“Yufala i Mas Strong Blong Stanap Longtaem”
YUMI “mas strong blong stanap longtaem,” sipos yumi wantem ‘kasem ol samting we God i promes long yumi.’ (Hibrus 10:36) Wan man blong stadi long Baebol i eksplenem se Grik tok ya ‘stanap strong longtaem’ we aposol Pol i yusum long vas ya, samtaem oli yusum blong tokbaot “fasin blong wan flaoa blong stap laef nating se graon mo weta i nogud.”
I gat wan kaen flaoa olsem we i stap gru long ol bigfala hil blong Yurop. Samting we i narakaen se nem blong flaoa ya, laef-foreva. I tru se, flaoa ya we i stap gru antap long ol bigfala hil, i no save laef foreva, be hem i save stap blong plante yia. Mo evritaem, long hot taem, hem i karem ol naesfala flaoa. Buk ya, The New Encyclopædia Britannica, i eksplenem se oli givim nem ya laef-foreva, long flaoa ya from we hem i “strong mo i save stap longtaem.” (Nem we ol sayentis oli givim long flaoa ya, Sempervivum, i minim sem samting se “laef-foreva”.)
Samting we i mekem se flaoa ya we i save stap longtaem, i spesel, hemia se hem i stap gru long ol ples we graon mo weta i nogud. Yumi save faenem ol flaoa olsem long ol haeples antap long ol bigfala hil we i gat plante win long hem. Long ol ples olsem, tempraja i save jenis i godaon 35 digri selsius long 24 haoa nomo. Hem i save gru long ol ples we i gat plante ston mo smol graon nomo. ?Wanem ol samting we oli mekem se flaoa ya i save stanap strong long ol nogud ples olsem?
Laef-foreva ya i gat ol bigfala lif we oli fulap long wora. Samting ya i mekem se hem i save yusumgud olgeta wora blong ren mo aes we i stap ron. Mo tu, plante flaoa oli fasfas wanples, samting ya i mekem se hem i gat moa paoa blong fasgud long ol ston we hem i gru long olgeta. Taem hem i gru long ol hol long ston, hem i haed lelebet long rabis weta, nating se maet i no gat plante graon long ol ples olsem. Hemia i minim se, hem i laef from we hem i yusum evri jans we hem i kasem long ol nogud ples ya we hem i stap long hem.
Long saed blong speret tu, maet yumi kasem sam hadtaem we oli traem fasin blong yumi blong stanap strong. ?Wanem samting bambae i halpem yumi blong stanap strong taem yumi kasem ol traem? Olsem flaoa ya laef-foreva, yumi save hivimap ol Tok blong God we i olsem wora blong givim laef, mo yumi save stap kolosap oltaem long ol trufala Kristin blong oli sapotem mo protektem yumi. Antap moa, olsem flaoa ya we i gru long ol hil, yumi mas fasgud long “ston” blong yumi, Jeova, wetem Tok mo ogenaesesen blong hem.—2 Samuel 22:3.
Tru tumas, flaoa ya laef-foreva, i pulum yumi long naesfala fasin blong tingbaot se, nating we laef blong yumi i no isi, yumi save stanap strong sipos yumi yusumgud olgeta samting we i stap blong givhan long yumi. Jeova i talem klia long yumi se sipos yumi stanap strong longtaem, bambae yumi kasem “ol samting we God i promes blong givim,” hemia laef we i no save finis.—Hibrus 6:12; Matyu 25:46.