?Yu Yu Rimemba?

?Yu yu bin tingting dip long ol haf blong Wajtaoa we oli kamaot i no longtaem? Maet bambae yu intres blong rimemba sam long ol poen ya:

◻ ?Olsem wanem wan man i save ‘kam long Jisas’ olsem tok blong hem blong singaotem ol man long Matyu 11:28 i talem?

Jisas i talem se: “Man we i wantem kam biaen long mi i mas blokem ol samting we hem nomo i wantem, nao i mas karem [pos] blong hem, i mas biaen long mi.” (Matyu 16:24) Taswe, blong kam long Jisas i minim se yumi lego ol samting we yumi nomo i wantem mo mekem wil blong God mo Kraes. Yumi rere blong wok, mo blong gohed long ol wok ya.​—8/15, pej 17.

◻ ?From wanem “smol man nomo” oli faenem ‘smol get ya we i go kasem laef,’ we Jisas i tokbaot long Matyu 7:​13, 14?

Man we i stap wokbaot long smol rod ya i mas folem ol loa mo rul blong God we oli blokem hem long plante samting. Taswe, man ya i mas rili wantem mekem laef blong hem i laenap wetem ol loa blong God. Nating se i luk olsem we ‘smol rod’ ya i had, be hem i mekem wan man i fri long plante bigfala samting. Ol rul we oli putum tabu long sam samting, oli kamaot long ‘loa ya we i stret olgeta, mo hem i save mekem man i fri.’ (Jemes 1:25)​—9/1, pej 5.

◻ ?Olsem wanem yumi save kasem moa fasin luksave?

Fasin luksave i no save kam isi, olsem nomo. Be wetem longfala tingting, prea, fasin traehad, ol gudfala fren, stadi long Baebol, tingting dip long hem, mo fasin blong dipen long tabu speret blong Jeova, yu tu yu save gat fasin luksave.​—9/1, pej 21.

◻ ?Olsem wanem fasin jelas i save pusum man blong mekem gudfala samting?

Hem i save pusum wan man blong lukaotgud long wan narafala we hem i laekem tumas, blong bambae hem i no kasem trabol. Mo tu, ol man oli save soemaot fasin jelas we i stret, taem oli stanap strong long saed blong Jeova mo wosip blong hem. (1 King 19:10)​—9/15, pej 8, 9.

◻ ?Wanem mining blong tok ya we i stap long Jenesis 50:23 long saed blong ol smol bubu blong Josef se: “Hem i luk olgeta se oli stret pikinini blong hem nomo”?

Samting ya i save minim nomo se Josef i luksave ol pikinini ya olsem we oli laen blong hem. Be hem i save minim tu se hem i bin pleplei wetem olgeta, mo holem olgeta long fasin we i laekem olgeta tumas. I gud we ol papa tede oli soemaot sem filing long ol pikinini blong olgeta.​—9/15, pej 20, 21.

◻ ?Wanem samting i impoten tumas blong mekem mared mo famle laef i wokgud?

Blong kasem ol gudfala frut olsem, man mo woman we tufala i mared, tufala i mas putum wok blong God fasples long laef blong tufala. Taem tufala i mekem olsem, bambae tufala i traem blong stap tugeta mo folem ol advaes long Tok blong God blong stretem ol problem blong tufala. Olsem nao, tufala i blokem plante nogud samting we oli save kamaot taem tufala i no traem mekem ol samting we God i wantem. Ol nogud samting ya oli save mekem tufala i harem nogud tumas long hat blong tufala. (Ol Sam 19:​7-11)​—10/1, pej 11.

◻ ?Tingting ya blong hareap blong mekem wok blong God, i impoten olsem wanem tede?

Yumi nidim tingting ya blong hareap, blong yumi save mekem wok blong Jeova wetem olgeta laef blong yumi. Tingting olsem i save givhan blong agensem mo winim olgeta traem we Setan i stap mekem long ol man blong God, blong traem pulum olgeta blong kam ‘taed, mo lego fasin ya blong bilif.’ (Hibrus 12:3) Tingting ya i protektem olgeta blong no joen tumas long wol mo long fasin blong hem blong ronem ol sas samting, we i save kasem olgeta sloslou. Hem i mekem tingting blong olgeta i stap strong long “laef ya we i prapa wan.” (1 Timote 6:19)​—10/1, pej 28.

◻ ?Long parabol blong ol sipsip mo ol nani, wetaem nao Jisas i sidaon long jea blong king, mo from wanem? (Matyu 25:​31-33)

Parabol i no soem se hem i sidaon blong kam King. Be, hem i sidaon olsem wan Jaj. Taem blong hem blong jajem ol man bambae i no gohed blong plante yia. Defren nao, parabol ya i stap tokbaot wan smoltaem long fyuja, we Jisas bambae i talemaot jajmen mo i mekem jajmen i kamtru long olgeta nesen.​—10/15, pej 22, 23.

◻ ?Hu ya “ol man blong naoia (generation)” we Jisas i tokbaot plante taem?

Jisas i yusum tok ya “ol man we oli stap laef naoia” blong tokbaot ol man we oli laef long taem blong hem, wetem ol ‘lida blong olgeta we oli blaen nomo.’ Olgeta evriwan ya oli nesen blong ol man Jyu. (Matyu 11:16; 15:14; 24:34)​—11/1, pej 14.

◻ ?Long bigfala mining blong profet tok blong Jisas long Matyu 24:​34-39, tok ya “ol man blong naoia” i stap tokbaot hu?

I luk olsem we Jisas i stap tokbaot ol man long wol ya we oli luk saen blong Kraes we i stap finis, be oli no wantem stretem rod blong olgeta.​—11/1, pej 19, 31.

◻ ?Olsem wanem fasin ya blong gat ol taon olsem ples blong haed mo ol rul we oli joen wetem olgeta oli givhan long ol man long Isrel bifo?

I makemgud long ol man Isrel se oli no mas pleplei, no ting nating, long laef blong man. Mo tu, samting ya i pusum olgeta blong soem sore long narafala, taem i stret blong mekem olsem. (Jemes 2:13)​—11/15, pej 14.

◻ ?Wanem mining blong taon ya we i olsem ples blong haed?

Taon ya i minim rod we God i yusum blong sevem yumi, blong yumi no ded from we yumi bin brekem loa blong hem long saed blong blad we i tabu. (Jenesis 9:6)​—11/15, pej 17.

◻ ?Olsem wanem kampani blong ol Kristin brata mo sista blong yumi raonabaot long wol, i save halpem yumi blong “kasem paoa bakegen”? (Aesea 40:31)

I gat sam brata mo sista blong yumi we oli stap fesem ol semkaen wari mo hadtaem olsem yumi stap fesem. Olgeta tu, oli kasem sem filing olsem yumi. (1 Pita 5:9) I leftemap tingting blong yumi, mo i mekem bilif blong yumi i strong, taem yumi luksave se ol traem we yumi kasem, oli no kasem yumi nomo, mo se plante narafala man oli gat sem filing olsem yumi.​—12/1, pej 15, 16.