Wok i Stap Kam Bigwan Moa From Blesing Blong Jeova

LONG naet blong Septemba 18, 1995, oli mekem wan miting blong dediketem sam nyufala haos. Long miting ya, oli tokbaot olsem wanem Jeova God i stap blesem mo mekem i kam bigwan moa, wok ya we ol Wetnes blong hem oli stap mekem long hedkwota blong wol, long Bruklin, Nyu Yok.

Bitim 6,000 man oli lesin long ol tok blong dediketem ol nyufala haos ya. Plante man oli hivap long Bruklin, long ples we oli mekem miting ya. Mo plante man oli hivap long sam narafala ples tu, olsem ol woksap blong ol Wetnes blong Jeova kolosap long Pateson mo Walkil, Nyu Yok, mo long ofis long Toronto, Kanada. Olgeta ya we oli no stap long Bruklin, oli harem program ya taem i pas i kam long ol laen blong telefon.

Wan Miting We i Mekem Man i Haremgud

Olgeta ya we oli no kasem pei from wok blong olgeta long Bruklin Betel, oli bighaf blong ol 16,400 memba blong famle blong Betel raon long wol. Ol memba ya oli wok long kolosap wan handred defren kantri. Oli stap prentem ol buk we oli tokbaot Baebol, mo oli givhan long ol wok blong lukaot long bitim 78,600 kongregesena blong ol Wetnes blong Jeova long wol.

Ol man oli glad tumas taem miting ya i stat long haf pas sikis long naet wetem wan singsing, mo biaen, Karl Klein i mekem faswan prea. Jeaman blong miting ya, Lloyd Barry, i welkamem olgeta man wetem wan smol tok blong soemaot from wanem miting ya i impoten. Afta, Albert Schroeder i mekem wan tok long stadi blong Wajtaoa blong wik ya. Brata Barry i livim ples long Daniel Sydlik, we i givim wan tok, “Tabu Wok Blong Yumi Long Betel.” Ol faswan man ya blong givim tok long miting ya, oli ol memba blong Hed Kampani blong ol Wetnes blong Jeova.

Tufala haf blong program we oli kam biaen​—“Bildim Ol Haos We Yumi Nidim, 1974-​1995,” mo “Wok Blong Bildim mo Mekemgud Bakegen Ol Haos Blong Betel Long Bruklin”​—oli tokbaot sam long ol bigfala wok we ol brata oli mekem taem oli bildim mo pem ol bigfala haos ya we oli stap dediketem olgeta. Oli tokbaot wan haos we oli jes finisim i no longtaem, we wan taosen man we oli wok long Betel oli stap slip long hem naoia. Haos ya we i hae olsem 115 mita, i stap long 90 Sands Strit, mo hem i joen long woksap blong prentem ol buk.

Wan impoten haf blong miting ya, hemia tok blong dedikesen, we Milton Henschel, presiden blong Watch Tower Bible and Tract Society, i givim. Hem i tokbaot sam store long Baebol, long saed blong ol man long taem bifo we oli dediketem sam haos blong yusum long wok blong Jeova. Afta long wan singsing, Carey Barber, we hem tu i wan memba blong Hed Kampani, i mekem wan prea blong finisim miting ya. ?Be wanem sam long ol bigfala poen long miting ya?

Oli Dediketem Ol Nyufala Haos Ya

George Couch, we i stap lukaot long olgeta wok insaed long ol haos blong slip mo kakae, i eksplenem se stat long lastaem we oli dediketem wan haos blong Betel long Bruklin, hemia long Mei 2, 1969, oli bin wokem 17 moa bigfala store haos blong slip.b Sam long olgeta ya oli bin bildim, mo sam narawan, oli ol haos we oli pem mo mekem oli kam nyuwan bakegen. Miting ya i blong dediketem ol 17 nyufala haos ya blong slip, wetem tu narafala smol haos​—we oli bin pem jes biaen long 1940 mo oli mekem i kam olsem ol haos blong slip blong ol memba blong Betel. Mo tu, oli dediketem wan bigfala woksap mo ofis, we oli bildim mo pem afta long taem we oli dediketem ol nyufala ofis blong hedkwota blong ol Wetnes blong Jeova long Maj 15, 1982.c

Wan long ol nyufala haos ya we i bigwan moa, hemia haos we i stap long 360 Furman Strit. Oli bin wokem haos ya long 1928, mo ol Wetnes blong Jeova oli pemaot long Maj 15, 1983, ale, oli mekem i kam nyuwan bakegen. Insaed blong hem i bigwan olsem 93,000 skwea mita, hemia kolosap 9 hektea. Sam narafala haos we oli dediketem, hemia woksap we i stap long 175 Pearl Strit, mo ol bigfala haos blong putum trak, we oli bildim long ol yia we oli jes pas.

?From Wanem i Nidim Sam Moa Haos?

Long 1969, taem oli dediketem laswan haos blong Betel long Bruklin, i gat 1,336,112 Wetnes we oli stap talemaot gud nyus blong Kingdom blong God long olgeta ples blong wol. !Be, long 1995 i gat 5,199,895 man we oli stap mekem wok ya, hemia i kolosap fo taem antap long faswan namba ya! !Taswe, blong prentem bigfala namba blong ol buk we oli tokbaot Baebol olsem wol i nidim, Betel famle long Bruklin, we long 1969 i gat 1,042 memba, i kam bigwan moa gogo i gat bitim 3,360 memba, we naoia oli stap long 22 store haos blong slip!

George Couch i tokbaot olsem wanem oli kasem moa haos olsem oli nidim long ol yia 1974 go kasem 1995. Hem i makem se, stat long 1970, ol Wetnes blong Jeova oli rentem sam rum long Towers Hotel, we i stap kolosap, blong sam memba blong Betel famle oli save slip long ples ya. Ale, long Desemba 1973, Nathan Knorr, we i presiden blong Watch Tower Society long taem ya, i raet i go long Ofis blong Betel mo long bos blong Towers Hotel, blong talem se Sosaeti i gat plan se ‘ol man we oli stap long Towers Hotel bambae oli muvaot bifo long Oktoba 1, 1974.’

Brata Couch i talem se hem i sapraes bigwan from we ol memba blong Betel we oli stap slip long Towers Hotel, oli no gat narafala ples blong slip sipos oli aot. Bos blong Towers Hotel i sapraes tu, from we hem i stap dipen bigwan long mane we Sosaeti i stap givim from ol rum ya. Samting we i kamaot biaen se, bos blong Towers Hotel i askem strong long ol Wetnes blong Jeova blong pemaot hotel ya. Hem i talem se: “Stat long taem we mifala i kam long ples ya, mifala i luk we yufala i stap gru bigwan. Yufala i nidim hotel ya.”

Ol brata long Sosaeti oli ansa se: “I gat plante narafala man tu we oli stap rentem rum long hotel ya. Sipos mifala i pemaot haos ya, bambae ol man blong wok blong mifala oli mas stap long ol rum ya.”

Bos blong Towers Hotel ya i promes se: “Bambae mifala i tekemaot ol man ya long hotel ya.” Ale, smoltaem biaen, ol Wetnes blong Jeova oli pemaot Towers Hotel long wan gudfala praes. Brata Couch i askem ol man we oli stap lesingud long tok blong hem, i se: “?From wanem Brata Knorr i raetem leta ya? Ating hem tu i no save, be from leta ya nao Watch Tower Sosaeti i pemaot Towers Hotel.”

Brata ya i gohed blong tokbaot olsem wanem ol Wetnes blong Jeova oli pemaot graon ya blong 97 Columbia Haets, narasaed rod nomo long faswan Betel haos, we Margret Hotel i stap long hem bifo. Ples ya i stretgud from we oli save joenem hem wetem ol haos blong Betel we oli stap narasaed long rod, tru long wan tanel we i pas aninit long graon. Long Febuwari 1980, taem ol man oli stap mekem hotel ya i kam nyuwan bakegen, hem i bon long faea. Nao i gat wan trabol we i blokem bos blong hotel ya blong bildim wan nyufala hotel long ples ya, taswe hem i salem graon ya long ol Wetnes blong Jeova.

Brata Couch i makem se: “I gat wan gudfala store i joen wetem kolosap olgeta haos ya. Samting ya i soemaot wan samting, i klia nomo​—se Jeova God nao i lidim ogenaesesen blong hem blong kasem ol wanwan haos ya.”

Store Blong 90 Sands Strit

Haos we i nyufala olgeta mo i bigwan moa, hemia haos we i stap long 90 Sands Strit. Taem ol Wetnes blong Jeova oli pemaot graon ya long Desemba 1986, i gat wan bigfala faktri long hem, long 160 Jay Strit.d Oli karemaot faktri ya, mo long Ogis 30, 1990, ol brata oli talemaot long famle blong Betel se oli kasem pepa we i givim raet long olgeta blong bildim wan haos we i gat 30 store blong hem long graon ya.

Memba blong Hed Kampani, Theodore Jaracz, i askem Max Larson, we i lukaot long ol woksap blong Sosaeti long Bruklin, blong talemaot olsem wanem oli kasem raet blong bildim bigfala haos blong slip long 90 Sands Strit. Brata Larson i eksplenem se, samting we i bin hapen long 1965 i impoten tumas long saed ya.

Long 1965, Sosaeti i wantem bildim wan woksap we i gat ten store blong hem, long wan graon kolosap long ol narafala woksap blong hem. Be loa i talem se oli gat raet blong bildim wan haos we i gat tu store nomo long graon ya. Wan man blong mekem ol plan blong haos, i agri blong mekem plan blong nyufala woksap ya, be hem i talem se: “Bambae mi no karem ol pepa ya oli go long Bod, mi sem blong mekem samting ya from we oli no save givim raet long yufala.” Hem i bilif se Bod blong Standed mo Apil, bambae i neva jenisim loa long saed blong graon ya. Be, taem Bod i pasem ol plan mo givim raet long olgeta blong bildim haos ya, hem i sapraes se: “?Olsem wanem yufala i kasem raet ya?”

Larson i gohed blong talem se, risen hemia se taem oli bin jenisim loa blong mekem se oli save bildim wan ten store woksap, oli jenisim loa tu long saed blong sam graon we i stap kolosap, olsem graon blong 160 Jay Strit. Mo, mifala i sapraes blong save se, nyufala loa ya i givim raet long eniman blong bildim wan hotel long ples ya. Be, Larson i talem se, i no gat wan man we i tinghevi long samting ya​—gogo kasem we 25 yia i pas, ale mifala nao i stat lukaot wan pis graon blong bildim wan nyufala haos Betel long hem. !Ale, long taem ya nao, mifala i faenem bakegen nyufala loa ya we i bin stanap plante yia bifo!

Brata Larson i eksplenem samting we i bin hapen: “Taem mifala i mekem ol plan blong 30 store haos ya blong slip, mo mifala i karem olgeta oli godaon long ofis blong gavman we i mas agri long ol plan ya, olgeta long ofis ya oli talem long mifala se: ‘Yufala i no save bildim wan haos blong slip long ples ya. Eria ya i blong bildim ol woksap nomo long hem, mo Bod bambae i no jenisim loa from yufala.’

Larson i gohed i se: “Mifala i talem long ol man ya se: ‘Oli no nidim blong jenisim loa ya. Loa we i stap finis i givim raet blong bildim wan hotel long graon ya.’ !Taem oli lukluk i gobak long ol buk blong olgeta, oli sapraes bigwan! Yes, hem i long rod ya nao we mifala i kasem raet blong bildim 30 store haos blong mifala.”

Blesing Blong Jeova i Klia

Man blong raetem Sam long Baebol i talem se: ‘Sipos Jeova i no bildim haos, wok blong ol man blong bildim haos i blong nating nomo.’ (Ol Sam 127:1) I klia se, blesing blong Jeova i stap long wok blong ol Wetnes blong Jeova blong bildim ol nyufala haos ya, blong givhan long wok blong prij mo tij we Jisas i givim oda long ol man blong hem blong mekem long olgeta ples blong wol.​—Matyu 24:14; 28:19, 20.

Olgeta we oli gat jans blong lesin long ol tok long miting ya long Septemba 18, 1995, oli glad tumas blong luksave se blesing blong God i stap long wok ya blong mekem hedkwota blong ol man blong Jeova long Bruklin, Nyu Yok, i kam bigwan moa. Ol man blong Jeova oli save sua se bambae Hem i gohed blong blesem olgeta taem oli mekem ol samting we hem i talem long olgeta blong mekem.

[Ol futnot]

[Tok Blong Pija Long Pej 23]

90 Sands St. • 1995

[Tok Blong Pija Long Pej 24, 25]

Sam long ol narafala nyu haos blong slip we oli dediketem

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Hts. • 1981

67 Livingston St. • 1989

108 Joralemon St. • 1988

Towers Hotel, 79-​99 Willow St. • 1975

[Tok Blong Pija Long Pej 26]

175 Pearl St. • 1983

69 Adams St. • 1991

360 Furman St. • 1983