God, Gavman, Mo Yu

“Long Aerlan, Jyos mo Gavman Oli Rao From Loa Long Saed Blong Divos”

STAMPA tok ya long fored blong nyuspepa ya The New York Times i soemaot klia se, samtaem ol man oli mas jusum sipos bambae oli folem samting we Gavman i talem, no samting we jyos blong olgeta i tijim.

Nyuspepa ya i talem se: “Afta wan manis, bambae gavman i vot blong luk sipos hem i tekemaot loa long konstitusen we i agensem divos, no no gat. Be naoia, long Aerlan, we bighaf blong ol man oli Katolik, i gat wan rao we i no bin kamaot plante taem bifo, bitwin long ol lida blong Gavman mo ol lida blong jyos.” Gavman i wantem karemaot loa we i agensem divos, be Katolik Jyos i agensem bigwan, divos mo fasin blong mared bakegen. Ol man long Aerlan we oli Katolik, oli mas jusum se bambae oli sapotem Jyos no Gavman. Ale, Gavman i win.

Samting we i moa nogud, se long plante yia, ol man long Not Aerlan oli bin luk wan strong faet from bisnes ya se hu bambae i rulum kantri. Plante man oli ded from. Ol man Katolik mo Protestan oli gat defren tingting long saed blong weswan Gavman oli mas obei long hem: ?Bambae Not Aerlan i gohed blong stap aninit long rul blong Briten, no bambae wan gavman nomo i rul long fulwan Aerlan?

Long sem fasin, long kantri we bifo nem blong hem Yugoslavia, gavman i talem long ol memba blong ol defren skul, olsem

Katolik mo Otodoks, se oli mas faet from graon blong olgeta. Ol man long kantri ya, ?oli mas obei long hu fastaem? ?Oli mas folem ol man we oli wok long nem blong Gavman, no oli mas obei long God, we i talem se: ‘Yu no kilim man i ded . . . Yu mas laekem tumas ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu nomo’?​—Rom 13:9.

Maet yu gat tingting ya se bambae yu neva fesem wan disisen olsem. Be maet samting ya i no tru. Yes, maet hem i stret long yu naoia. Long buk ya, The State in the New Testament, man blong stadi long saed blong skul, Oscar Cullmann, i tokbaot “ol disisen we oli save givim laef no ded, we ol Kristin oli mas mekem, taem oli kasem bigfala trabol from ol gavman we oli stap fosem man.” Be tu, hem i talem se “bigfala impoten responsabiliti we evri Kristin i gat, i blong fesem mo winim enikaen trabol we i save kamaot from we hem i wan trufala Kristin. Samting ya i stret tu long ol Kristin we oli stap long ol ples we oli ‘gud’ nomo, i no gat tumas trabol long ‘evridei’ laef blong olgeta.”

Taswe, ?i stret we ol Kristin tede, oli intres long ol samting we i kamaot bitwin long Gavman mo skul? Yes, oli mas intres long samting ya. Stat long taem bifo olgeta, ol Kristin oli traehad oltaem blong gat stret tingting long saed blong ol gavman. Gavman blong ol man Rom i jajem, panisim, mo kilim i ded Lida blong olgeta, Jisas Kraes. Ol disaepol blong hem oli mas skelem ol samting we Gavman blong Rom i askem olgeta blong mekem, wetem ol Kristin loa we oli mas obei long olgeta. Taswe, sipos yumi luklukbak long tingting we ol Kristin bifo oli gat long saed blong gavman, samting ya i save soemaot rod long ol Kristin tede.

[Foto Credit Line Blong Pija Long Pej 3]

Tom Haley/Sipa Press