Kingdom Nyus Namba 35
?I Save Gat Wan Taem We Olgeta Man Bambae Oli Laeklaekem Olgeta?
Ol Man Oli No Moa Laekem Ol Narafala Man Raonabaot Long Olgeta
TINGTING blong plante milyan man i slak mo oli harem nogud, be oli no gat wan fren we oli save askem hem blong givhan long olgeta. Wan bisnes woman we hem i ritae finis i talem se: ‘Wan naet, wan wido we i stap long semfala stori haos wetem mi, i kilkilim doa blong mi mo i talem se hem i wantem storeyan wetem mi from we hem i harem se i no gat wan fren. Mi talem stret long hem long kaen fasin se mi mi bisi. Hem i talem sore from we hem i mekem trabol long mi, nao i aot.’
Sore tumas, long semfala naet ya nomo, wido ya i kilim hem wan i ded. Biaen, bisnes woman ya i talem se hem i lanem “wan bigfala lesen long rod we i strong tumas.”
Plante taem, bigfala trabol olsemia i stap kamaot from we ol man oli no moa laekem ol man raonabaot long olgeta. Long ol faet bitwin ol defren laen blong man long Bosnia mo Hersegovina, we bifo hem i haf blong Yugoslavia, bitim wan milyan man oli mas ronwe long haos blong olgeta, mo plante taosen oli ded. ?Hu i kilim olgeta oli ded? Wan gel we i mas ronwe long velej blong hem i ansa long kwestin ya, taem hem i krae se: “Ol man we oli stap raonabaot long mifala nomo. Mifala i savegud olgeta.”
Plante handred taosen man oli ded long Ruwanda, mo fulap long olgeta oli ded from ol man raonabaot long olgeta nomo oli kilim olgeta. The New York Times i talem se: “Bifo, ol Hutu mo Tutsi oli [stap] wanples, mo ol man mo woman long tufala laen ya oli mared tugeta. Oli no bin wari, mo oli no bin save tu, hu ya i Hutu mo hu ya i Tutsi. Be wantaem nomo, ol samting ya oli jenis,” mo “oli stat kilkilim olgeta i ded.”
Long sem fasin, plante man Jyu mo Arab we oli stap long sem velej nomo long Isrel, oli no laeklaekem olgeta nating. Samting ya i sem mak long saed blong ol Katolik mo Protestan long Aerlan, mo long fulap man long ol narafala kantri tu. Naoia, fasin blong no laekem narafala man i bigwan moa i bitim olgeta narafala taem bifo.
?From Wanem Ol Man Oli No Moa Laekem Ol Man Raonabaot Long Olgeta?
Man we i Wokem yumi i ansa long kwestin ya. Tok blong hem, Baebol, i kolem taem ya we yumi stap long hem naoia, se ‘ol las dei.’ Profet tok blong Baebol i talem se long taem ya, bambae ol man oli ‘no gat sore.’ Long saed blong ‘taem ya we laef i strong tumas,’ we Baebol i kolem tu se ‘taem we wol bambae i finis,’ Jisas Kraes i talem se ‘bighaf blong ol man bambae oli no moa laekem narafala.’—2 Timote 3:1-5; Matyu 24:3, 12.
Taswe, fasin blong naoia we ol man oli no moa laeklaekem olgeta, i wan pruf se yumi stap long ol las dei blong wol ya. Yumi glad we samting ya i soem tu se, i no longtaem, ol man we oli no obei long God bambae oli lus, mo bambae i gat wan nyufala wol we i fulap long stret fasin mo lav.—Matyu 24:3-14; 2 Pita 2:5; 3:7, 13.
Be, ?i gat risen blong bilif se wan jenis olsem i rili save kamaot? ?I sua se ol man oli save lanem blong laeklaekem olgeta mo stap tugeta long pis?
LAEKEM OL MAN RAONABAOT LONG YUMI—WAN FASIN WE I RILI SAVE KAMAOT
WAN loea blong faswan handred yia i askem long Jisas se: “?Hu ol man ya we oli stap raonabaot long mi?” I klia we hem i ting se Jisas bambae i talem, ‘Ol manples blong yu, ol man Jyu.’ Be, Jisas i storeyan long saed blong wan man Sameria we hem i mekem i gud long wan narafala man. Hem i wantem soem se ol man raonabaot long yumi i minim ol man blong ol narafala kantri tu.—Luk 10:29-37; Jon 4:7-9.
Jisas i soem klia se, lav long God i mas faswan samting we i bos long laef blong yumi, mo namba tu samting se, lav long ol man raonabaot long yumi. (Matyu 22:34-40) ?Be i gat wan grup blong man samtaem we oli rili bin laekem ol man raonabaot long olgeta? !Yes, hemia ol faswan Kristin! Ol man oli luksave olgeta from lav ya we oli soem long ol narafala.—Jon 13:34, 35.
?Olsem wanem tede? ?I gat sam man we oli stap soem semfala lav we Kraes i bin soem? Encyclopedia Canadiana i talem se: “Wok blong ol Wetnes blong Jeova i soemaot mo i stanemap bakegen Kristin fasin we Jisas mo ol man blong hem oli bin folem . . . Olgeta evriwan oli olsem brata.”
?Samting ya i minim wanem? I minim se ol Wetnes blong Jeova oli no letem wan samting—olsem kala blong skin, kantri no laen blong man—i pulum olgeta blong no laekem ol man raonabaot long olgeta. Oli no kilim man i ded, from we i olsem se oli tanem finis ol naef blong faet blong olgeta oli kam tul blong wokem garen, mo ol spia blong olgeta oli kam sisis blong katem han blong tri. (Aesea 2:4) Yes, ol man oli save se ol Wetnes oli rere oltaem blong givhan long ol man raonabaot long olgeta.—Galesia 6:10.
I klia from wanem wan store long nyuspepa blong Kalifonia, Sacramento Union, i talem se: “Yumi save talem se sipos olgeta man long wol oli folem bilif blong ol Wetnes blong Jeova, bambae i no moa gat faet mo fasin blong agensem narafala man, be bambae wol i fulap long lav.” Wan man blong raetem ol store long nyuspepa ya blong Hangari, Ring, i talem se: “Mi luksave se sipos i gat ol Wetnes blong Jeova nomo long wol ya, bambae i no moa gat faet, mo bambae ol polis oli mekem smol wok nomo, hemia blong kontrolem ol trak we oli ron long rod mo givimaot ol paspot.”
Be i sua se, wan bigbigfala jenis i mas kamaot long olgeta ples blong wol blong mekem se olgeta man oli laeklaekem olgeta. ?Olsem wanem jenis ya bambae i kamaot? (Plis ridim laswan pej.)
WAN TAEM WE OLGETA MAN BAMBAE OLI LAEKLAEKEM OLGETA
WAN prea we Jisas Kraes i bin tijim long ol man, i soem se kolosap nao wan bigbigfala jenis bambae i kamaot long wol ya. Long Bigfala Toktok blong Jisas antap long hil, we plante man oli savegud long hem, hem i tijim yumi blong prea olsemia: “Bambae kingdom blong yu i kam. Bambae samting we yu yu wantem i kamaot long wol ya, olsem we i kamaot finis long heven.”—Matyu 6:10, King James Version.
?Wanem ya Kingdom blong God? Hem i wan trufala gavman we i stap long heven. Hemia nao from wanem Baebol i kolem hem se ‘kingdom blong heven.’ God i putumap Pikinini blong hem, Jisas, we i “Prins blong Pis,” blong i rul olsem king long kingdom ya.—Matyu 10:7; Aesea 9:6, 7; Ol Sam 72:1-8.
Taem Kingdom blong God i kam, ?wanem bambae i kamaot long wol ya we i fulap long fasin blong no laekem narafala man? “Kingdom ya” bambae i “smasem mo i finisim” olgeta rabis gavman blong wol ya. (Daniel 2:44) Baebol i eksplenem se: “Wol ya . . . [i] stap lus. Be man we i stap mekem ol samting we God i wantem, hem i stap we bambae i no save lus samtaem.”—1 Jon 2:17.
Long saed blong nyufala wol ya blong God, Baebol i talem se: ‘Ol stret man bambae oli tekem graon ya i blong olgeta, mo bambae oli stap long hem gogo i no save finis.’ (Ol Sam 37:9-11, 29; Proveb 2:21, 22) !Taem ya bambae i nambawan tumas! “Bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem.” (Revelesen 21:4) Ol dedman tu bambae oli laef bakegen, mo ful wol bambae i kam wan trufala paradaes.—Aesea 11:6-9; 35:1, 2; Luk 23:43; Ol Wok 24:15.
Blong stap long nyufala wol ya blong God, yumi mas laeklaekem yumi, olsem God i stap tijim yumi blong mekem. (1 Tesalonaeka 4:9) Wan Baebol studen long Esia i talem se: “Mi mi stap wet long taem ya we Baebol i promes long hem, we ol man oli lanem finis blong laeklaekem olgeta.” !Mo yumi save sua se God bambae i holem ol promes blong hem! Hem i talem se: “Mi mi talemaot finis, bambae mi mekem i kamtru.”—Aesea 46:11.
Be, blong haremgud long ol blesing we oli kamaot aninit long rul blong Kingdom blong God, yu mas stadi long Baebol blong kasem save long hem. Plante milyan man long wol we hat blong olgeta i stret, oli stap mekem samting ya finis. (Jon 17:3) Smol buk ya we i gat 32 pej blong hem, ?Wanem Samting We God i Wantem Yumi Blong Mekem?, bambae i givhan long yu. Yu save kasem wan buk olsem sipos yu fulumap smol haf daon long pej 3, mo sanem i go long adres we i kolosap long ples blong yu.
□ Mi mi wantem buklet ya ?Wanem Samting We God i Wantem Yumi Blong Mekem?
□ Plis kam luk mi long saed blong wan Baebol stadi we mi no pem.
[Foto Credit Line blong pija long pej 2]
Sniper and funeral in Bosnia: Reuters/Corbis-Bettmann