Yu Save Gat “Hat Blong Wan Laeon”
SAMTAEM Baebol i yusum laeon olsem wan saen blong makem fasin no fraet mo strong tingting. Baebol i tokbaot ol strong man mo ol man we oli no fraet, se oli gat “hat blong wan laeon,” mo ol man we oli stret, oli olsem “wan yangfala laeon we i gat strong tingting.” (2 Samuel 17:10; Proveb 28:1) Taem wan laeon i faet wetem wan enemi blong hem, hem i soemaot klia se hem i “strong moa long olgeta narafala anamol.”—Proveb 30:30.
Jeova God i talem se fasin ya we laeon i no fraet, i sem mak long strong tingting we hem i gat blong lukaotgud long ol man blong hem. Aesea 31:4, 5 i talem se: “Wan laeon, yes wan yangfala laeon, i singaot bigwan antap long anamol we hem i kasem, taem i gat plante man blong lukaot sipsip oli kamaot agensem hem. Bambae hem i no fraet long voes blong olgeta, mo nating se oli mekem bigfala noes, bambae hem i no bendaon. Long sem fasin, Jeova blong ol ami bambae i kamdaon blong faet from bigfala Hil ya Saeon . . . Bambae hem i faet blong protektem hem, mo bambae hem i sevem hem. Bambae hem i letem hem i stap laef, mo bambae hem i letem hem i gofri.” Long tok ya, Jeova i promes long ol man blong hem se bambae hem i keagud long olgeta oltaem, antap moa taem trabol i kasem olgeta.
Baebol i talem se bigfala enemi blong man, Devel Setan, i olsem wan laeon we i stap singaot bigwan mo we i wantem kakae man. Blong mekem se hem i no save kakae yumi, Baebol i talem se: “Yufala i mas lukaot gud. Yufala i mas rere.” (1 Pita 5:8) Wan rod blong mekem olsemia, i blong no kam olsem we yumi wantem slip long saed blong speret. Fasin ya i save lidim yumi i go long ded. Long saed ya, Jisas i talem se: ‘Yufala i mas lukaot gud. Yufala i no mas letem tingting blong yufala i kam slak, from we yufala i stap ronem lafet, mo yufala i stap drong mo yufala i stap tingting tumas long laef ya long wol.’ (Luk 21:34-36) Yes, sipos yumi stap wekapgud long saed blong speret long ol “lasdei” ya, yumi save gat “hat blong wan laeon,” wan hat we i ‘strong, we oltaem i trastem Jeova.’—2 Timote 3:1; Ol Sam 112:7, 8.