‘Yufala i Mas Ona Long Ol Man Olsem’

OL SAMTING oli no stap rongud long kongregesena blong Korin. I gat wan man we i bin mekem fasin we i nogud we i nogud long saed blong seks, mo tu, ol brata oli stap seseraot long ol defren grup. Samfala oli kasem sam bigfala problem long laef blong olgeta, mo samfala oli gat sam kwestin we oli wantem kasem ansa blong olgeta. Sam brata oli stap putum narafala brata long kot. Mo samfala oli no moa bilif long laef bakegen long ded.

Sam bigfala kwestin tu oli kamaot. ?Olsem wanem long ol brata mo sista we hasban no waef blong olgeta oli no bilif? ?Oli mas stap wetem olgeta, no oli mas seraot? ?Wanem wok blong ol sista long kongregesen? ?I stret blong kakae mit we man i bin mekem sakrifaes long hem i go long aedol? ?Wanem rod oli mas folem blong mekem ol miting, olsem Lodsapa?​—1 Korin 1:​12; 5:1; 6:1; 7:​1-3, 12, 13; 8:1; 11:18, 23-​26; 14:26-​35.

Ating trifala man ya Akaekas, Fotunatas, mo Stefanas, oli wari long ol brata blong olgeta from ol trabol we i stap kamaot, taswe trifala i mekem wan trep blong go luk aposol Pol long Efesas. Antap long nyus blong ol problem ya, maet oli karem wan leta tu i go long Pol, leta we i fulap long ol kwestin we kongregesen i bin askem long saed blong ol bisnes ya. (1 Korin 7:1; 16:17) I klia se, i no trifala brata ya nomo we oli wari long saed blong problem ya. “Famle blong Kloe” i talemaot nyus finis long Pol, se samfala insaed long kongregesen oli stap raorao. (1 Korin 1:​11) I klia se, ripot blong trifala brata ya i givhan long Pol blong kasem save moa long problem ya, mo blong luksave wanem advaes we hem i mas givim, mo olsem wanem blong ansa long ol kwestin blong olgeta. I luk olsem se, leta we naoia yumi kolem Fas Korin, hemia ansa we tabu speret i lidim Pol blong raetem long olgeta. Maet Akaekas, Fotunatas, mo Stefanas trifala i bin karem leta ya i gobak long kongregesen long Korin.

?Hu ya Akaekas, Fotunatas, mo Stefanas? ?Yumi save lanem wanem taem yumi stadi long samting we Baebol i talem long saed blong trifala?

Famle Blong Stefanas

Famle blong Stefanas, oli ol ‘faswan frut’ blong wok we Pol i mekem blong prij long Akaea, wan ples long Saot blong Gris we gavman blong Rom i rul long hem. Samting ya i kamaot raonabaot long yia 50 K.T.,b mo Pol hem wan i bin baptaesem olgeta. Ating Pol i tingbaot famle ya olsem wan gudfala eksampel, ol bigman long saed blong speret we oli save pulum olgeta long kongregesen blong Korin blong mekem plante gudfala samting. Hem i talem ol gudfala toktok blong presem olgeta from wok we oli mekem insaed long kongregesen: “Ol brata mo sista. Yufala i save finis store blong Stefanas mo ol famle blong hem. Olgeta ya oli faswan long ol man Gris blong oli bilif long Kraes, mo oli stap hadwok tumas blong givhan long ol Kristin man. Mi mi wantem tumas blong yufala i onagud long ol man olsem, mo long ol man we oli stap wok wetem olgeta.” (1 Korin 1:​16; 16:15, 16) Yumi no save stret hu ya i stap insaed long “famle” blong Stefanas. Tok ya i save minim ol memba blong famle, be hem i save minim tu ol slef mo ol man blong wok. From we Akaekas i wan nem long lanwis Latin we oli givim long ol slef, mo Fotunatas i nem blong plante friman, sam man blong eksplenem Baebol oli talem se maet tufala ya tu oli memba blong famle blong Stefanas.

Nating se i olsem wanem, Pol i tingbaot famle blong Stefanas olsem wan gudfala eksampel. Ol memba blong famle ya oli “stap hadwok tumas blong givhan long ol Kristin man.” I klia se famle blong Stefanas i luksave se i gat wok blong mekem blong givhan long kongregesen, mo olgeta wanwan oli glad blong mekem wok ya. Olgeta ya oli wantem tumas blong givhan long ol narafala Kristin, mo from samting ya, i stret we oli kasem ona mo tok we i leftemap tingting blong olgeta.

‘Oli Mekem Tingting Blong Mi Mo Yufala i Stap Kwaet’

Pol i wari long samting we i stap kamaot long Korin, be, taem trifala man ya oli kamtru long hem, samting ya i leftemap tingting blong hem. Pol i talem se: “Mi mi glad tumas from we Stefanas mo Fotunatas mo Akaekas, trifala i kamtru finis long mi. Trifala ya i olsem jenis blong yufala we yufala i no stap wetem mi, nao trifala i stap mekem mi mi harem gud. Trifala i mekem tingting blong mi i stap kwaet, olsem we trifala i mekem finis long yufala. I gud yufala i ona long ol man olsem.” (1 Korin 16:17, 18) Ating Pol i wari tumas from we hem i stap longwe long kongregesen blong Korin we i gat plante trabol long hem. Be naoia we trifala brata ya oli karem nyus i kam, hem i harem olsem we fulwan kongregesen i stap wetem hem. Ating ripot we trifala i givim, i mekem se Pol i luksave fulwan ol samting we i stap kamaot, mo i no moa wari bigwan. Ating ol samting oli no rili nogud olgeta, olsem we hem i bin tingbaot fastaem.

Pol i talem se trifala brata ya oli mekem hem i haremgud, be tu, oli leftemap tingting blong kongregesen blong Korin. Ating kongregesen i haremgud taem oli save se trifala brata ya oli eksplenem gud evri trabol blong olgeta long Pol, mo se bambae oli karem advaes blong Pol i kambak.

Taswe Pol i presem Stefanas mo tufala fren blong hem from ol hadwok we oli mekem blong givhan long ol man Korin. Pol i gat bigfala tangkyu long ol man ya, taswe hem i wantem se taem oli gobak, bambae oli lidim kongregesen blong Korin we i seraot. Aposol ya i talem long olgeta long kongregesen se: “Yufala i onagud long ol man olsem, mo long ol man we oli stap wok wetem olgeta. . . . I gud yufala i ona long ol man olsem.” (1 Korin 16:16, 18) Ol strongfala advaes ya blong Pol i soemaot klia se ol man ya oli stap tru fulwan long God, nating se i gat trabol insaed long kongregesen. I stret nomo we ol man olsem oli kasem ona.​—Filipae 2:​29.

Fasin Blong Wokgud Tugeta i Karem Gudfala Frut

I klia se, fasin blong wokgud wetem ogenaesesen blong Jeova mo ol man we oli lidim hem, i karem gudfala frut. Smoltaem afta we Pol i raetem faswan leta blong hem, hem i raetem leta we yumi kolem Seken Korin tede. Long taem ya, ol samting oli stat kamgud finis long kongregesen. Ol gudfala wok blong ol brata we oli gat longfala tingting, olsem Akaekas, Fotunatas, mo Stefanas, mo visit blong Taetas, oli rili givhan long olgeta.​—2 Korin 7:​8-​15; skelem wetem Ol Wok 16:​4, 5.

Tede, ol memba blong ol kongregesen blong ol man blong Jeova, oli save kasem blesing sipos oli tingting dip long sot store ya long Baebol long saed blong ol man ya we oli gat strong bilif. Wan eksampel, tingbaot sipos i gat wan problem insaed long kongregesen blong yumi, mo from wan risen, i no gat rod blong stretem problem ya kwiktaem, nao samting ya i mekem ol brata oli wari. ?Yumi save mekem wanem? Folem fasin blong Stefanas, Fotunatas, mo Akaekas, we oli save se oli mas talemaot problem ya long Pol, nao biaen, oli livim bisnes ya long han blong Jeova. Oli no letem tingting ya blong stanap strong long stret fasin i pusum olgeta blong mekem wan samting folem prapa tingting blong olgeta nomo, mo tu, oli no “kam kros long Jeova.”​—Proveb 19:3.

Olgeta kongregesen oli blong Jisas Kraes. Long stret taem blong hem, bambae hem i mekem samting olsem hem i bin mekem long Korin. Bambae hem i stretem ol problem we oli save spolem ol kongregesen long saed blong speret mo spolem pis blong olgeta. (Efesas 1:​22; Revelesen 1:​12, 13, 20; 2:​1-4) Be go kasem taem ya, yumi mas folem gudfala eksampel blong Stefanas, Fotunatas, mo Akaekas, mo gohed blong wokhad blong givhan long ol brata blong yumi. Olsem nao, yumi tu, yumi save sapotem plan blong kongregesen, leftemap tingting blong ol brata blong yumi, mo ‘mekem olgeta oli strong moa long lav mo long ol gudfala wok.’​—Hibrus 10:​24, 25.

[Ol futnot]