Talemaot Trutok Blong Baebol Long Potugal

STAT long Kamina long not, go kasem Vila Real de Santo António long saot, plante taosen smosmol bot blong hukum fis, we oli gat ol defren kala, oli kavremap 800 kilomita blong solwora blong Atlantik kolosap long Potugal. Long ples ya, ol man blong huk oli ‘stap go olbaot long solwora long sip blong olgeta’ blong plante handred yia finis. Taswe, fis i wan stampa kakae blong ol man Potugal.​—Ol Sam 107:23.

Long ol 70 yia we oli pas, wan narafala fasin blong hukum fis i stap gohed long Potugal. Ol Wetnes blong Jeova oli bisi oltaem blong karem gud nyus i go long plante taosen man, we oli olsem fis. (Matyu 4:19) Long Mei 1995, oli kasem nyufala namba blong 44,650 man blong talemaot Kingdom​—hemia 1 Wetnes long evri 210 man long kantri ya. Long samfala taon, namba blong ol Wetnes i bigwan moa.

From we i gat plante man blong talemaot gud nyus, oli stap wok long semfala teritori evri wik long plante ples. Taswe, ol Wetnes long Potugal oli lanem ol defren fastok we oli save yusum blong serem hop blong Baebol wetem ol man. Yes, oli luksave se wok blong talemaot trutok blong Baebol i impoten tumas. From samting ya, oli yusum olgeta rod we oli save faenem.​—1 Korin 9:​20-23.

Halpem Olgeta We Oli Gat Skul Finis

Wan sensas blong 1991 i soem se 70 pesen blong ol man long Potugal we oli gat 18 yia no antap, oli talem se oli Katolik. Nating se i olsem, ol man ya oli no gat plante save long saed blong Baebol. Nyuspepa ya Jornal de Notícias, i talem se: “Hemia wan long ol bigfala trabol blong skul Katolik: !Hem i no gat save long saed blong Baebol!” ?From wanem i olsem? Wan nyuspepa blong Potugal, nem blong hem Expresso, i givim ansa. Hem i tokbaot wan miting blong 500 pris long Fátima, i se: “Bisop i talem se ol pris oli mas lego plante narafala wok we oli stap mekem we i no joen wetem jyos, blong bambae oli save kam ol ‘man blong talemaot gud nyus’ bakegen. . . . Sipos wan pris i mekem wok blong talemaot Gospel wetem olgeta hat blong hem, hem i no gat taem blong mekem ol narafala wok ya.”

Defren olgeta, ol Wetnes blong Jeova long Potugal oli bisi blong seremaot ol trutok blong Baebol long evri jans we oli kasem. From samting ya, plante man Katolik oli stat kasem save long Baebol.

Bifo, Carlota i strong blong folem skul Katolik, mo hem i memba blong wan grup blong yangfala long jyos ya. Mo tu, hem i wan tija long skul blong ol pikinini we António, wan Wetnes, i stap wok long hem. António i wan fultaem paenia, no wan man blong talemaot gud nyus fultaem. Long taem blong kakae long medel dei, hem i tokbaot Baebol long ol man we oli stap wok wetem hem. Wan dei, Carlota i askem kwestin long hem long saed blong bilif blong helfaea mo wosip long Meri. António i soem tijing blong Baebol long saed ya, mo biaen, tufala i storeyan plante taem bakegen long Baebol. Fastaem we Carlota i kam long miting long Haos Kingdom, hem i sapraes bigwan. Be, ol miting ya oli stap long semtaem olsem ol miting long jyos blong hem. Hem i luksave se hem i mas mekem wan disisen. ?Bambae hem i mekem wanem?

Carlota i mekem miting wetem olgeta yangfala long grup ya blong jyos, mo hem i yusum Baebol blong eksplenem from wanem hem i no moa wantem joen wetem olgeta. Ol yangfala ya oli jikim hem from disisen we hem i mekem. Wan yangfala gel nomo, we nem blong hem Stela, i lesingud long hem. Biaen, tufala i storeyan, nao Stela i askem plante kwestin long Carlotta long saed blong stampa blong laef mo mining blong hem. Carlota i givim wan buk long hem, Life​—How Did It Get Here? By Evolution or by Creation?a mo i statem wan Baebol stadi wetem hem.

Carlota i gohed gud long saed blong speret. Hem i baptaes long Jun 1991, mo i statem wok blong fultaem paenia sikis manis biaen. Long Mei 1992, hem i mared wetem António, mo tufala i gohed long wok blong paenia long wan kongregesenb kolosap, we i nidim moa man blong talemaot gud nyus. ?Mo olsem wanem long Stela? Hem i baptaes long Mei 1993, mo naoia hem i wan fultaem paenia.

Yangfala Francisco i rili strong long saed blong jyos blong hem. Evri Sande moning, hem i go long Lames, mo long aftenun, hem i go lanem ol prea. Hem i mekem wok blong lukaot long ol tabu samting blong jyos, mo i givhan long pris long taem blong Lames. !Mo tu, hem i prea long God blong i mekem hem i kam wan “tabu man” wan dei!

Francisco i wantem tumas blong gat wan Baebol, mo wan dei wan fren i givim wan Baebol long hem. Hem i sapraes blong faenem se God i gat wan nem, Jeova. (Eksodas 6:3; Ol Sam 83:18) !Taem hem i ridim long Eksodas 20:​4, 5 se God i agensem fasin blong yusum ol aedol blong wosip, hem i sapraes moa! Hem i luksave se jyos blong hem i fulap long ol aedol, ale, hem i prea strong long God blong i mekem ol samting ya i kam klia from we tingting blong hem i fasfas. Sam dei biaen, hem i mitim wan fren we i skul wetem hem bifo, nao hem i askem long fren ya from wanem hem i lego ol klas we skul i mekem long naet.

Fren ya i ansa se: “Naoia, mi mi stap go long wan narafala skul long naet, we i moa gud.”

Francisco i askem se: “?Wanem skul ya, mo yu stadi long wanem?” Hem i sek long ansa we fren blong hem i givim.

Fren ya i talem long hem se: “Mi mi stap stadi Baebol long Haos Kingdom blong ol Wetnes blong Jeova. ?Yu yu wantem kam tu?”

Francisco i no save bilivim ol samting we hem i luk long faswan miting blong hem​—ol man oli hapi, oli smael; oli storeyan tugeta long kaen fasin mo oli frengud; ol pikinini oli sidaon wetem papa mama blong olgeta mo oli lesingud long ol tok we i kamaot long miting.

Francisco i talem se: “!Mi stap long ples ya we mi no save wan man nating, be mi harem olsem se mi wan famle blong olgeta nomo!” Stat long taem ya, hem i kam oltaem long ol miting. Naoia, Francisco i wok olsem wan elda long kongregesen. Wetem waef mo tufala pikinini blong hem, hem i glad tumas long ol gudfala promes blong Kingdom we Tok blong God i talem.

Serem Trutok Wetem Famle

Manuela, wan fultaem paenia long taon blong Lisbon, i kasem plante fis long saed blong speret, from we hem i gohed blong prij long kaen fasin long olgeta man, mo long ol famle blong hem tu. Wan stret brata blong hem, José Eduardo, i bin tren long karate mo blong yusum masket mo naef blong faet. Hem i brekem loa plante taem tumas, mekem se hem i mas pas long kot from 22 trabol we hem i bin mekem. Kot i givim panis blong 20 yia long kalabus. Hem i raf tumas, mo ol narafala man long kalabus oli fraet long hem. Ale, oli putum hem i stap hem wan long wan rum blong kalabus we oli blokemgud.

Wetem longfala tingting, Manuela i gohed blong visitim José Eduardo long seven yia. Be oltaem, hem i no wantem harem mesej blong Baebol we Manuela i talem. Ale, taem buk ya Life​—How Did It Get Here? By Evolution or by Creation? i kamaot, hem i karem, mo hem i stat blong stadi Baebol. Wantaem nomo, hem i mekem plante bigfala jenis long fasin blong hem. Afta wan wik, hem i prij long 200 presina, mo long nekis wik blong hem, hem i prij long 600 narafala presina bakegen. Mo tu, oli givim raet long hem blong visitim ol presina we oli stap long ol narafala haf blong kalabus ya. From we hem i mekem bigfala jenis long fasin blong hem, oli katem namba blong ol yia we hem i mas stap long kalabus i godaon long 15 yia. Afta long 10 yia, oli letem hem i gofri, mo oli stap jekemap hem blong luk sipos i gohed gud. Naoia faef yia i pas finis, mo José Eduardo i baptaes finis olsem wan Wetnes blong Jeova. Hem i wan man blong givhan long kongregesen blong hem. !Tru tumas, i olsem we ‘wael dog i kam stap wetem smol sipsip’!​—Aesea 11:6.

From we Manuela i gohed blong givim wetnes long famle blong hem, hem i glad tumas blong halpem hasban blong hem mo fo narafala memba blong famle blong hem, blong oli mekem wok blong Jeova. Naoia man blong hem i wan man blong givhan.

“Bambae Mi Kikim Mo Ronemaot Olgeta Wetem Wan Wip”

Maria do Carmo i stap long Lisbon taem ol Wetnes oli visitim hem. Hem i laekem samting we oli talem long hem mo hem i askem man blong hem, António, sipos hem i save stadi Baebol wetem olgeta long haos. Hem i ansa se: “!No gat! !Yu no moa tingbaot samting ya! Sipos mi faenem ol Wetnes blong Jeova long haos ya, bambae mi kikim mo ronemaot olgeta wetem wan wip.” António i wan tija blong karate mo hem i jampion long spot ya. Taswe, Maria do Carmo i mekem disisen blong stadi Baebol long wan narafala ples.

Biaen, António i mas go long Engglan blong eit dei blong mekem wan kos long karate. Nao Maria do Carmo i putum buk ya My Book of Bible Stories long basket blong man blong hem.c From we António i gat plante taem long trep blong hem, hem i ridim buk ya. Taem hem i stap kambak long plen, wan bigfala win i seksekem plen ya, mo i hadwok blong mekem plen i sidaon gud long graon. Hemia fastaem long laef blong António we i prea long Jeova.

Taem António i kambak long haos, Wetnes we i stap mekem stadi long woman blong hem, i askem hem blong kam long wan miting. Hem i agri blong go. Hem i luk se olgeta man long miting oli soem fasin fren long hem. Ale, oli mekem plan blong stadi Baebol wetem António. Smoltaem biaen, hem i luksave se hem i mas mekem sam disisen. Hem i finis long wok blong tijim karate, mo hem i stat blong tijim ol studen blong hem olsem wanem blong gat pis wetem ol man naoia mo blong olwe. Wan long ol studen ya, we hem tu i gat gudhan long karate, i tekem baptaes finis olsem wan trufala Kristin.

António i baptaes long Epril 1991. Long nekis dei afta we hem i baptaes, hem i joen long wok blong haftaem paenia. Sikis manis biaen, hem i statem wok blong fultaem paenia, mo smoltaem biaen, hem i stap mekem 12 Baebol stadi. Long Julae 1993, hem i kam wan man blong givhan long kongregesen.

Long Ol Teritori We Oli Wokem Plante Taem

Long plante ples long kantri ya, oli wokem semfala teritori evri wik. ?Olsem wanem ol Wetnes oli save kasem plante “fis” long ples olsem?

João i traem blong storeyan wetem olgeta man long evri haos. Taem hem i stap toktok wetem wan woman, hem i askem sipos i gat sam narafala man we oli stap long haos blong hem. Woman ya i ansa se man blong hem mo tufala pikinini boe blong hem oli stap wetem hem. Be hem i talem se i no isi blong faenem olgeta from we oli wok mo oli kambak long haos long naet nomo. Ale, João i gohed long wok blong prij mo i visitim ol narafala man raonabaot. Kolosap wan haoa haf biaen, wan man i kam luk hem.

Man ya i talem long João se: “Yu wantem storeyan wetem mi. Plis talem long mi wanem samting yu wantem.”

João i sapraes nao i ansa se: “Sore, be mi no save yu. ?Yu yu hu?”

“Mi mi António, haos blong mi i stap antap ya. Yu bin talem long mama blong mi se yu wantem storeyan wetem ol narafala long famle, taswe mi kam faenem yu blong save wanem yu wantem talem.”

João i givim gudfala wetnes long António mo i statem wan Baebol stadi wetem hem. Afta long namba tu taem we António i stadi, hem i askem sipos tufala i save stadi tu taem long wan wik. Afta fo manis nomo, hem i joen wetem João long wok blong talemaot gud nyus, long ol man we oli stap kolosap long haos blong hem. Tri manis biaen, hem i tekem baptaes. I no longtaem i pas, mama blong hem i stat blong stadi Baebol tu. !Yes, i impoten tumas we long wok blong prij yumi traem toktok wetem olgeta man long wan haos!

Ol gudfala store olsem oli soem se i gat plante wok yet blong mekem, blong hukum ol fis long saed blong speret long solwora blong Potugal. Jeova i blesem hadwok blong ol Wetnes long ples ya. Oli gat plante taosen Baebol stadi we oli gohed gud. Oli stap gohed blong traem faenem sam moa rod blong talemaot trutok blong Baebol long olgeta man long Potugal. Olsem nao, ol tok blong aposol Pol we i go long ol Kristin long Filipae i stap kamtru, se: “Long evri rod . . . oli stap talemaot Kraes.”​—Filipae 1:18, NW.

[Ol futnot]

[Map Blong Pija Long Pej 23]

(Lukluk niuspepa)

SPEN

POTUGAL

[Tok Blong Pija Long Pej 24, 25]

Ol Wetnes long Potugal oli tekem evri jans blong talemaot trutok blong Baebol