Ripot Long Wok Blong Kingdom

Ol Man We Bifo Oli Enemi, Oli Joen Tugeta Blong Mekem Wok Blong Jeova

BRANKO i eksplenem se: “Fastaem we mi mi harem tok long saed blong ol Wetnes blong Jeova, mi stap wok olsem wan gad we i karem masket, long kantri blong Bosnia.”a

Branko i stap wok olsem gad long wan hospital, we ol man we oli kasem kil long faet oli stap slip long hem. Wan long ol dokta long ples ya i stap stadi Baebol wetem ol Wetnes. Ale, long wan naet we hem i stap wok, hem i eksplenem long Branko plante samting we hem i stap lanem long saed blong Baebol.

Ol samting we Branko i harem long naet ya i gat bigfala paoa long hem, mekem se hem i no moa karem masket. Hem i traem faenem ol Wetnes, hem i wantem lanem moa. Samtaem biaen, Branko i muf i go long wan narafala kantri long Yurop. Long ples ya, hem i faenem wan Haos Kingdom, mo i joen long wan miting blong ol Wetnes blong Jeova we oli ol man Yugoslavia. Long ples ya nao, Branko i mitim Slobodan.

Slobodan i blong Bosnia tu, mo hem i bin joen long semfala faet olsem Branko​—be long narafala saed we i agensem saed blong Branko. Slobodan i bin faet long saed blong ol Seb agensem ol Kroat. Taem tufala i mitim tufala, Slobodan i baptaes finis olsem wan Wetnes blong Jeova. Hem i wantem mekem wan Baebol stadi wetem Branko, we i enemi blong hem bifo. Taem stadi i gohed, Branko i lanem moa long saed blong Jeova, mo hem i laekem God moa. Samting ya i pusum Branko blong givim laef blong hem long Man ya we i Wokem olgeta samting. Long Oktoba 1993, hem i baptaes blong soemaot se hem i givim laef blong hem long God.

?Olsem wanem Slobodan i kam wan Wetnes blong Jeova? Hem i lego ples blong faet long Bosnia sam taem bifo. Hem i bin ridim sam buk blong ol Wetnes. Ol Wetnes oli kam long haos blong hem long stat blong 1992. Long taem ya nao, intres blong hem long Tok blong God i gru. ?Hu i kam long haos blong Slobodan, blong mekem wan stadi blong Baebol wetem hem? Hem i Mujo, we i blong Bosnia tu, be hem i gruap long skul Muslim. Taem Baebol stadi i gohed, Mujo mo Slobodan, we bifo oli enemi, oli spenem taem tugeta evri dei blong mekem bilif blong tufala i strong moa.

Faet long ples we hem i Yugoslavia bifo, i kilim i ded plante handred taosen man. Be naoia, Branko, Slobodan, mo Mujo oli wok fultaem blong talemaot gud nyus. Trifala evriwan i stap long semfala kongregesenb blong ol Wetnes blong Jeova. Oli no moa faet agensem ol man blong narafala laen no kala. Naoia oli lukaot pis mo obei long Man ya we i Wokem olgeta, Jeova.

Be, ?wanem samting i jenisim olgeta olsemia? Hemia lav we oli gat long Jeova, respek long Baebol, mo tingting blong wantem mekem ol trutok blong Baebol oli wok long laef blong olgeta. Olsem Tabu Baebol i talem, ‘tok blong God i wan samting we i laef, mo we i stap wok . . . mo i save jajem olgeta tingting blong man, mo ol samting we man i wantem long hat blong hem.’​—Hibrus 4:​12.

[Ol futnot]