomo.’​—⁠Efesas 4:⁠24.

Disisen Blong Givim Laef Long God

Taem man ya i stap gru moa long saed blong save, lav we hem i gat long Jeova bambae i pusum hem blong givim laef blong hem long Jeova mo baptaes long wora blong soemaot samting ya. (Matyu 28:​19, 20) Jisas i givim advaes se bifo we ol disaepol blong hem oli mekem disisen ya, oli mas kaontem praes blong hem. (Luk 14:28) Tingbaot se wan Kristin we i givim laef blong hem long God, hem i stap putum wil blong Jeova fastaem long ol narafala samting mo i sakemaot ol rabis fasin. Hem i wok strong blong blokem ‘ol rabis samting we tingting blong hem nomo i wantem’ mo blong wokem ‘ol frut blong tabu speret.’ (Galesia 5:​19-24) Long taem ya nao, hem i mekem advaes we yumi faenem long Rom 12:2 i wok moa long laef blong hem: “Yufala i mas no letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i nyufala olgeta. Nao bambae yufala i save jusumaot ol fasin we God i wantem, wanem i gud, mo wanem God i glad long hem mo wanem i stretgud blong mekem.” Olsem nao, wan Kristin we i givim laef blong hem long Jeova finis, i gat wan nyufala laef we i gat wan narafala plan.

Nao, tingbaot ol samting we hem i kasem. Wan samting, naoia hem i frengud wetem Man we i Wokem Olgeta Samting long heven mo long wol. !God i luk hem olsem wan stret man we hem i save kam olsem fren blong God! (Jemes 2:23) Taem hem i kolem God se “Papa blong mifala we yu stap long heven,” naoia i gat mining we i dip moa. (Matyu 6:⁠9) Wan narafala blesing we man ya we i jes givim laef blong hem long Jeova i kasem, hemia se hem i kasem save se laef i rili gat mining, mo se hem i stap mekem laef blong hem i laenapgud wetem mining ya. (Eklesiastis 12:13) Taem hem i folemgud Kraes, i fasgud long God oltaem, hem i save pruvum se Setan i man blong gyaman. !Samting ya i mekem hat blong Jeova i glad tumas!​—⁠Proveb 27:⁠11.

Tru ya, taem wan Kristin i gohed blong fasgud long God, i gat sam moa samting we hem i mas rere blong mekem. Hem i nidim taem blong mekem gudfala stadi long Tok blong God, hem wan mo long kongregesen. (Ol Sam 1:​1-3; Hibrus 10:25) Hem i mas pemaot taem blong prij long ol haoa we hem i spenem long ol narafala wok. (Efesas 5:16) Hem i nidim taem mo fasin traehad tu blong go long ol miting blong ol Wetnes blong Jeova mo blong mekem trep i go long ol asembli blong olgeta. I nidim tingting blong sakrifaes blong givim mane blong sapotem Haos Kingdom mo wok blong prij raonabaot long wol. Be, olsem plante milyan Kristin oli save talem, fasin blong joen wetem fulhat long ol samting ya, i mekem se man i haremgud tumas. Jisas i talem se: “Man we i stap givim presen i go, hem i save haremgud moa, i winim man we i stap kasem presen blong hem.”​—⁠Ol Wok 20:⁠35.

Ol blesing we fasin blong sapotem wok blong Jeova i givim, oli bigfala moa long ol hadwok blong yumi mo ol samting we yumi livim. Taem yumi stap kam bigman long saed blong speret, yumi kasem moa frut long wok blong yumi blong prij mo yumi haremgud moa. Tru ya, i no gat wan samting i save mekem yumi haremgud bitim we yumi tijim wan man long trutok blong Baebol mo yumi luk we man ya i mekem wosip long Jeova. Mo sipos nyufala man ya blong wosip long Jeova i wan memba blong famle blong yumi, maet wan pikinini we yumi ‘stretem mo tijim hem olsem we Masta blong yumi i stap stretem yumi i stap tijim yumi,’ samting ya i givim wan spesel glad long yumi. (Efesas 6:⁠4) Yumi stap luk ol rij blesing blong God long ol traehad blong yumi blong stap olsem ol ‘man blong joen wetem God blong mekem wok blong hem.’​—⁠1 Korin 3:⁠9.

Ol Narafala Blesing Taem Yumi Gohed Strong Long Wok Blong God

I tru, bambae yumi kasem ol problem gogo kasem taem we rabis fasin blong wol ya i finis. Yes, bambae ol problem ya oli kam strong moa, taem ol dei blong Setan oli stap kam sotfala moa. Maet ol man oli save ronem mo mekem nogud long yumi, no yumi mas stanap strong agens long ol samting blong pulum yumi. Be save ya se God i stap wetem yumi i mekem yumi haremgud mo i givim paoa long yumi blong stanap strong longtaem. (1 Korin 10:13; 2 Timote 3:12) I gat sam Kristin we ol man oli mekem nogud long olgeta blong plante yia, be lav blong olgeta long God i mekem se oli gohed blong stanap strong. Olgeta we oli stanap strong long ol defren hadtaem, oli gat filing olsem ol aposol, taem ol soldia oli wipim olgeta mo biaen oli letem olgeta oli gofri. Ol Wok 5:41 i talem se: “Ol aposol oli goaot long Kaonsel, nao oli stap harem i gud tumas from we God i luk olgeta olsem we oli naf blong kasem sem long fes blong ol man, from nem blong Jisas.”

Naoia tu, fasin blong stanap strong longtaem i save givim blesing we i bitim ol samting we yumi lego. Be tingbaot, fasin ya blong fasgud long God “i gat promes i stap long hem,” i no long ‘laef naoia nomo’ be long laef ya tu “we bambae i kamtru biaen.” (1 Timote 4⁠:⁠8) !Man we i stanap strong longtaem i gat wan nambawan hop! Sipos yu stap fasgud long God, bambae yu pastru long bigfala trabol we i makem en blong ol rabis fasin blong wol ya. No sipos yu ded bifo long impoten taem ya long histri, bambae yu laef bakegen blong stap long nyufala wol biaen. (Daniel 12:1; Jon 11:​23-25) Tingbaot bigfala glad we bambae yu gat long taem ya, we yu save talem se: “!Wetem help blong Jeova, mi mi kasem blesing ya!” Bambae i gud tumas blong go insaed long nyufala wol ya, we bambae “i fulap tru long save blong Jeova olsem we ol wora oli kavremap solwora.”​—⁠Aesea 11:⁠9.

Yes, yumi mas rere blong lego sam samting blong mekem wok blong God. Be taem yumi skelem wetem ol blesing, ol samting ya we yumi lego oli smol nomo. (Filipae 3:​7, 8) Taem yumi tingbaot olgeta samting we God i stap mekem long ol man blong hem naoia mo ol samting we bambae hem i mekem long fyuja, yumi save talem bakegen ol tok blong man ya blong raetem Ol Sam se: ‘Jeova i stap mekem i gud tumas long mi. ?Bambae mi mi givim wanem presen long hem?’​—⁠Ol Sam 116:⁠12.

[Futnot]