“Salem Sol” Long Mosambik

FRANCISCO COANA, wan memba blong komiti long kantri blong Mosambik, i spenem ten yia long “ol kamp blong tijim ol man.” Hem i talemaot store blong hem: “Mi mi save se bambae mifala i stap long ples ya blong longtaem, taswe mi askem seket elda sipos mi save gohed long wok blong fultaem paenia. ?Be, olsem wanem mi save putum plante haoa long wok blong prij long ol man, from we evri man insaed long kamp ya oli ol Wetnes blong Jeova? Ale, mi talem se bambae mi go long Milanj, wan taon we i stap 47 kilomita longwe, blong traem faenem sam man blong prij long olgeta.

“Nating se mifala i no gat raet blong goaot long kamp ya, oli no strong blong folem rul ya. Mi rimemba, mi bin go long bus, mi nildaon, ale mi prea blong mi save faenem wan rod blong prij long ol man raonabaot. I no longtaem Jeova i ansa.

“Mi faenem wan man we i gat wan baskel. Ale mitufala i agri long wan plan. Hem i agri se sipos mi digim mo planem kakae long ful garen blong hem, we i kolosap wan hekta, bifo taem blong ren i kam, bambae hem i givim baskel ya olsem pei blong mi. Ale evri moning mi wokem garen blong man ya. Jeova i blesem plan ya, from we biaen mi kasem baskel ya.

“Risal blong samting ya, hemia se mi save go kasem bigfala taon blong Milanj, mo gohed long wok blong paenia we i karem plante frut long ples ya. From we long ples ya oli blokem wok blong mifala, mi mas faenem wan rod blong storeyan wetem ol man long saed blong trutok. Mi haedem sam buk mo magasin aninit long sot blong mi, mo mi tekem sam sol wetem mi long wan smol bag, ale, mi goraon blong salem sol ya. Mi no salem long 5 metekis, be, mi salem long 15 metekis. (!Sipos praes blong sol ya i daon tumas, bambae ol man oli pem evriwan, mo bambae mi no moa gat sol blong yusum blong prij long ol man!) Hemia rod we mi yusum blong storeyan wetem ol man:

“‘!Halo! Mi stap salem sol tede.’

“‘?Yu salem blong hamas?’

“‘Fiftin metekis.’

“‘E, no. !Hem i sas tumas!’

“‘Yes, i tru hem i sas. Be sipos yu ting se hem i sas naoia, yu wet i no longtaem bambae hem i moa sas. ?Yu save se Baebol i talemaot samting ya?’

“‘Mi mi neva ridim samting ya long Baebol blong mi.’

“‘No, be hem i stap insaed. Traem karem Baebol blong yu i kam, bambae mi soem long yu.’

“Long rod ya, storeyan blong mi i gohed wetem Baebol blong hem, olsem nao, Baebol blong mi i save stap aninit long sot blong mi. Mi yusum Revelesen japta 6, we i tokbaot taem we laef i had mo kakae i sot. Sipos mi luk se man ya i intres, ale, mi pulumaot buk ya Trutok Blong Soemaot Rod Blong Itenel Laef no buk ya Good News to Make You Happy mo mi statem wan Baebol stadi.

“Risal, hemia se, mi save mekem wan grup blong 15 man we oli intres long Milanj. Be i no longtaem biaen, gavman i faenemaot wok blong mifala. Wan dei, taem mi stap mekem wan Baebol stadi, polis i kam insaed long haos we mifala i stap mekem stadi long hem, mo oli holem mifala. Oli tekem mifala evriwan, wetem ol smol pikinini blong famle ya tu, i go long kalabus long ples ya. Afta wan manis, oli sanem mifala evriwan i gobak long kamp.”

Ol ekspiryens ya oli no daonem strong tingting blong ol brata blong yumi. I defren olgeta, from we naoia, Francisco mo famle blong hem, wetem plante taosen brata blong olgeta we oli stap long ol kamp ya, oli fri blong wosip mo prij long kantri blong Mosambik.