Wan Bigfala Hil We i Stap “Mufmuv”

WAN long olgeta hil long wes blong Aerlan i defren long ol narawan, from we top blong hem i olsem volkeno. Hemia hil we oli kolem Kro Patrik, (Croagh Patrick). Evri yia, long laswan Sande blong Julae, i luk olsem we top blong hil ya i stap mufmuv. Samwe 30,000 man, ol yangfala mo ol olfala, oli klaem i go long wan tabu ples, we i stap antap olgeta (765 mita).

Long dei ya, ol man oli go antap mo kamdaon long wan rod we i smol, i nogud, mo long sam ples, i gat denja tu. Laswan haf blong rod ya, kolosap long top (raonabaot 300 mita), hem i olsem wan bigfala klif. Mo kolosap ful rod ya i olsem ston we i save brobrok isi. Taswe, i denja blong klaem long ples ya mo i mekem man i taed tu.

Samfala oli no putum sus blong klaem, mo samfala oli klaem long sam ples long ni blong olgeta. Long taem bifo, ol man oli stat blong mekem trep ya long tudak blong naet.

?From wanem trep ya long Kro Patrik i impoten long plante man?

Wan Tabu Ples Longtaem Finis

Jes afta 400 K.T., Roman Katolik Jyos i sanem Patrik i go long Aerlan, olsem wan misinari bisop. Hem i wantem pulum ol man long Aerlan oli kam Kristin. Long ol yia we Patrik i prij mo wok wetem ol man long ples ya, hem i stanemap Katolik Jyos.

Wok blong hem i pulum hem blong go long plante ples long kantri ya. Wan ples, hemia wes blong Aerlan we, folem sam ripot, hem i spenem 40 dei mo naet antap long wan hil. Biaen, oli putum nem blong hem long hil ya​—Kro Patrik (we i minim “Hil blong Patrik”). Long ples ya, hem i livim kakae blong hem mo i prea blong askem we wok blong hem i karem frut.

Long ol yia we oli pas, i gat plante kastom store long saed blong ol wok blong hem. Wan store we plante man oli save, hemia se taem Patrik i stap antap long hil ya, hem i ronemaot evri snek blong Aerlan.

Ol olfala oli talem se, hem i bildim wan smol jyos antap long hil ya. Nating se haos ya i no moa stap tede, faswan faondesen blong hem i stap yet. Mo ples ya wetem hil ya tu, i kam wan tabu ples long ol yia biaen.

Ol Ples Long Trep Ya

Long wan man we i olfala finis no wan man we i no lanem blong klaem antap long ol bigfala hil, hem i wan bigfala wok blong klaem 5 kilomita blong go antap, mo kamdaon bakegen, we oli no kasem wan kil.

Long sam ples long rod blong go antap, i gat sam smol grup blong man we oli stap rere blong givhan kwiktaem, long man we i kasem enikaen kil.

I gat tri ples blong spel, no stesen, long rod we i go antap. Long ol ples ya, ol man oli stop blong mekem sam kaen eksasaes. Hemia i blong mekem i strong long olgeta bakegen from ol sin blong olgeta. I gat wan saen long stat blong rod we i eksplenem ol eksasaes ya fulwan.​—Lukluk bokis.

?From Wanem Oli Klaem?

?From wanem plante man oli mekem trep ya we i hadwok? ?From wanem samfala oli mekem i strong tumas long olgeta bakegen, taem oli stap klaem?

Samfala oli bilif se sipos oli prea long trep ya, i gat moa jans se bambae oli kasem ol samting we oli askem. Samfala oli mekem blong traem kasem fogif from wan sin we oli bin mekem. Sam narafala bakegen, oli ting se hemia i wan rod blong soemaot fasin tangkyu blong olgeta. Plante man oli go long trep ya jes blong joen wetem ol narafala man nomo. Wan haeman i talem se, trep ya ‘i soemaot fasin blong wok tugeta wetem wan tingting, mo fasin lav we i stap long medel blong grup ya.’ Hem i talem tu se fasin blong olgeta blong klaem hil ya, Kro Patrik, “i rod blong olgeta blong folem Sen Patrik, mo blong luksave se oli gat kaon blong givimbak long hem from we hem i givhan long olgeta long saed blong bilif.” Hem i ademap se, samting we i moa impoten, se fasin blong klaemap “i olsem wan panis, from we hadwok we oli mekem i rili wan fasin blong soem sore from ol sin blong olgeta. Taswe, fasin blong klaem sloslou go kasem antap olgeta, i wan longfala rod blong tanem tingting from ol sin ya.”

!Wan man i glad blong talem se hem i mekem trep ya 25 taem finis! !Hem i talem se, hem i mekem olsem blong “panisim hem wan smol”! Wan narafala man i eksplenem klia, i se, “Sipos yu no harem i soa, yu no winim wan samting.”

Plante oli no putum sus blong klaem antap, nating se oli no nidim blong mekem olsem. ?From wanem oli mekem olsem? Faswan samting, oli ting se graon i “tabu,” taswe oli karemaot sus blong olgeta. Seken samting, i blong kasem mak blong olgeta, blong ‘panisim olgeta wanwan smol.’ Samting ya i soem from wanem samfala oli mekem ol eksasaes long ni blong olgeta.

I Pusum Mifala Blong Talem Tangkyu Long Man We i Wokem Olgeta Samting

?Be, olsem wanem long wan man we i no gat sem tingting long saed blong skul, olsem olgeta ya we oli mekem trep ya long wan spesel dei? Long eni gudfala dei mo wetem strong sus, man i save klaem antap long hil ya. Mifala i no klaem long wan dei we wan bigfala hif blong man blong jyos oli stap klaem i go antap. Plante taem mifala i stop blong spel, ale mifala i gat jans blong tingting long samting we mifala i stap mekem, mo olsem wanem hil ya i gat paoa long plante man. Mifala i tingbaot ol taosen man we oli mekem had trep ya blong go antap long hil, mo we oli mekem ol defren eksasaes. Samting ya i mekem mifala i tingbaot se, ‘?Hemia nao samting we God i wantem? ?Ol kastom blong skul, olsem fasin blong klaem antap no wokbaot raon long sam spesel ston mo talem bakegen mo bakegen ol spesel prea, hem i rili mekem man i kam kolosap moa long God?’ ?Olsem wanem long advaes blong Jisas long Matyu 6:6, 7, long saed blong fasin blong talem bakegen mo bakegen ol semkaen prea?

Mifala i no klaem antap long hil ya blong kasem sam spesel filing long saed blong skul. Be yet, mifala i harem se mifala i kam kolosap long Man we i Wokem yumi, from we mifala i haremgud blong luk ol samting we hem i wokem. Ol hil long eni ples, oli haf blong ol nambawan samting long wol ya. Antap long hil olgeta, mifala i save luk olgeta ples daon raon long mifala, we oli naes tumas. Mo mifala i save luk tu, ples we solwora blong Atlantik i stat. Long wan saed, i gat ol smosmol aelan long solwora we oli saengud. Long narasaed i defren olgeta, i gat ol bigbigfala hil we oli drae mo oli gat plante ston.

Mifala i tingbaot ol trifala stesen. Nao ol tok blong Jisas oli kam long tingting blong mifala. Hem i talem long ol man blong hem se: “Taem yufala i prea, i nogud yufala i stap talem plante tok olsem we ol hiten man oli stap mekem. Ol hiten man ya oli ting se God bambae i harem olgeta from we oli talem plante toktok.”​—Matyu 6:7.

Mifala i luksave se bigfala hil ya i kam olsem wan haf blong kastom blong plante taosen man, mo i mekem olgeta oli kalabus long wan strong kastom. Mifala i tingbaot olsem wanem samting ya i defren olgeta long fasin fri we aposol Jon i tokbaot, taem hem i talem se: “Yumi stap folem ol loa blong hem [God]. Mo ol loa blong hem oli no strong tumas blong folem.”​—1 Jon 5:3.

Mifala i glad tumas long wokbaot blong mifala, taem mifala i klaem antap long bigfala hil ya Kro Patrik. Samting ya i pulum mifala blong tingbaot taem ya we olgeta man long wol bambae oli fri long ol kastom we oli no stanap long Baebol, mo oli save mekem wosip long “speret mo long trutok” long Man ya we i Wokem wol, we i gat lav.​—Jon 4:24, NW.

[Bokis blong pija long pej 27]

Ol Ples Long Trep Ya

Evri man we i mekem trep antap long bigfala hil ya, long dei blong Sen Patrik no long wan long ol eit dei blong lafet ya, no eni taem long ol manis blong Jun, Julae, Ogis mo Septemba, mo we i PREA INSAED NO KOLOSAP LONG SMOL HAOS WOSIP from Pop, i save joen fulwan blong tekem bred mo waen, sipos i go talemaot ol sin blong hem mo go long Holi Komunyon, antap long hil ya no eni taem long wik ya.

OL KASTOM STESEN

I gat tri “stesen” (1) Wan i stap daon long klif, no long Liak Benon (Leach Benain), (2) Wan antap long hil olgeta, (3) Wan long Rilig Mur (Roilig Muire), longwe lelebet daon long saed blong hil ya, saed we i go long Likanwe [wan taon].

Namba 1 Stesen - LIAK BENON

Man we i mekem trep ya i mas wokbaot raon long hif blong ston seven taem, mo i mas talem Prea blong Masta 7 taem, Presem Meri 7 taem, mo talemaot Ol Stampa Bilif blong ol Aposol wan taem

Namba 2 Stesen - ANTAP LONG HIL

(a) Man we i mekem trep ya i mas nildaon mo talem Prea blong Masta 7 taem, Presem Meri 7 taem, mo talemaot Ol Stampa Bilif blong ol Aposol wan taem

(b) Man we i mekem trep ya i mas prea from Pop, kolosap long Haos Wosip

(c) Man we i mekem trep ya i mas wokbaot raon long Haos Wosip 15 taem, mo talem Prea blong Masta 15 taem, Presem Meri 15 taem, mo talemaot Ol Stampa Bilif blong ol Aposol wan taem

(d) Man we i mekem trep ya i mas wokbaot raon long Leb Farig [Bed blong Patrik] 7 taem, mo talem Prea blong Masta 7 taem, Presem Meri 7 taem, mo talemaot Ol Stampa Bilif blong ol Aposol wan taem

Namba 3 Stesen - RILIG MUR

Man we i mekem trep ya i mas wokbaot raon long ol wanwan hif blong ston 7 taem, mo talem Prea blong Masta 7 taem, Presem Meri 7 taem, mo talemaot Ol Stampa Bilif blong ol Aposol wan taem long ol hif wanwan [i gat tri hif]. Mo laswan samting, hem i mas raonem fulwan ples blong Rilig Mur 7 taem mo prea.