Ripot Long Wok Blong Kingdom

Kasem Olgeta Smosmol Velej Blong Grinlan We Oli Stap Farawe

LONG plante yia, ol Wetnes blong Jeova oli bin yusum ol magasin Wajtaoa mo Wekap! long wok blong talemaot gud nyus. Ol magasin ya oli leftemap waes blong Jeova we i stap long Tok blong hem, Baebol. Oli stap skelemgud ol samting we oli kamaot long wol we oli laenap wetem ol profet tok blong Baebol. Mo oli soemaot olsem wanem ol stret advaes blong Baebol i save givhan blong winim ol problem blong naoia.​—Jemes 3:17.

Long 1994, ol Wetnes long Grinlan oli mekem wan spesel fasin traehad blong givimaot Wajtaoa mo Wekap! long plante man. Long taem blong yia we i hot, oli mekem plan blong visitim sam long olgeta velej blong Grinlan we oli stap farawe. Wan grup blong man blong talemaot Kingdom, oli ron bitim 4,000 kilomita long bot folem wes saed blong Grinlan, oli go long Kanak (Tul), blong kasem sam long ol velej long not blong wol olgeta. Trep blong olgeta i tekem seven wik. Long is saed blong Grinlan, wan Wetnes wetem woman blong hem, tufala i go kasem velej blong Itokortormit. Hemia fastaem we gud nyus i kavremap ples ya fulwan.

Bifo long taem ya, long manis Epril long sem yia, oli seremaot 7,513 Wajtaoa mo Wekap! long ol man blong Grinlan. Samting ya i minim se, wanwan long ol 127 pablisa blong Kingdom, oli seremaot 59 magasin​—1 magasin long evri 7 man long kantri ya. Long manis we oli mekem samting ya, Wekap! i bin karem sam store we oli tokbaot “Kansa Blong Titi​—Samting We Evri Woman i Fraet Long Hem.” Wan Wetnes, we i seremaot 140 magasin, i givim sam kopi blong Wekap! ya long wan woman we i toktok long televisin. Tu dei biaen, wan nyus program long televisin i tokbaot magasin ya long saed blong kansa blong titi. Woman ya i soemaot sam pej insaed long magasin ya long televisin. Mo hem i tokbaot nambawan fasin we oli yusum blong tanem ol tok long magasin ya i kam long lanwis blong Grinlan. Mo tu, hem i tokbaot ol gudfala advaes we Wekap! i givim blong lukaotgud long helt.

Hem i askem Wetnes ya we i givim magasin ya long hem, blong kam long program blong televisin, blong oli askem sam kwestin long hem. Wetnes ya i ansarem plante kwestin long saed blong ol Wetnes blong Jeova, mo hem i tokbaot bigfala wok blong seremaot ol magasin long manis ya. Mo tu, hem i tokbaot waes blong Baebol we i stap wokgud. Hem i poenemaot se ol stret advaes ya i save halpem yumi blong stanap strong tru long ol defren kaen problem we yumi kasem tede.

Program ya i finis wetem sam kwestin we oli askem long presiden blong Kansa Sosaeti blong Grinlan. Woman ya i talem se hem i neva luk ol gudfala save olsem long saed blong sik ya, long prapa lanwis blong hem. Biaen, hem i askem olgeta man we oli wantem save moa long saed blong kansa blong titi, blong ridim ol haf ya blong Wekap! Hem i talem se i gat wan bigfala risen blong talem tangkyu long ol Wetnes blong Jeova, from gudfala tingting ya we oli gat blong prentem wan magasin olsem.

Ol Wetnes blong Jeova raon long wol oli gohed blong talemaot gud nyus “long olgeta man long wol,” olsem ol Wetnes long Grinlan oli mekem. (Kolosi 1:23; Ol Wok 1:8) Wetem ol buk we oli stanap long Baebol, olsem Wajtaoa mo Wekap!, oli halpem olkaen man blong winim ol problem we oli stap kamaot tede, mo oli givim wan gudfala hop blong fyuja long ol man ya.

[Map long pej 8]

(Lukluk niuspepa)

Kanak (Tul)

Itokortormit

Nuk (Godtåb)