Save Blong Mekem Ol Gudfala Samting—Wan Presen We God i Givim Wetem Gadhat
JEOVA i glad long ol wok we hem i mekem. (Ol Sam 104:31) Jenesis 1:31 i soem se hem i haremgud tumas long ol samting we hem i wokem: “Hem i luk olgeta wok ya we i mekem, mo i glad tumas long olgeta.”
Jeova i no mekem se hem wan nomo i save kasem fasin glad from fasin ya blong wokem ol samting. No gat. Hem i givim jans long Jisas blong kam olsem man we hem i yusum, no wan tul blong mekem ol narafala samting. (Jon 1:3; Kolosi 1:16, 17) Jisas we i olsem “wan nambawan man blong wok,” hem tu i stap “glad fored long [Jeova] oltaem nomo.”—Proveb 8:30, 31.
Be i no olgeta long heven nomo we oli gat save blong wokem ol gudfala samting. Eugene Raudsepp i raetem long buk ya blong hem, How Creative Are You? se: “Save ya blong mekem ol gudfala samting i stap insaed long ol man.” Samting ya i no kamaot olsem nomo, from we God i mekem man long pija blong hem. (Jenesis 1:26) Olsem nao, Jeova i mekem ol man blong haremgud long ol gudfala wok we oli mekem wetem save blong olgeta.—Jemes 1:17.
From samting ya, yumi no sapraes se, Baebol i talem ol toktok we i gud tumas long saed blong fasin blong singsing, danis, wivim ol samting, kuk, wokem ol pija, mo ol nara gudfala wok we man i gat save blong mekem. (Eksodas 35:25, 26; 1 Samuel 8:13; 18:6, 7; 2 Kronikel 2:13, 14) Besalel, wan man we i gat gudhan blong mekem plante gudgudfala wok, i yusum save blong hem blong “mekem plan blong ol tul” blong givhan blong bildim haos tapolen. (Eksodas 31:3, 4) Maet Jabal we i man blong lukaot sipsip, hem nao i faswan blong wokem wan haos tapolen, we i isi mo i kwik long ol man we oli stap muf long wan ples afta long narafala ples. (Jenesis 4:20) Deved i wan man blong plei myusek mo wan blong wokem singsing, be i no hemia nomo. Hem i wan man blong wokem ol nyufala tul blong plei myusek tu. (2 Kronikel 7:6; Ol Sam 7:17; Emos 6:5) Maet Miriam i statem danis ya we oli mekem wetem bigfala glad blong tingbaot merikel we God i mekem long ol man Isrel blong oli pastru long Red Si.—Eksodas 15:20.
Plante taem, save blong wokem ol gudgudfala samting i wan rod blong leftemap trufala wosip. Jisas i gat save blong mekem ol gudfala pijatok mo store we oli save tijim wan lesen long ol man, blong talemaot mesej blong hem. Hem i talem long ol man blong hem blong folem sem fasin blong “hadwok long prij mo tij.” (1 Timote 5:17) Yes, wok blong olgeta blong prij i no wan samting nomo we oli mas mekem oltaem. Hem i wan impoten wok we oli mas gat save blong mekem, blong oli save faenem ol gudfala rod blong tijim ol man. (Kolosi 4:6) Samting ya i impoten tumas, taem wan man i stap tijim ol pikinini blong hem.—Dutronome 6:6, 7; Efesas 6:4.
Olsem nao, Jeova i mekem se ol narafala man tu oli glad from gudfala wok blong olgeta. !Hemia wan nambawan presen we hem i givim wetem gladhat!