Ol Pijin Mo Flaoa Oli Save Lanem Yumi Long Wan Samting
?WANEM samting we tede, ol man oli wari long hem moa bitim ol narafala samting? Bighaf blong ol man, oli tingbaot moa blong kasem naf mane blong pem ol samting blong famle blong olgeta, no blong mekem laef blong olgeta i kam moagud.
Taem Jisas i stap long wol tu, ol man oli tingting plante blong kasem ol samting long saed blong laef. Be Jisas i givim woning se samting ya we i stret blong oli tingbaot, i save kam wan bigfala wari mo i save blokem ol samting long saed blong speret. Blong eksplenem poen blong hem, Jisas i talem long ol disaepol blong hem blong luklukgud long ol pijin mo ol flaoa.
Ol pijin oli nidim kakae evri dei. Sipos yumi skelem wetem kakae we yumi ol man i nidim, ol pijin ya oli nidim moa kakae, from we bodi blong olgeta i tantanem mo yusum ol kakae kwik tumas. Mo tu, oli no save planem garen, oli no go karem kakae i kam, mo oli no putumgud kakae i stap long haos blong yusum long fyuja. Be olsem Jisas i talem, “Papa blong [yumi] long heven i stap givim kakae long olgeta.” (Matyu 6:26) Sem mak, God i stap flasemgud “ol flaoa ya we oli stap gru olbaot,” olsem we i givim naesfala klos long olgeta.—Matyu 6:28-30.
Jisas i promes long yumi se, sipos yumi gat stret tingting long ol samting long saed blong bodi, mo putum ol samting long saed blong speret long fasples, bambae God i mekem sua se yumi gat ol kakae mo klos we yumi nidim. Sipos Jeova God i stap lukaotgud long ol pijin mo flaoa, i sua se bambae hem i lukaotgud long olgeta we oli laekem hem, mo we oli ‘lukaot Kingdom mo stret fasin fastaem.’ (Matyu 6:33) ?Yu yu stap putum ol samting long saed blong Kingdom blong God long fasples long laef blong yu?