Ripot Long Wok Blong Kingdom

Ol Man Blong God Oli Glad Blong Wok

NEM blong hem Josef, mo hem i blong aelan blong Saepras. Hem i wan long ol Kristin long faswan handred yia we oli salem graon mo haos blong olgeta, blong givim presen mane blong mekem se Kristin Skul i gohed. From we hem i gat sore long ol man mo hem i glad blong givim samting long narafala man, oli kolem hem se Banabas, we i minim “Man blong leftemap tingting.”​—Ol Wok 4:​34-37.

Stat longtaem bifo i kam, trufala intres long ol narafala man i stap olsem wan fasin we i makemaot ol trufala man blong wosip long Jeova. Tede, ol Wetnes blong Jeova oli mekem i sem mak nomo, olsem ekspiryens ya blong Solomon Aelan i soem.

Wan grup blong bitim 60 Wetnes oli aot long Ostrelya mo Nyu Silan, oli kam long Honiara, bigfala taon blong Solomon Aelan, long Guadalkanal. Oli kam blong givhan blong bildim wan Haos Asembli, we oli save yusum blong mekem ol bigfala Kristin miting long hem. !Oli tekem kolosap tu wik nomo blong bildim wan haos we i naf blong 1,200 man oli sidaon insaed long hem!

Samwe long taem ya, ol haeman long smol taon blong Munda, long aelan blong Nyu Jojia, oli givim wan pis graon long ol Wetnes blong Jeova, stret long medel blong taon. Oli wantem bildim wan Haos Kingdom, wan ples blong wosip. Mo oli rili nidim wan. Oli stap mekem miting long wan rum insaed long wan smol gras haos.a Oli no gat mane blong bildim wan Haos Kingdom. Bighaf blong olgeta we oli stap long kongregesen ya, oli olfala, oli no strong long bodi mo oli ol pikinini. Mo i no gat wan long olgeta we i gat bigfala ekspiryens blong bildim haos.

Samwe long 380 kilomita longwe, long aelan blong Guadalkanal, ol Wetnes long taon blong Honiara oli glad blong givhan long wok ya. (Ol Sam 110:3) Oli tingting se: “Sipos ol brata blong yumi long ol nara kantri oli glad blong kam blong bildim wan Haos Asembli blong yumi long tu wik, ale yumi tu, yumi save givhan long ol brata blong yumi long Munda, blong bildim wan Haos Kingdom long tu wik.”

Hemia nao samting we i hapen. Wan dei, wan sip we i fulap long ol Wetnes we oli hapi mo oli wantem wok fri nomo, i kamtru long Munda. Ol man mo woman, ol olfala mo yangfala, evriwan oli kwik blong aotem ol kago long sip. Nao oli mekemrere blong statem wok blong bildim haos wetem wud, simen, kapa mo ol narafala samting we oli kasem Munda fastaem, bifo we oli kamtru.

Smoltaem afta we wok i stat, wan strongfala laetning i katem wora saplae blong taon. Be, samting ya i no blokem olgeta. Ol Wetnes oli digim wan wel we i givim wora long olgeta, go kasem we oli finisim wok blong bildim. ?Olsem wanem long kakae blong ol wokman? Samting ya tu i no wan problem. Ol volontia wokman blong Honiara oli karem plante kakae i kam wetem olgeta, we ol kongregesen long Honiara oli givim. !Oli karem ol man blong kuk oli kam tu!

Taem ol man we oli stap kolosap oli luk we wok i stap gohed kwik, oli no bilivim. Wan long olgeta i talem se: “Long ples ya, ol man oli no tekem sam dei nomo blong mekem wok olsem. Oli tekem plante yia.” Wan narafala man we i stap kolosap, we hem i wan lida blong skul, i talem se oli stap wokem jyos blong hem blong 20 yia finis, be oli no finisim yet. I no olsem long saed blong nyufala Haos Kingdom blong ol Wetnes blong Jeova long Munda. !Hem i finis long ten dei nomo!

[Futnot]

[Map blong pija long pej 24]

(Lukluk niuspepa)

Solwora Blong Saot Pasifik

SOLOMON AELAN

Munda

GUADALKANAL

Honiara

[Map]

OSTRELYA

NYU SILAN