Ol Haos Wosip

BAEBOL i talem se ol man we oli wosipim Jehova oli mas joen wanples blong kasem tijing mo blong givgivhan long olgeta. (Hib. 10:23-25) Taem God i jusumaot ol man Isrel blong oli kam man blong hem, fas haos wosip blong olgeta hemia “tabenakel, hemia tent blong miting.” (Eks. 39:32, 40) Biaen, Solomon we i pikinini blong Deved, i bildim wan tempol blong givim ona long God. (1 King 9:3) Tempol ya i lus long yia 607 bifo Kraes, ale ol man Jiu oli mekem wosip long ol haos prea. Biaen, oli wokem gud tempol bakegen, mo hem i kam stamba ples blong mekem tru wosip. Jisas i go long haos prea blong ol man Jiu mo long tempol, blong tijim ol man. (Luk 4:16; Jon 18:20) Wan taem, Jisas i mekem miting long wan hil.—Mat. 5:1 kasem 7:29.

² Afta we Jisas i ded, ol Kristin oli mekem miting long ol pablik ples, mo long ol haos blong olgeta nomo, blong kasem tijing blong Baebol, mo blong harem gud long kampani blong ol narafala Kristin. (Wok 19:8, 9; Rom 16:3, 5; Kol. 4:15; Flm. 2) Taem ol man oli agensem ol Kristin, oli mekem miting long wan ples we i haed o i longwe long ol man. Yes, ol gudfala man blong God bifo, oli wantem tumas blong joen wanples blong mekem wosip, mo blong “Jehova . . . i tijim [olgeta].”—Aes. 54:13.

³ Sem mak tede, sam Kristin oli mekem miting long haos we oli rentem o long haos blong wan brata. Plante taem oli mekem miting blong prij long haos blong wan brata o sista. Olgeta we oli letem haos blong olgeta blong mekem ol miting ya, oli luksave se i wan ona blong gat miting long haos blong olgeta. Plante oli talem se samting ya i givhan long olgeta blong oli kam strong moa long wosip blong olgeta.

HAOS KINGDOM

⁴ Prapa haos miting blong ol Witnes blong Jehova, hemia Haos Kingdom. Plante kongregesen oli pem graon mo oli bildim wan Haos Kingdom. Sipos no, oli pem wan haos mo oli wokem gud bakegen. Long sam ples, plante kongregesen oli yusum sem Haos Kingdom. Hemia i sevem mane mo i mekem se i gat man oltaem long Haos Kingdom. Sam kongregesen oli rentem wan haos. Taem yumi bildim niufala Haos Kingdom o yumi jenisim plante samting long wan we i olfala, i stret blong dediketem i go long God. Be sipos yumi mekem smosmol jenis nomo, i no nid blong mekem wan miting olsem.

⁵ Haos Kingdom i no flas tumas mo i no blong mekem ol man oli sapraes. Long ol defren ples, ol Haos Kingdom oli defdefren, be oli stret blong mekem wosip. (Wok 17:24) Haos Kingdom i mas wan gudfala haos we i stret blong mekem ol Kristin miting long hem, i stret long ples blong yumi, mo yumi harem gud blong stap long hem.

⁶ Ol kongregesen blong ol Witnes blong Jehova oli givim presen mane blong pem ol samting, olsem lektrik mo wota, mo blong fiksimap mo mekem Haos Kingdom i stap klin. Oli no mekem kleksin, mo oli no askem mane long ol man. I gat wan bokis i stap blong putum presen mane long hem, nao olgeta we oli kam long ol miting oli save putum presen mane blong givhan blong pem ol kaon blong Haos Kingdom. Oli givim presen mane olsem we oli wantem mo wetem gladhat.—2 Kor. 9:7.

⁷ Olgeta long kongregesen oli luksave se i wan ona blong givim presen mane blong sapotem Haos Kingdom mo blong givim taem mo paoa blong olgeta blong klinim mo fiksimap. Wan elda o wan man blong givhan i mekem program blong wok ya. Klosap oltaem, ol grup blong prij oli klinim Haos Kingdom, mo elda we i lukaot long grup o brata we i givhan long hem, i lidim wok ya. Haos Kingdom i mas klin insaed mo afsaed tu, from we i karem nem blong Jehova mo oganaesesen blong hem.

⁸ Sipos i gat bitim wan kongregesen we i yusum wan Haos Kingdom, ol elda long ol kongregesen ya oli putumap wan Komiti Blong Lukaot Long Haos Kingdom. Komiti ya i lukaot long ol wok we i joen wetem Haos Kingdom mo yad blong hem. Ol elda long ol kongregesen ya oli jusum wan brata blong i kodineta blong komiti ya. Komiti i wok aninit long ol elda long ol kongregesen ya, blong meksua se Haos Kingdom i stap gud mo i gat ol samting we ol brata oli nidim blong mekem Haos Kingdom i stap klin. Olgeta kongregesen we oli yusum Haos Kingdom oli mas wok wanples blong mekem ol samting ya.

⁹ Taem plante kongregesen oli yusum wan Haos Kingdom, maet oli jenisim taem blong ol miting blong olgeta evri yia. Taem ol elda oli mekem program ya, oli mas tingbaot samting we i stret long evri kongregesen, mo oli mas soemaot se oli lavlavem olgeta. (Fil. 2:2-4; 1 Pita 3:8) Wan kongregesen i no mas mekem desisen blong ol narafala kongregesen. Long wik we eria elda i visitim wan long ol kongregesen ya, ol narafala kongregesen oli jenisim taem blong ol miting blong olgeta.

¹⁰ Sipos wan brata i wantem yusum Haos Kingdom blong mekem tok blong mared o funerol tok, hem i save askem long Sevis Komiti Blong Kongregesen. Ol elda ya bambae oli tokbaot bisnes ya mo mekem desisen folem advaes we branj ofis i givim.

¹¹ Sipos Sevis Komiti i talem se brata i save yusum Haos Kingdom blong mekem tok blong mared o tok blong berem dedman, ol man we oli kam oli mas mekem fasin we i stret long ol Kristin. Oli no mas mekem wan samting we kongregesen i harem nogud long hem, mo oli no mas sakem doti long nem blong Jehova mo gudnem blong kongregesen. (Fil. 2:14, 15) Branj ofis i save mekem plan blong yusum Haos Kingdom blong mekem sam narafala samting tu, olsem Kingdom Ministri Skul mo Skul Blong Ol Paenia.

¹² Evriwan long kongregesen oli mas respektem haos miting oltaem. Klos, hea, mo fasin blong olgeta i mas soemaot se oli tinghae long wosip blong Jehova. (Pri. 5:1; 1 Tim. 2:9, 10) Taem yumi folem ol advaes long saed ya, yumi soemaot se yumi tinghae long ol Kristin miting.

¹³ I no mas gat wan samting we i blokem ol brata mo sista blong oli no save lesin gud long miting. I gud ol pikinini oli sidaon klosap long papa mo mama blong olgeta. Sipos pikinini i smol, i moagud famle i sidaon long ples we bambae oli no spolem narafala. Olsem nao, papa o mama i save tekem pikinini i go afsaed blong stretem hem o from wan narafala risen.

¹⁴ Long ol miting long Haos Kingdom, sam brata we oli naf oli mekem wok ya blong welkam. Ol brata ya oli mas wajem gud ol samting long Haos Kingdom, oli mas kaen long ol man, mo oli mas naf blong luksave samting. Wok blong olgeta i blong sekhan long ol niuwan we oli kam long miting mo welkamem olgeta. Mo tu, oli faenem jea blong olgeta we oli kam let, oli kaontem mo raetemdaon hamas man i stap long miting, mo oli jekem ol fan mo ol windo blong meksua se ples i no hot tumas mo i no kolkol tumas. Sipos i nidim, ol man blong welkam oli mekem ol papa mo mama oli tingbaot se oli mas lukaotgud long ol pikinini blong olgeta, blong oli no resis olbaot bifo mo afta long ol miting, mo oli no mas pleplei antap long stej. Taem wan pikinini i mekem noes, long kaen fasin, man blong welkam i save askem long papa o mama blong i tekem pikinini ya i go afsaed, blong i no spolem ol narafala we oli wantem lesingud. Wok blong ol man blong welkam i givhan bigwan blong mekem se evriwan oli harem gud long miting. I moagud ol elda mo man blong givhan oli mekem wok ya blong welkam.

BILDIM OL HAOS KINGDOM

¹⁵ Long taem bifo, sam Kristin oli gat mane, be samfala nogat. Taswe aposol Pol i raetem se: “Naoia, from we yufala i gat plante samting, i stret blong yufala i givhan long sam narafala man we oli sot. Nao sipos samtaem yufala i sot mo olgeta oli gat plante, bambae olgeta oli save givhan long yufala bakegen. Hemia i rod blong mekem se evriwan i gat naf samting.” (2 Kor. 8:14) Tede yumi folem yet fasin ya blong “mekem se evriwan i gat naf samting.” Presen mane we olgeta kongregesen long fulwol oli givim, i givhan blong bildim mo wokem gud bakegen ol Haos Kingdom. Oganaesesen blong Jehova mo ol kongregesen we oli yusum presen mane ya, oli talem bigfala tangkiu long ol brata mo sista long fulwol we oli gat gladhat blong givim presen.

¹⁶ Branj ofis nao i jusum weswan Haos Kingdom wan kongregesen bambae i go long hem. Mo hem i talem wetaem mo weples long teritori blong branj ofis, blong wokem ol niufala Haos Kingdom, mo blong riperem ol Haos Kingdom. Long taem blong disasta, bambae i gat plan i stap blong fiksimap ol Haos Kingdom we oli brobrok, mo maet haos blong ol brata mo sista tu.

¹⁷ Branj ofis i sanem ol volontia blong oli faenem wan graon blong pem, oli droem plan blong Haos Kingdom, oli kasem ol pepa we i givim raet blong bildim, oli bildim, mo oli lukaot gud long hem. Long plante kantri i nidim plante Haos Kingdom, taswe i nidim plante man blong wok tu. Ol pablisa we oli baptaes mo oli naf blong mekem wok ya, mo oli wantem givhan, oli mas fulumap wan pepa mo givim long Sevis Komiti Blong Kongregesen. Ol pablisa we oli no baptaes, oli save givhan blong bildim mo wokem gud bakegen Haos Kingdom we kongregesen blong olgeta i yusum.

OL HAOS ASEMBLI

¹⁸ Plante taem ol fas Kristin oli mekem miting long ol smosmol grup. Be wanwan taem “wan hip blong ol man we oli plante lelebet” oli joen wanples. (Wok 11:26) Sem mak tede, ol man blong Jehova oli joen wanples long ol bigfala grup blong mekem wan dei asembli mo bigfala asembli. Plante taem oli rentem wan haos we i stret long namba blong ol man. Be sipos i no gat wan haos we i naf, maet oli wokem wan ples blong wosip we yumi kolem Haos Asembli.

¹⁹ Samtaem oli pem wan haos mo wokem gud bakegen. Be plante taem oli pem wan graon mo oli bildim wan niufala Haos Asembli. Saes blong ol Haos Asembli i defdefren, i dipen nomo long namba blong ol brata we bambae oli yusum. Bifo we branj ofis i mekem desisen blong pem o bildim wan haos olsem, oli lukluk gud long praes blong hem mo oli skelem se bambae oli yusum haos ya oltaem, o sam samtaem nomo.

²⁰ Branj ofis i jusum sam brata blong oli lukaot long ol Haos Asembli mo long wok blong fiksimap ol samting we oli brok. Ol brata mo sista long ol defdefren eria oli gat taem blong olgeta blong klinim ol Haos Asembli. Tu taem long wan yia, oli mekem wan spesel klinap mo oli fiksimap ol samting. I gud ol brata mo sista oli volontia blong mekem wok ya. Taswe, ol kongregesen oli mas sapotem fulwan ol plan ya.—Sam 110:3; Mal. 1:10.

²¹ Samtaem oli yusum Haos Asembli blong mekem kos, olsem ol Baebol Skul mo sam spesel miting blong ol eria elda. Haos Asembli i wan ples blong wosip we yumi givim i go long Jehova, olsem Haos Kingdom. Taswe, taem yumi joen wanples long Haos Asembli, fasin blong yumi, wetem klos mo hea blong yumi, oli mas soemaot se yumi respektem ples ya olsem wan ples blong mekem wosip long Jehova.

²² Plante niuwan oli stap hareap nomo blong joen long oganaesesen blong God long en blong ol las dei ya. Hemia i soemaot se Jehova i stap blesem yumi. (Aes. 60:8, 10, 11, 22) Taswe, yumi glad blong sapotem plan blong wokem ol haos wosip mo mekem olgeta oli stap gud mo klin oltaem. Taem yumi mekem olsem, yumi talem tangkiu from ol haos ya we yumi save joen long olgeta blong leftemap tingting blong yumi, antap moa, long taem ya we dei blong Jehova i klosap tumas.