?Hu Bambae i Laekem Blong Ridim Haf Ya?
1. Taem yumi ridim Wajtaoa mo Wekap!, ?yumi mas tingbaot wanem? ?Mo from wanem?
1 Taem oli wokem Wajtaoa mo Wekap!, oli tingbaot se ol man long olgeta ples long wol bambae oli ridim. Taswe ol magasin ya oli tokbaot plante defren samting. Taem yumi ridim wan haf long magasin blong yumi, i gud yumi tingbaot se hu bambae i laekem blong ridim haf ya. Afta yumi mas traehad blong givim magasin long man we yumi tingbaot.
2. ?Wanem sam haf blong magasin we maet samfala oli laekem?
2 ?Olsem wanem? ?Wajtaoa ya i tokbaot wan poen blong Baebol we yu mo wan fren blong yu long wok i bin tokbaot? ?I gat wan haf long saed blong famle we i save givhan long wan famle blong yu? ?Wan fren blong yu i plan blong go long wan kantri we Wekap! i bin tokbaot? ?I gat sam stoa no ofis blong gavman long teritori blong yu we bambae oli laekem sam haf blong magasin ya? Maet olgeta we oli wok long hospital bambae oli laekem blong ridim wan haf we i tokbaot problem long saed blong helt. Maet ol polis bambae oli laekem ol magasin we oli tokbaot fasin blong brekem loa.
3. Talem wan stori we i soemaot se i impoten blong seremaot magasin long olgeta we yumi ting se bambae oli laekem.
3 Sam Gudfala Frut: Long Saot Afrika, wan man mo woman blong hem, tufala i kasem Wekap! blong Oktoba 2011, we i talem se: “Tijim Pikinini Blong Bambae i Gruap Wetem Ol Gudfala Fasin.” Biaen, tufala i ring long 25 skul we oli stap long teritori blong kongregesen blong tufala. Ale, twanti tu long olgeta oli glad blong karem Wekap! ya, mo oli seremaot long ol pikinini. Wan narafala man mo woman blong hem, tufala tu i gat sem tingting. Tufala i seremaot Wekap! ya long ol skul long teritori blong tufala. Ol tija blong wan skul, oli mekem plan blong ridim magasin ya evri wik long klas blong olgeta. Man mo woman ya, tufala i tokbaot stori ya long eria elda. Ale elda ya i pulum tingting blong ol kongregesen long eria blong hem, blong oli prij long ol skul long teritori blong olgeta. !Plante kongregesen long Saot Afrika oli askem long branj ofis blong i sanem sam moa Wekap! ya, ale branj ofis i printim sam moa bakegen!
4. ?From wanem yumi wantem seremaot ol magasin long evri man?
4 Ol magasin blong yumi oli tokbaot mining blong ol samting we oli stap hapen tede, mo oli pulum tingting blong man i go long Baebol mo long Kingdom blong God. Long wol ya, ol magasin blong yumi nomo oli stap talemaot se ‘God i stap sevem’ ol man. I no gat sam narafala magasin we oli mekem olsem. (Aes. 52:7) Taswe yumi wantem tumas blong seremaot ol magasin ya long eni man we yumi mitim olgeta. Wan gudfala rod blong mekem olsem, hemia blong tingbaot se ‘?hu bambae i laekem ridim haf ya?’