‘!O, Sipos Evri Man i Olsem Olgeta Nomo!’

Hemia tok blong wan man we i raetem ol store long nyuspepa blong Laksembog, nem blong hem, Letzebuerger Journal. ?Man ya i stap tokbaot hu?

Hem i bin go long Polan blong joen long wan lafet blong makem 50 yia we ol man oli kam fri long rabis kalabus blong Aoswij. Mo hem i makem se, i gat wan grup blong man we i safa bigwan long ples ya, be oli no tokbaot olgeta ya. Long haf we hem i raetem long nyuspepa long Febuwari 2, 1995, hem i talem nem blong grup ya, hemia ol Wetnes blong Jeova. Hem i raetem se: “Taem oli putum olgeta long ol rabis kalabus mo presin mo mekem fasin we i strong tumas long olgeta, mo givim ol strong woning se bambae oli putum olgeta long wan haos we oli no gat kakae gogo oli ded, mo bambae oli katemaot hed blong olgeta, hemia i no naf blong mekem ol Wetnes ya oli lego bilif blong olgeta.” Hem i gohed se: “Ol raf SS polis tu, oli sapraes we ol Wetnes Jeova oli no fraet taem oli fesem ded.”

Ol Wetnes blong Jeova oli no wantem ded. Be, olsem ol Kristin long faswan handred yia, plante taosen blong olgeta oli jusum ded bitim we oli brekem ol Kristin loa. Bilif olsem i makemaot olgeta se oli defren long ol narafala man long hadtaem ya blong rul blong ol Nasi.

Man ya i finisim store blong hem i se: “!O, sipos evri man i olsem ol Wetnes blong Jeova nomo!” Yes, sipos evri man i olsem olgeta ya, bambae Seken Bigfala Faet Blong Wol i no save kamaot.