Bilif i Pusum Hem Blong Tekem Aksin

TAEM Jeova i talem long Moses blong lidim nesen blong Isrel aot long kalabus long Ijip, fastaem Moses i no wantem mekem wok ya, i se: “Sore, Jeova, be mi mi no wan man blong toktokgud. Stat yestede, mo bifo long taem ya, mo taem yu bin toktok wetem man blong wok blong yu bifo, mi mi no save toktokgud. From we maot mo tang blong mi oli slou tumas.” (Eksodas 4:​10, NW) Yes, Moses i harem se hem i no naf blong mekem bigfala wok olsem.

Sem mak tede, plante man blong Jeova, oli harem se oli no naf blong mekemgud ol wok we i stap long han blong olgeta. Eksampel, wan Kristin elda we nem blong hem Theodore, i talem se: “Long olgeta samting we Jeova i askem mi blong mekem, wok blong prij nao i hadwok moa long mi. Taem mi yangfala, mi stap wokbaot kwiktaem i go long doa blong ol haos, mi gyaman se mi kilim doa, nao mi aot long kwaet fasin nomo, we mi hop se i no gat wan man i harem no i luk mi. Taem mi kam bigwan moa, mi no moa mekem olsem. Be taem mi stap tingting se mi mas go prij long ol haos wanwan, mi harem mi sik long bel blong mi. Kam kasem tede, mi mi sik bifo we mi goaot long wok blong prij. Nating se i olsem, mi go nomo.”

?Wanem samting we i givhan long Moses mo ol Wetnes tede, olsem Theodore, blong winim fasin fraet olsem? Baebol i givim ansa se: “From we Moses i stap bilif long God, taswe hem i aot long Ijip, . . . i stap gohed olwe nomo, olsem we i stap luk God ya we man i no save luk long ae blong hem.”​—Hibrus 11:27.

Yes, from we Moses i gat bilif long Jeova, hem i winim ol filing ya se hem i no naf. Hem i mekem olgeta wok we hem i mas mekem olsem jaj, profet, lida blong nesen, man blong mekem Loa i stanap bitwin God mo ol man, komanda, man blong raetem histri, mo man blong raetem Baebol.

Sem mak nao, taem yumi gat bilif olsem Moses, yumi save wokbaot olsem we yumi ‘stap luk God ya we man i no save luk long ae blong hem.’ Bilif olsem i mekem se yumi no fraet, mo i pusum yumi blong mekem olgeta Kristin wok blong yumi​—nating we yumi harem se yumi no naf.