Putum Ol Wari Blong Yu Long Jeova
“Yufala i mas putum yufala i stap daon, aninit long han blong God ya we i gat bigfala paoa. Nao long taem we hem i luk se i stret, hem bambae i leftemap yufala. . . . Yufala i mas putum ol trabol blong yufala long han blong hem, from we oltaem hem i stap tingbaot yufala.”—1 PITA 5:6, 7.
1. ?Wari i save mekem wanem long yumi, mo wanem pija tok yumi save yusum blong soemaot samting ya?
WARI i save spolem laef blong yumi bigwan. Hem i olsem sam noes we i save spolem wan naes myusek we yumi stap lesin long hem long radyo. Sipos i no gat problem wetem ol signal we radyo i stap kasem, ol man we oli lesin long hem oli save haremgud long naes myusek we i kamaot long hem. Be, noes we i kamaot taem signal i no klia, i save spolem naesfala singsing, mo i save mekem yumi kros mo harem nogud. Sem mak, wari i save spolem pis we yumi gat long tingting blong yumi. I save daonem tingting blong yumi bigwan mekem se yumi no save tingbaot ol samting we oli impoten. Tru ya, “wari long hat blong wan man, bambae i mekem hem i bendaon.”—Proveb 12:25.
2. ?Jisas Kraes i bin talem wanem long saed blong “tingting tumas long laef”?
2 Jisas Kraes i tokbaot denja blong letem ol wari blong laef oli pulum yumi tumas. Long profet tok blong hem long saed blong lasdei, hem i pusum yumi blong mekem olsem se: “Yufala i mas lukaotgud. Sipos yufala i letem tingting blong yufala i kam slak, from we yufala i stap ronem lafet, mo yufala i stap drong mo yufala i stap tingting tumas long laef ya long wol, bambae dei ya blong mi i kam kasem yufala wantaem, olsem we trap i sat. From we bambae dei ya i save kamtru long olgeta man long wol. Be oltaem, yufala i mas stap lukaotgud. Yufala i mas prea blong bambae yufala i gat paoa blong ronwe long olgeta trabol ya, blong bambae yufala i save stanap long fes blong mi, mi Pikinini blong Man.” (Luk 21:34-36) Olsem we fasin blong kakae tumas mo dring alkol tumas i save mekem se tingting i no wokgud, ale “wari blong laef” we i mekem tingting i hevi i save mekem yumi no moa gat stret tingting long evri samting, mo frut blong fasin ya i nogud olgeta.
?Wanem Ya Wari?
3. ?Wanem mining blong ‘wari,’ mo wanem ol samting we oli mekem wari i kamaot?
3 “Wari” i karem mining olsem “fasin blong harem nogud, no tingting i trabol from wan nogud samting we bambae i kamtru, no yumi stap ting se bambae i kamtru.” Hem i “wari no intres we i joen wetem fasin fraet” sem mak olsem “nogud filing mo fraet we i no stret mo i bigwan bitim mak we i gat saen olsem (man i swet, i kros, mo hat i pam kwik), from man i no sua se trabol ya bambae i olsem wanem no i rili tru, mo i no sua sipos hem i naf blong winim problem ya.” (Webster’s Ninth New Collegiate Dictionary) Ale wari i save kam wan problem we i gat plante haf long hem. Plante samting oli save mekem wari i kamaot, sam long olgeta se, sik, stap kam olfala, fraet long raf fasin, lusum wok, mo tingting tumas long saed blong ol samting we famle i nidim blong haremgud.
4. (a) ?I gud blong tingbaot wanem long saed blong ol man mo ol wari blong olgeta? (b) Sipos yumi gat wari, yumi save mekem wanem?
4 I klia se, man i save wari smol no i save wari bigwan, sem mak olsem we i gat plante defren samting no fasin we oli stampa blong wari. Evri man i no mekem sem mak no folem sem rod taem samting i hapen. Taswe, yumi mas luksave se nating sipos wan trabol i no mekem yumi wari, sem trabol ya i save givim bigfala wari long sam narafala brata mo sista blong yumi we oli wosip long Jeova. ?Yumi save mekem wanem sipos wari i kasem wan mak we yumi no moa save tingtingdip long ol nambawan trutok we oli joengud tugeta long Tok blong God? ?Olsem wanem sipos yumi harem nogud tumas from wari ale yumi no moa save luksave klia bigfala kwestin we i stap stanap long saed blong rul blong Jeova mo Kristin fasin blong holemstrong long God? Maet yumi no save jenisim ol samting we oli stap kamaot long laef blong yumi. Be, yumi nidim blong lukaotem sam poen long Baebol we bambae oli halpem yumi blong faetem wari we ol had problem blong laef oli mekem.
Yumi Save Kasem Help
5. ?Olsem wanem yumi save wok folem Ol Sam 55:22?
5 Taem ol Kristin oli nidim help long saed blong speret mo ol wari oli kam hevi tumas long olgeta, oli save kasem help long Tok blong God blong mekem olgeta oli haremgud. Tok blong God i soemaot rod we yumi save trastem mo i givim plante promes long yumi se yumi no stap yumi wanwan nomo olsem ol man blong wok blong Jeova we i stap tru long Hem. Eksampel, Deved, man blong raetem Ol Sam, i singsing se: ‘Yufala i mas putum ol trabol blong yufala long Jeova, nao hem bambae i blokem yufala, i sevem yufala. Hem i no save letem stret man i lus.’ (Ol Sam 55:22) ?Olsem wanem yumi save wok folem ol tok ya? Yumi mas putum olgeta trabol blong yumi, ol wari, fraet, mo fasin blong harem nogud long Papa blong yumi long heven we i laekem yumi tumas. Samting ya bambae i givhan blong givim wan filing blong stap sef mo pis long hat blong yumi.[2]
6. Folem Filipae 4:6, 7, ?prea i save mekem wanem long yumi?
6 Oltaem i nidim prea we i kamaot long hat sipos yumi wantem putum ol trabol blong yumi, wetem ol wari blong yumi, long Jeova. Samting ya bambae i givim pis insaed long yumi, from aposol Pol i bin raetem se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” (Filipae 4:6, 7) ‘Pis ya blong God’ we i defren long ol narafala samting, i minim kwaet tingting we ol man blong Jeova we oli givim laef blong olgeta finis long Hem oli haremgud long hem, nating se oli stap long bigfala trabol. Samting ya i kamaot from nambawan fasin fren blong yumi wanwan wetem God. Taem yumi prea from tabu speret mo letem hem i pusum yumi, yumi no fri long olgeta problem blong laef, be yumi haremgud long pis ya we i frut blong tabu speret. (Luk 11:13; Galesia 5:22, 23) Yumi no letem ol wari oli mekem yumi harem nogud tumas, from yumi save se Jeova i stap mekem olgeta man blong Hem we oli stap tru long Hem ‘oli stap sef,’ mo Hem i no save letem wan samting i hapen we bambae i mekem yumi harem nogud blong olwe.—Ol Sam 4:8.[3]
7. ?Ol Kristin elda oli save mekem wanem blong halpem yumi blong winim wari?
7 Be, ?olsem wanem sipos wari blong yumi i no finis, nating se yumi tingtingdip long ol Tok blong Baebol mo prea oltaem? (Rom 12:12) Ol elda long kongregesen oli wan rod tu blong Jeova i halpem yumi long saed blong speret. Oli save leftemap tingting blong yumi mo givhan long yumi taem oli yusum Tok blong God mo taem oli prea wetem yumi mo from yumi. (Jemes 5:13-16) Aposol Pita i leftemap tingting blong ol narafala elda olsem hem blong lukaot long ol sipsip blong God we tingting blong olgeta i wantem blong mekem, we oli glad blong wok strong long hem, mo long wan rod we oli soem gudfala eksampel. (1 Pita 5:1-4) Ol man ya oli intres tru long ol samting we oli gud long yumi mo oli wantem blong givhan. I tru, blong haremgud fulwan long help blong ol elda mo blong haremgud long saed blong speret long kongregesen, yumi evriwan i nidim blong mekem advaes blong Pita i wok se: “Yufala ol yangfala, yufala i mas obei long ol olfala. Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se ‘God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.’ ”—1 Pita 5:5.
8, 9. ?Fas Pita 5:6-11 i leftemap tingting olsem wanem?
8 Pita i gohed se: “Yufala i mas putum yufala i stap daon, aninit long han blong God ya we i gat bigfala paoa. Nao long taem we hem i luk se i stret, hem bambae i leftemap yufala. Yufala we i stap tingting tumas, yufala i mas putum ol trabol blong yufala long han blong hem, from we oltaem hem i stap tingbaot yufala. Yufala i mas lukaotgud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae. Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem. Be God i stap givhan long yumi oltaem long gladhat blong hem, mo hem i singaot yufala blong joen long Kraes long gudfala laef ya blong heven we i no save lus samtaem. Bambae yufala i stap harem nogud long bodi blong yufala blong smoltaem, be biaen, God bambae i mekem yufala i stret gud. Hem bambae i mekem yufala i strong, i givim paoa long yufala, i stanemap yufala olsem pos we i no save muf. Mo prea blong mi we olgeta paoa bambae i stap long han blong hem nomo, gogo i no save finis. Amen.”—1 Pita 5:6-11.
9 !I gud tumas blong save se yumi save ‘putum olgeta trabol blong yumi long han blong God from we oltaem hem i stap tingbaot yumi’! Mo sipos sam long ol wari blong yumi oli kamaot from we Devel Setan i traem blong spolem fasin fren blong yumi wetem Jeova taem hem i sakem trabol mo ol narafala fasin blong harem nogud long yumi, i gud tumas blong save se bambae evri samting i kamgud sipos yumi holemstrong long God. Yes, afta we yumi harem nogud blong smoltaem, God ya we i gat bigfala fasin kaengud bambae i finisim trening blong yumi mo bambae i mekem yumi stanap mo yumi strong.
10. ?Fas Pita 5:6, 7 i tokbaot wanem trifala fasin we oli save halpem yumi blong no harem nogud tumas long wari?
10 Fas Pita 5:6, 7 i tokbaot tri fasin we oli save halpem yumi blong faetem wari. Wan hemia fasin blong “stap daon.” Vas 6 i finis wetem tok ya “long taem we hem i luk se i stret,” we i soem se yumi nidim longfala tingting. Vas 7 i soem se yumi save gat strong tingting taem yumi putum ol wari blong yumi long God ‘from we oltaem hem i stap tingbaot yumi,’ mo ol tok ya oli leftemap tingting blong yumi blong gat ful tras long Jeova. Ale yumi traem luksave olsem wanem tingting daon, longfala tingting, mo ful tras long God i save halpem yumi blong winim wari.
Olsem Wanem Tingting Daon i Save Givhan
11. ?Olsem wanem tingting daon i givhan long yumi blong winim wari?
11 Sipos yumi gat tingting daon, bambae yumi agri se ol tingting blong God oli hae moa long tingting blong yumi. (Aesea 55:8, 9) Tingting daon i givhan long yumi blong luksave se tingting blong yumi i smol nomo taem yumi skelem wetem hemia blong Jeova we i save luk olgeta samting semtaem. Hem i luk ol samting we yumi no kasem save long olgeta, olsem trabol blong stret man ya Job i soemaot. (Job 1:7-12; 2:1-6) Taem yumi putum yumi i stap daon “aninit long han blong God ya we i gat bigfala paoa,” yumi luksave se yumi nating nomo taem yumi skelem yumi wetem Hemia we i Hae Rula blong heven mo wol. Nao, samting ya i halpem yumi blong winim ol samting we Hem i letem i stap. Maet hat blong yumi i wantem se yumi haremgud kwiktaem nomo, be from ol gudgudfala fasin blong Jeova oli skelgud, Hem i save stret wanem taem mo olsem wanem blong wok long saed blong yumi. Ale, olsem ol smol pikinini, yumi mas gat tingting daon blong letem han blong Jeova we i gat olgeta paoa i lidim yumi, trastem se bambae hem i givhan long yumi blong winim ol wari blong yumi.—Aesea 41:8-13.
12. ?Olsem wanem wari long saed blong ol samting blong laef i save godaon sipos yumi gat tingting daon blong folem ol tok blong Hibrus 13:5?
12 Tingting daon i joen wetem fasin blong rere blong folem ol advaes long Tok blong God, we plante taem i save mekem wari i godaon. Eksampel, sipos wari blong yumi i kamaot from yumi ronem tumas ol sas samting, maet i gud blong yumi tingbaot advaes blong Pol se: “I nogud yufala i mekem fasin ya we yufala i laekem mane tumas. Sipos yufala i gat wanem samting, be yufala i mas harem gud long hem. From God i talem finis se ‘Bambae mi mi no save livim yu yu stap yu wan.’ (Hibrus 13:5) Plante man oli kam fri long bigfala wari long saed blong ol sas samting blong laef taem oli gat tingting daon blong folem advaes olsem ya. Nating se oli no winim moa mane, oli no tingting tumas long samting ya we i save spolem olgeta long saed blong speret.
Wok Blong Longfala Tingting
13, 14. (a) Long saed blong fasin blong stanap strong longtaem wetem longfala tingting, ?man ya Job i soem wanem eksampel? (b) ?Gat longfala tingting blong wet long Jeova i save mekem wanem long yumi?
13 Tok ya ‘taem we hem i luk se i stret’ we i stap long 1 Pita 5:6 i soem nid blong stanap strong longtaem wetem longfala tingting. Samtaem wan problem i save stap longtaem, mo samting ya i save mekem wari i kam antap. Speseli long taem ya, yumi nidim blong livim bisnes ya long han blong Jeova. Disaepol Jemes i raetem se: “Mo yufala i harem tok finis blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.” (Jemes 5:11) Job i lusum olgeta samting we oli sapotem hem long saed blong mane, i lusum ol ten pikinini blong hem long ded, i harem nogud tumas from wan rabis sik, mo ol man we oli gyaman se oli kam blong leftemap tingting blong hem oli jajem hem se hem i mekem samting we i no stret. I tru, i stret nomo blong sam wari i kamaot long wan taem olsem.
14 Nating se i olsem, Job i wan eksampel long fasin blong stanap strong longtaem wetem longfala tingting. Sipos yumi stap traem blong winim wan bigfala traem long saed blong bilif blong yumi, maet yumi mas wet blong kasem help, olsem Job i bin mekem. Be God i bin mekem wan samting long saed blong hem, biaen hem i mekem Job i fri long ol trabol blong hem mo i blesem hem bigwan. (Job 42:10-17) Longfala tingting blong wet long Jeova i wokem fasin blong stanap strong longtaem mo i soem se fasin blong yumi blong fasgud long God i dip olsem wanem.—Jemes 1:2-4.
Trastem Jeova
15. ?From wanem yumi mas trastem Jeova fulwan?
15 Pita i leftemap tingting blong ol fren blong hem long saed blong bilif blong ‘putum ol trabol blong olgeta long God from oltaem hem i stap tingbaot olgeta.’ (1 Pita 5:7) Ale yumi save gat mo yumi mas gat ful tras long Jeova. Proveb 3:5, 6 i talem se: “Trastem Jeova wetem olgeta hat blong yu mo no stanap long prapa save blong yu. Long olgeta rod blong yu tingbaot hem, mo hem wan bambae i mekem yu yu wokbaot long stret rod.” From ol ekspiryens we oli kasem bifo, sam man we oli gat wari oli faenem i had blong trastem ol narafala man. Be yumi gat olgeta risen blong trastem Man we i Wokem yumi, Stampa blong laef mo Man we i gohed blong givim ol samting we yumi nidim blong stap laef. Nating sipos yumi no trastem fasin blong yumi long wan samting we yumi mekem, yumi save trastem Jeova oltaem blong karemaot yumi long trabol blong yumi.—Ol Sam 34:18, 19; 36:9; 56:3, 4.
16. ?Jisas Kraes i bin talem wanem long saed blong wari blong ol samting blong laef?
16 Trastem God i joen wetem fasin blong obei long Pikinini blong hem, Jisas Kraes, we i bin tijim ol man long wanem we hem i lanem long Papa blong hem. (Jon 7:16) Jisas i talem long ol disaepol blong hem blong mekem wok blong Jeova, olsem nao oli stap ‘hivimap ol gudgudfala samting long heven.’ ?Be olsem wanem long ol samting long saed blong bodi olsem kakae, klos, mo haos? Jisas i givim advaes se, “I nogud yufala i stap tingting tumas.” Hem i soemaot se God i stap givim kakae long ol pijin. Hem i givim naesfala klos long ol flaoa. ?Ol man blong wok blong God oli no hae moa long ol samting ya? Yes, oli hae moa. Taswe Jisas i talem se: ‘Fastaem yufala i mas lukaotgud blong putum Kingdom blong God mo stret fasin blong hem long fasples long laef blong yufala. Nao biaen hem i save givim olgeta samting ya tu long yufala.’ Jisas i gohed se: “I nogud yufala i stap tingting tumas from ol samting blong tumora. Tumora i taem blong tingbaot ol bisnes blong tumora. Trabol blong wan dei nomo, hem i naf blong wan dei.” (Matyu 6:20, 25-34) Yes, yumi nidim kakae, dring, klos, mo haos, be sipos yumi trastem Jeova, bambae yumi no save wari tumas long ol samting ya.
17. ?Wanem pija tok yumi save yusum blong tokbaot fasin ya blong putum Kingdom long fas ples long laef blong yumi?
17 Blong putum Kingdom long fasples long laef blong yumi, yumi mas trastem God mo holem ol samting we oli impoten long stret ples blong olgeta. Wan man blong daeva we i gat longfala win i save go aninit long wota blong lukaotem osta we i gat perel insaed long hem. Hemia rod ya nomo blong hem i stap kasem mane blong pem ol samting blong famle blong hem. !Hemia wan samting we i impoten tumas! ?Be wanem i moa impoten? !Win! Hem i mas kam antap blong fulumap waet leva blong hem bakegen wetem win. Win i samting we i moa impoten. Sem mak, maet long sam rod yumi mas joen long fasin blong naoia blong kasem wanem yumi nidim blong laef. Be, ol samting long saed blong speret oli mas kam fastaem from we laef blong famle blong yumi i stanap long ol samting ya long saed blong speret. Blong ronwe long fasin blong wari tumas long ol samting we yumi nidim long saed blong bodi, yumi mas trastem God fulwan. Antap moa, ‘gat plante wok blong mekem long wok blong Masta’ i save givhan blong mekem wari i godaon from “glad blong Jeova” i olsem ples blong haed blong yumi.—1 Korin 15:58; Nehemaea 8:10.
Gohed Nomo Blong Putum Ol Wari Blong Yu Long Jeova
18. ?Wanem pruf i soem se putum ol wari blong yumi long Jeova i rili save halpem yumi?
18 Blong holem klia tingting oltaem long ol samting long saed blong speret, yumi mas gohed blong putum ol wari blong yumi long Jeova. Tingbaot oltaem se Hem i rili stap tingbaot ol man blong wok blong Hem. Blong kasem klia, hemia wan eksampel: From we hasban blong hem i no stap tru long hem, wan Kristin woman i wari tumas gogo hem i no save slip from. (Skelem Ol Sam 119:28) Be, long bed, hem i putum olgeta wari blong hem long Jeova. Hem i talemaot olgeta samting we i stap long hat blong hem long God, i talem long Hem trabol we hem mo tufala smol dota blong hem oli harem nogud from. Afta we hem i krae bigfala blong askem help long prea we i kamaot long hat, oltaem woman ya i save slip, from hem i trastem se Jeova bambae i lukaot long hem mo ol pikinini blong hem. Naoia, woman ya i divos finis long fasin we Baebol i agri long hem, mo i haremgud long mared blong hem long wan elda.[4]
19, 20. (a) ?Wanem sam rod we yumi save folem blong winim wari? (b) ?Yumi mas gohed blong mekem wanem wetem olgeta wari blong yumi?
19 Olsem ol man blong Jeova, yumi save yusum ol defren rod blong winim wari. Fasin blong mekem Tok blong God i wok i givhan bigwan. Yumi gat rij kakae long saed blong speret we God i stap givim tru long ‘slef we i stret mo waes’ olsem ol haf long Wajtaoa mo Wekap! we oli givhan mo mekem yumi haremgud. (Matyu 24:45-47) Yumi gat help blong tabu speret blong God tu. Prea oltaem we i kamaot long hat i mekem yumi haremgud bigwan. Ol Kristin elda oli rere mo oli wantem blong givim help long saed blong speret mo mekem yumi haremgud.
20 Tingting daon mo longfala tingting blong yumi oli impoten bigwan blong winim wari we i mekem yumi harem nogud. Samting we i impoten moa hemia ful tras long Jeova, from we bilif blong yumi i kam strong moa taem yumi luk olsem wanem Hem i givhan mo soem rod long yumi. Ale, bilif long God i save mekem se tingting blong yumi i no trabol tumas. (Jon 14:1) Bilif i pusum yumi blong putum Kingdom long fasples long laef blong yumi mo stap bisi long wok blong Masta we i karem glad, mo i save givhan long yumi blong winim wari. Ol wok olsem oli mekem yumi harem sef long medel blong ol man we bambae oli sing blong presem God blong olwe. (Ol Sam 104:33) Ale yumi mas gohed nomo blong putum ol wari blong yumi long Jeova.
?Bambae Yu Yu Ansa Olsem Wanem?
◻ ?Wanem mining blong tok ya wari?
◻ ?Wanem sam rod we yumi save folem blong winim wari?
◻ ?Olsem wanem tingting daon mo longfala tingting oli save givhan blong winim wari?
◻ Taem yumi traem blong winim wari, ?from wanem i nidim we yumi trastem Jeova fulwan?
◻ ?From wanem yumi mas gohed nomo blong putum olgeta wari blong yumi long Jeova?
[Tok blong pija long pej 24]
?Yu save from wanem Jisas i talem se, “I nogud yufala i stap tingting tumas”?