Ripot Long Wok Blong Kingdom

Ol Trufala Kristin Oli Mas Kasem Trabol

STAT long taem blong Ebel, plante man blong Jeova oli stanap strong tru long trabol we oli kasem from bilif blong olgeta. (Luk 11:​49-51) !Mo yumi no sapraes long samting ya, from we Baebol i givim woning finis se “olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save ronem olgeta ya, bambae oli save mekem i nogud long olgeta”! (2 Timote 3:12) Tede, long bitim 25 kantri, ol gavman oli putum tabu long wok blong ol Wetnes blong Jeova, mo oli mekem i nogud long olgeta.

Long wan kantri we gavman i blokem wok blong ol Wetnes blong Jeova, mo tu, we ol man blong skul oli mekem nogud long olgeta, i gat bitim 12,000 man blong talemaot gud nyus we oli gohed blong wok strong, mo oli mekem Baebol stadi wetem bitim 15,000 man. I tru se oli mas lukaotgud taem oli stap mekem wok blong prij. Plante taem, oli mekem ol Kristin miting blong olgeta long haos blong ol man nomo, mo oli lukaotgud taem oli singaotem ol man we oli intres, blong kam long ol miting ya.

I no longtaem, gavman i lego strong fasin blong hem agensem ol Wetnes. Naoia, oli save mekem wok blong olgeta, we i no gat tumas man i mekem trabol long olgeta. Be, plante jyos oli bin yusum paoa blong olgeta blong pulum ol man blong mekem trabol.

Long wan taon, wan bigfala hif blong kolosap 200 man blong skul, oli kros tumas. Oli wokbaot i go long haos we kolosap 50 Wetnes blong Jeova oli stap mekem miting blong olgeta long hem. Sam long ol man long hif ya, oli karem ol ston, mo oli stap talem sam tok blong skul wetem bigfala voes. I klia se oli wantem kilim ol Wetnes mo spolem haos ya. Ating ol lida blong jyos oli stap lukluk ol miting longtaem finis, mo oli bin wet long wan taem we i stret blong kam mekem trabol. Taem bigfala hif blong man ya kolosap oli kam insaed long haos, 15 polis oli kam, mo oli tok strong long hif blong man ya blong oli aot long ples ya. Samting ya i mekem ol Wetnes oli sapraes, from we i no gat wan long olgeta we i gat taem blong singaotem ol polis oli kam.

Be, long sam narafala taem, ol man blong agens oli bin win long fasin agens blong olgeta. Oli bin karem samfala Wetnes long kot mo putum olgeta long kalabus. Wan Wetnes i bin wet blong plante yia blong pas long kot, mo ating ol loea oli no moa intres blong stretem samting ya. Be, from we ol man blong jyos oli pulum olgeta, ale oli pasem Wetnes ya long kot mo oli putum hem long kalabus.

Long wan narafala ples, wan grup blong ol Wetnes i joen tugeta long wan haos blong mekem Lafet blong Lodsapa. Biaen, long sem naet, sam polis oli kam, mo oli holem man blong haos mo elda we i lidim miting ya. Long polis stesen, oli kilim nogud tufala ya. Biaen, oli holem tufala plante haoa blong askem ol kwestin mo mekem ol raf fasin long tufala. Mo tu, oli sakem wan Wetnes i godaon long wan wel we wora blong hem i kolkol, be hem i stanap strong tru long trabol ya we i mekem hem i harem nogud tumas.

?From wanem ol polis oli mekem raf fasin olsem? Bakegen, wan grup blong ol man blong jyos, we ol lida blong jyos oli sapotem olgeta, oli pusum ol polis blong mekem fasin ya. Biaen, jif blong polis i talem se hem i no givim oda long ol polis blong holem ol brata ya. Hem i talem sore long olgeta, mo hem i panisim ol man ya we oli kilim ol brata.

Long olgeta ples blong wol, ol Wetnes blong Jeova oli gohed blong talemaot gud nyus blong Kingdom blong God, nating se ol man oli agensem olgeta strong. Oli folem advaes blong Jisas se: “Yufala i luk. Mi mi sanem yufala i go, olsem we mi sanem ol sipsip oli go long ol wael dog. Yufala i mas waes long ol trik, olsem snek. Mo yufala i mas kwaet man, olsem sotleg.”​—Matyu 10:16.

[Tok blong pija long pej 31]

Ebel i faswan man we narafala i agensem hem mo kilim hem