?Wan Kastom Blong Jyos We i No Gat Mining?

PLANTE handred yia finis, ol Katolik oli stap mekem fasin blong talemaot ol sin blong olgeta long pris. Be, plante man oli luk fasin ya olsem wan samting we i no gat mining. Taem Bob, wan tija blong hae skul, i tingtingbak long yangtaem blong hem, hem i talem se: “Nating se mi gat samwe bitwin 13 mo 19 yia, be mi no tinghevi long fasin ya.” ?From wanem? Long tingting blong hem, fasin ya blong talemaot ol sin long pris i olsem wan kastom blong jyos we i no gat mining. Hem i eksplenem se: “Fasin ya blong talemaot ol sin blong yu long pris i olsem we yu tekem olgeta basket blong yu we oli fulap long sin, yu go soem olgeta long man we i wok long kastom long epot. Ale, hem i askem sam kwestin long yu long saed blong ol sin blong yu. Nao biaen, hem i letem yu gotru, afta we yu pem takis blong ol naesfala samting we yu karem long trep blong yu.”

I sem mak, Frank Wessling, we i raetem wan haf long U.S. Catholic, i tokbaot fasin ya blong talemaot ol sin long pris, olsem “wan isi rod blong lidim man, we i gat ol wanwan step long hem, stat long fasin blong fogetem ol sin we man ya i stap mekem, tru long ol prea blong tanem tingting we hem i talem baehat, go go fasin blong mekem wan smol kastom blong jyos olsem wan panis blong ol sin ya blong hem.” ?Wanem tingting blong Wessling long fasin ya? Hem i talem se: “Mi mi bilif se fasin ya blong talemaot ol sin i mekem i gud long sol blong man. Be fasin blong ol Katolik blong mekem, hem i wan problem.”

Baebol i talem ol narafala tok long saed blong fasin blong talemaot ol sin. Samting we i impoten moa, i blong talemaot ol sin long God. (Ol Sam 32:1-5) Mo Kristin disaepol Jemes i raetem se: “?I gat wan long yufala we i sik? I gud hem i singaot ol elda blong [kongregesen] blong oli kam luk hem. Nao ol elda ya oli save prea long hem, mo oli save kafsaedem oel i go long hem long nem blong Masta blong yumi. From samting ya, i gud yufala i stap taltalemaot ol sin blong yufala long yufala, mo i gud yufala i stap prea long yufala, blong bambae God i mekem yufala i gud bakegen.”​—Jemes 5:​14, 16.

Wan Kristin we i harem nogud from wan sin we hem i mekem, i save singaot ol elda blong kongregesen. Nao oli save givim ol advaes blong Baebol we i stret long problem blong hem mo we i wokgud, blong halpem hem ya we i mekem sin, blong lego nogud rod we hem i stap folem. Ol elda ya oli save talem ol gudfala tok blong leftemap tingting blong hem, taem oli luk se man ya we i sik long saed blong speret i stap kamgud moa. !Samting ya i defren olgeta long kastom blong talemaot ol sin long pris we plante skul tede oli stap mekem! Taem ol elda oli givhan long olgeta we oli tanem tingting blong olgeta from sin we oli mekem, blong oli kam strong bakegen, nao oli save haremgud olsem Deved. Hem i talem long Sam blong hem se: “Mi talem se ‘Bambae mi talemaot sin blong mi long Hae God.’ Nao mi talemaot ol sin blong mi long yu, mi no moa haedem ol samting nogud we mi mi mekem. Nao yu yu fogivim mi from olgeta sin blong mi.”​—Ol Sam 32:5.