Wan Nambawan Wetnes Long Gris

LONGTAEM finis i kam, ol man oli stap agensem ol Wetnes blong Jeova long Gris. Sam polis, kot, mo haeman blong gavman oli bin mekem nogud long ol Wetnes. Plante taem, hemia from we ol lida blong Otodoks Jyos long Gris oli pusum olgeta blong mekem olsem. Samtaem, oli talem se ol Wetnes oli brekem loa blong Gris we i agensem fasin blong pulum narafala blong jenisim skul blong hem. Mo samtaem, oli agensem ol Wetnes from we oli no wantem joen long faet mo tekem blad, folem samting we Baebol i talem.​—Aesea 2:​2-5; Ol Wok 15:28, 29.

I no longtaem, samwe long 200 Wetnes long Gris, we gavman i luksave olgeta olsem ol minista blong wan jyos, mo samfala we oli loea, oli mekem wan spesel wok long ful kantri. Oli mekem olsem blong traem givhan long ol haeman blong Gris we hat blong olgeta i stret, blong oli kasem moa save long ol Wetnes. Ale, oli givimaot wan spesel buklet, we nem blong hem Jehovah’s Witnesses in Greece, mo buk ya Jehovah’s Witnesses​—Proclaimers of God’s Kingdom. Oli givimaot sam pepa tu we oli soem se i no gat wan gudfala risen we i stanap long loa, blong ol man oli stap mekem nogud long ol Wetnes blong Jeova. Ol Wetnes oli visitim ol hed blong polis, ol mea, ol loea, mo ol narafala haeman.

?Wanem i kamaot from? Plante handred gudfala store. Hemia sam long olgeta ya.

Jif blong wan polis stesen long Wes Masedonia i welkamem ol brata, nao i talem se: “Mi mi savegud yufala longtaem finis, . . . mo mi tinghae long fasin blong yufala blong wok folem wan gudfala plan. . . . Mi no agri nating long loa ya we i agensem fasin blong pulum narafala blong jenisim skul blong hem. Sipos mi mi gat raet, bambae mi tekemaot loa ya.”

Plante jif long ol defren polis stesen long plante taon, oli talem ol tok olsem se: “Mi mi presem yufala from wok we yufala i stap mekem blong givhan long olgeta man.” “Yufala i neva mekem wan problem long mifala, ol polis. Yufala i stap givhan long ol man nomo.” “Mifala i no gat trabol nating from yufala. Mifala i respektem mo tinghae long yufala.”

Long Piraeus, wora i ron long ae blong wan bigman blong ol polis gad, taem hem i talem long ol brata se hem i save we yumi mas yusum nem blong Jeova God mo prea long hem tru long Jisas Kraes. Ol brata oli sapraes moa taem hem i talem se, ol Wetnes oli save we kolosap long Amageden, bambae ol man oli mekem nogud long olgeta. !Mo hem i hop se bambae God i yusum hem blong givhan long olgeta long taem ya! Hem i agri taem ol brata oli askem hem sipos oli save kam storeyan moa wetem hem.

Ol Bigman Blong Gavman Oli Glad

Wan mea long Tesali i talem long saed blong buk ya Proclaimers, se: “Buk ya i mas stap long laebri blong taon ya. !Hem i mas stap long fasples!” Ale, hem i go, i tekemaot sam narafala buk, mo i putum buk ya, Proclaimers long ples blong olgeta, blong ol man oli save luk klia.

Long Not blong Gris, wan mea i glad blong luk ol brata, mo i talem se: “Long eria blong mi, mi ting se i no gat ol man we oli gudfala moa bitim yufala.” Long Not Yubia, wan mea we hem i gat kaen fasin, i talem long ol brata se: “Bifo, mi mi wan bigman blong ol ami. Mo yufala​—mi tinghae tumas long yufala.” Hem i agri fulwan wetem ol poen we ol Wetnes oli talem long hem. Taem oli soem long hem sam buk we Watch Tower Sosaeti i wokem, hem i talem se: “?Sipos mi promes long yufala se bambae mi ridim olgeta buk ya, bambae yufala i givim olgeta long mi?” Oli ansa se: “!Be yes​—oli blong yu ya!” !Hem i haremgud tumas mo hem i no wantem se ol brata oli lego hem!

Long taon ya Atika, wan mea i glad tumas blong tekem ol buk we ol brata oli givim long hem, mo i askem olgeta blong gohed blong karem ol buk blong Sosaeti oli kam long hem. Taem oli rere blong aot, hem i talem long olgeta se: “Ol man oli no glad nating wetem ol man blong politik. Oli stap lukaot trutok long narafala ples. Mi mi sua se stat naoia, bambae yufala i bisi tumas from we yufala i gat trutok.”

Ol Loea Oli Glad

Ol brata oli tokbaot taem we oli visitim wan bigfala loea long not blong Gris, oli se: “Hem i laekem tumas ol buk mo toktok blong mifala, mo tu, ol traehad blong mifala blong halpem ol narafala Wetnes taem oli fesem bigfala traem long saed blong blad. Biaen, hem i talem tangkyu mo i presem mifala from we mifala i kam visitim hem mo givim moa save long hem. Biaen, mifala i faenemaot se fo yia bifo, hem i bin singaot ol polis blong holem tufala brata we tufala i stap prij.”

Tufala Wetnes we tufala i loea, oli go long ofis blong jif loea long Atens. Ale, tufala i sapraes we wan narafala jif loea i kam toktok wetem tufala. Loea ya, plante man oli savegud hem mo oli respektem hem. Hem i tekem tufala i go long wan kona, mo i talem long tufala se i no gat wan gudfala risen blong stanemap loa ya we i agensem fasin blong pulum narafala blong jenisim skul blong hem, mo se loa ya i mekem ol samting i fasfas long ol kot blong Gris. Hem i sekhan wetem tufala mo talem tangkyu.

Long not blong Gris, i gat wan jif loea we i kaengud mo i karem ol buk. Taem hem i tanem ol pej blong buk ya Questions Young People Ask​—Answers That Work, hem i sapraes tumas blong luk ol japta we oli tokbaot plante defren samting. Hem i talem se: “Ol poen we buk ya i tokbaot, mi neva luk long Jyos blong Otodoks.”

Wan jif loea long Biosia i talem stret se, bifo, hem i bin givim raet long ol dokta blong givim blad long sam Wetnes blong Jeova we oli no wantem blad. Be afta we ol brata oli eksplenemgud bisnes ya long hem, hem i talem se: “!Bambae mi neva givim wan oda olsem bakegen long fyuja!” Hem i mekem disisen se fastaem ol dokta oli mas luk Komiti Blong Ol Wetnes Blong Jeova, We Oli Toktokgud Wetem Ol Dokta, blong faenemaot sipos i gat ol narafala meresin we oli save yusum. Hem i glad blong karem buk ya Young People Ask.

Ol Man Blong Laebri Oli Glad

Oli givimaot ol buk ya tu long plante man blong laebri. Long Atens, wan man we i lukaot long laebri, i soem kaen fasin, nao hem i karem sam buk mo i talem se: “I naes tumas we yufala i karem ol buk blong yufala oli kam long mifala, from we bighaf blong ol buk long laebri blong mifala oli agensem yufala. . . . Wan pris i kros tumas taem hem i luk ol buk blong yufala long laebri. . . . Mi no wari long samting ya. Ol man oli mas harem tingting blong narafala.”

Wan haeman long laebri blong minisipol long Krit, i bin mitim ol Wetnes blong Jeova long wan kamp blong ol ami. Hem i talem long ol brata se hem i laekem tumas disisen blong ol Wetnes blong Jeova blong no joen long faet. Hem i stap tingbaot se: ‘?From wanem ol man oli stap mekem nogud long ol Wetnes ya?’ Hem i karem sam buk we ol brata oli givim, mo i tokbaot wok ya we oli stap mekem, se: “Yufala i mekem nambawan wok mo i gud sipos yufala i bin mekem wok ya plante yia bifo. . . . Long Gris, i gat plante man we oli agensem yufala blong nating nomo.” Hem i askem ol brata blong kam luk hem bakegen.

Long spesel wok ya we ol brata oli mekem, oli seremaot bitim 1,000 buk ya Proclaimers, 1,600 buklet ya Jehovah’s Witnesses in Greece, mo plante handred narafala buk mo magasin. Samting we i moagud se, oli toktok stret wetem plante handred haeman blong Gris. Naoia, ol trufala man blong Jeova long Gris mo raon long wol, oli hop se ol haeman ya blong Gris, we hat blong olgeta i stret, bambae oli gat tingting we i moa stret long saed blong ol Wetnes blong Jeova.